რომანტიკული ფილმები შეიძლება იდეალური არ იყოს, მაგრამ სიყვარულის ისტორიებზე შექმნილი სურათები დასამახსოვრებელი, საკულტოდ ქცეული სცენებით ნამდვილად გამოირჩევა. შეუძლებელია ერთხელ ნახო ტიტანიკი და დაგავიწყდეს ჯეკისა და როუზის “ფრენა” გემის კიჩოზე; ან მისტერ ჯო ფოქსისა და ქეთლინის (თქვენთვის წერილია) პირველი ოფიციალური შეხვედრა აყვავებულ ბაღში.
დღეს ყველაზე საკულტო რომანტიკულ სცენებს წარმოგიდგენთ. იმ სცენებს, რომლებიც მიუხედავად ცხელი ზაფხულისა, თბილ და სასიყვარულო განწყობაზე დაგაყენებთ.
1. ტიტანიკი
2. როდესაც ჰარი შეხვდა სალის
როდის გააცნობიერა წყვილმა, რომ ისინი ერთმანეთისთვის იყვნენ შექმნილები? როცა ჰარი ბოლოს და ბოლოს აღიარებს თავის სიყვარულს სალის წინაშე (შესანიშნავი სიტყვებით, რომელშიც, სხვა დასამახსოვრებელ რამეებთან ერთად სალის ნაოჭსაც ახსენებს ცხვირთან, წარბებშორის), ახალი წლის მხიარული საღამო, სიყვარულის ახსნისთვის შესაფერისი დრო და ბოლო სცენა ფილმიდან, რომელშიც ჰარისა და სალის სიყვარულის გრძელი ისტორია ლოგიკურ ფინალს უახლოვდება, ყველაზე არარომანტიკულ მაყურებელსაც კი გულს მოულბობს.
3. რომეო+ჯულიეტა
შეიძლება ამ სცენამდე აკვარიუმი რომანტიკულ ნივთად არც არასდროს მოგჩვენებოდათ. სწორედ მის მიღმა ხვდებიან ერთმანეთს პირველად შექსპირის ტრაგედიის თანამედროვე კინოვერსიის რომეო და ჯულიეტა. შეიძლება შესანიშნავი საუნდტრეკის ან ლეოს თვალისმომჭრელი ღიმილის გამო, ეს სცენა მართლაც დაუვიწყარია.
4. უბის წიგნაკი
კონფლიქტი ნოასა და ელის შორის, და სპონტანური კოცნა თავსხმა წვიმაში, რომელიც მათ მიახვედრებს, რომ უერთმანეთოდ ვერ გაძლებენ.
5. თქვი რამე
ჯონ კიუსაკის გმირი, რომელსაც ბუმბოქსი თავზემოთ აღუმართავს, სასოწარკვეთილ შეყვარებულს განასახიერებს, რომელიც გულისსწორს სერენადას ამ სახით უმღერის. ეს მომენტი 80-იანების თინეიჯერების სიყვარულის ყველაზე დასამახსოვრებელ და საკლუტო სცენად იქცა.
6. მულენ რუჟი
თვალისმომჭრელი კურტიზანი სატინი ალბათ ვერც ვერასდროს იოცნებებდა ნამდვილ სიყვარულზე, რომ არა ღარიბი და რომანტიკული მწერალი კრისტიანი, რომელმაც თავისი მგრძნობიარე გულითა და რასაკვირველია, მუსიკალურობით მშვენიერი ქალის გული მოიგო. ღამის პარიზის ხედები და ცნობილი სასიყვარულო სიმღერების მიქსი რომანტიკული განწყობის გარანტია.
7. კასაბლანკა
ძველი შეყვარებულების შეხვედრა კასაბლანკაში, გაცოცხლებული სიყვარული და კვლავ სიძნელეები. შეუძლებელია, არ უგულშემატკივრო ჰამფრი ბოგარტისა და ინგრიდ ბერგმანის დაუვიწყარ, შესანიშნავ წყვილს, მაგრამ განშორება გარდაუვალია… აფრენისწინა სცენა კი საოცრად სევდიანი და რომანტიკული.
8. უძინარები სიეტლში
როცა სემი და ენი ბოლოს და ბოლოს ემფაია სთეით ბილდინგის სახურავზე შეხვდებიან და გააცნობიერებენ, რომ ერთმანეთისთვის არიან შექმნილნი.
9. ბრიჯიტ ჯონსის დღიური
ბრიჯიტის დღიურის წაკითხვის შემდეგ, რომელშიც, რასაკვირველია, მასზე ბევრი წერია, მარკი ქალის სახლს ტოვებს… მხოლოდ იმიტომ, რომ ახალი დღიური უყიდოს მას.
