მემგონი უკვე თამამად შეგვიძლია მზის სითბოს შევეგებოთ და დავტკბეთ გაზრდილი დღით. სამსახურიდან რომ გამოვდივარ მზე ჰორიზონტთან მისული არ არის ხოლმე, თუმცა ზენიტს გადაცდენილია, თბილია და რბილი. ასეთ დროს თბილისის ქუჩებში სეირნობა, განსაკუთრებით სასიამოვნოა. მანქანებისგან გადაჭედილი ქუჩები უძრავად დგას, ისევე, როგორც ლა ლა ლენდის დასაწყისში და შენ კი მისეირნობ და თან ფიქრებში გახვეული ღიღინებ მხიარულ სიმღერას. (ფონად კი უკმაყოფილო მძღოლების ოხვრა, გინება, და ჯუჯღუნი გდევს)
ყველაზე საინტერესო ისაა, რომ გაზაფხულის წვიმაც რაღაცნაირი ნათელია. ყველაზე მეტად ალბათ ის მომენტი მიყვარს, უეცრად, თვალის ერთ დახამხამებაში რომ იღრუბლება, ქარიშხალი ამოვარდება და საშინლად წვიმს, ხოლო რამდენიმე წუთში, თითქოს და ამ წარბშეკრულ ცას, ვიღაცა მოუბოდიშებს და ისიც იმწამსვე აპატიებს ყველაფერს და კაცობრიობას მზეს, სინათლეს და ბედნიერებას დაუბრუნებს. კარგია გაზაფხულის წვიმა. მიტევების წვიმაა. არის ეგეთი იაპონური ანიმაცია – სიტყვების ბაღი, როდესაც უყურებთ აუცილებლად მიხვდებით რას ვგულისხმობ. შეუძლებელია ეს ულამაზესი ნახატები და პერსონაჟების სევდიანი ისტორია, არ შეგიყვარდეთ.
სინათლეს და მზეს თუ დავუბრუნდებით, სულ მახსენდება მხატვარი რენუარი. ზოგადად, მე იმპრესიონისტები ძალიან მიყვარს, რადგან სამყაროს (უსათვალოდ) სწორედ მსგავს ფერებსა და ფორმებში ვხედავ (ეს ხუმრობა იყო), არის რენუარში ის რაც სწორედ გრძელ და ნათელ დღეებზე მაფიქრებს. უფრო სწორად, კი რენუარში ყველაფერი ასეთია. 2013 წელს, კინოფესტივალზე ვნახე ფილმი ამ მხატვრის შესახებ, ასეც ერქვა – რენუარი, და მახსოვს ვიფიქრე, რომ ოპერატორმა სკამაოდ კარგად გადმოსცა იმ ნათელი ფერების სევდა, რომელიც მხატვრის ცხოვრებას და ნახატებს თან სდევდა.
მოკლედ, იმის თქმა მინდა, რომ გრძელი და ნათელი დღეები ისაა, რასაც ადამიანები მთელი ზამთარი ველოდებით ხოლმე. კანს მოხვედრილი ყოველი მზის სხივი ხალისს გვმატებს და ჩვენც ახალი ძალებით ვეგებებით ყოველ დღეს. ასეთ დღეებში სულ მინდა პატარა ზურგჩანთა მოვიკიდო და გზას გავუყვე. დღეები გრძელია. ჩვენ ცოცხლები ვართ. რატომ არ უნდა ვნახოთ ყველაფერი რასაც ცხოვრება გვთავაზობს?! დავივიწყოთ რუტინა და გადავეშვათ თავგადასავლებში, როგორც მთავარმა გმირებმა ფილმებში გზაზე ან თუნდაც ველურ პირობებში გააკეთეს? ყველაფერი თქვენ ხელთაა. მთელი ზაფხული წინაა, თავისი გრძელი ნათელი დღეებით…(ხვალ რომ სამუშაო დღეა, ეგეც არ დაგავიწყდეთ)
