უცნაური თემა ავარჩიე დღეს სალაპარაკოდ, თუმცა, მგონია, რომ საინტერესო. ეს თემა ჩემთვის ცოტათი აბსურდულიცაა, იმიტომ, რომ რამდენი ადამიანიცაა, იმდენი სიყვარულია. მიუხედავად ამისა, მაინც გავრისკე. ვიფიქრე არსებობს რაღაცები, რაზეც ყველანი შევთანხმდებით. მაგალითად იმაზე, რომ: “უდიდესი რამ ამ ცხოვრებაში ისაა, რომ შეგიყვარდეს და პასუხადაც სიყვარული მიიღო”( როგორც იტყოდა, ქრისტიანი, მულენ რუჟიდან.)
“სრული სისულელე იყო იმის ფიქრი, რომ ჩემნაირი ვინმე შეგიყვარდებოდა”
შემიძლია დარწმუნებით ვთქვა, რომ ასე ყოველთვის არ ხდება და მერე იწყება ტანჯვა-წამების ზეიმი. უყურებ იმ ადამიანს ვინც გიყვარს, ის კი სრულიად სხვა მხარეს იყურება. ამ დროს ალბათ ღამეები არ გძინავს, საკუთარ ფიქრებში იხარშები. არადა უბრალოდ შეგიძლია ნოთინგ ჰილის ანა სკოტივით მიხვიდე იმ ადამიანთან და უთხრა : “მე უბრალოდ გოგო ვარ, რომელიც ბიჭის წინაშე დგას და თხოვს რომ მან ის შეიყვაროს” . (ან პირიქით, ბიჭი ვარ, თქვენ გადაწყვიტეთ, რომელი…)
შეგიძლიათ, ზედმეტ იდეალისტობად ჩათვალოთ, მაგრამ მგონია, რომ თუ არ შეგიძლიათ, რომ ყველაფერი იღონოთ იმ ადამიანთან ყოფნისთვის ვინც გიყვართ, სინამდვილეში არ გყვარებიათ… ფილმში, მედისონის ოლქის ხიდები, რობერტი ამბობს: “ახლა ვხვდები, რომ ყველაფერი რაც ცხოვრებაში გამიკეთებია იმისთვის იყო, რომ შენამდე მოვსულიყავი”. და მეც ასე მჯერა- ყველა გზა სიყვარულთან მიდის.
იმის არ მჯერა, რომ სიყვარული მხოლოდ ერთია და არასდროს მთავრდება. ძალიან სევდიანია, რა თქმა უნდა, მაგრამ, ყველაფერს რაც იწყება, დასასრულიც აქვს. თუმცა სად მიდის ეს გრძნობა არ ვიცი და ჯერ არავინ შემხვედრია, ვინც გამარკვევდა. თუ არ მეთანხმებით, არც ეგაა პრობლემა, მაგრამ, შემიძლია გირჩიოთ ტრილოგია ფილმებისა მზის ამოსვლამდე, მზის ჩასვლამდე და შუაღამემდე. სიყვარულის ფერებში შესრულებული არაჩვეულებრივი ფილმებია, რომლებიც შეყვარებული წყვილის თავზე, მზის ამოსვლით იწყება და მისი ჩასვენებით მთავრდება. სინამდვილეც ასეთია, რამდენადაც არ უნდა გვეშინოდეს მისი.
თუმცა ვინ ფიქრობს დასასრულზე, როდესაც ყველაფერი ჯერ მხოლოდ იწყება? არავინ… დატკბით იმით, რაც არის და გამქრალ გრძნობებზე, სიყვარულის ეგოიზმსა თუ მის ალტრუისტულ საწყისებზე ბევრი არ იფიქროთ… შეიძლება ცხოვრება მასთან არ დაამთავროთ, ვინც ახლა უსასრულოდ გიყვართ… შეიძლება სიყვარულის ფსკერზეც დაეშვათ, სამაგიეროდ იქიდან ამოყვინთვა შეძლოთ და ცხოვრება გააგრძელოთ. ის კი გახსოვდეთ, დასაწყისსა და ბოლოს შორის მოქცეული მონაკვეთია ყველაზე მნიშვნელოვანი დანარჩენი – ცხოვრების ოინებია…
(კადრი ფილმიდან – ფსკერზე)
