დღეს, ჩვენი რუბრიკის სტუმარი კინომიმომხილველი ია ვეკუა იქნება და ცოტაოდენს საკუთარ კინოგემოვნებაზე ისაუბრებს
თქვენ რომ შეგეძლოთ ფილმის გადაღება, რა ჟანრის ფილმს გადაიღებდით და ვის ვიხილავდით მთავარ როლში?
აუცილებლად გადავიღებდი ფანტასტიკა-ფენტეზის უკიდეგანო გალაქტიკით, გიგანტური კოსმოსური ხომალდებით, ბევრი პლანეტით, უამრავი რასით, რელიგიური ხასიათის მაგიით, ბრძოლებით, სიყვარულითა და დანაკარგით. ვათამაშებდი ჰარისონ ფორდს, ოსკარ აიზეკს და ადამ დრაივერს…
Oh, wait…
მმმ მაინც ამას გადავიღებდი, სხვა რა უნდა გადავიღო? სხვა რა საჭიროა?
რომელი ფილმის მთავარი გმირის ადგილს დაიკავებდით?
ალბათ ვიქნებოდი რეი „ვარსკვლავური ომების“ უახლესი ტრილოგიიდან და წარსულში ქექვის ნაცვლად, რამე უფრო ხეირიანს გავაკეთებდი. მაგალითად, ძალაში განვმტკიცდებოდი, სინათლის მახვილით ბრძოლაში დავხელოვნდებოდი, კაილო რენს კისერს მოვუგრეხდი, პო დამერონს შევიყვარებდი, რომელიმე უქვიშო პლანეტაზე დავსახლდებოდი და პორგების ფერმას მოვაშენებდი. თან მეყოლებოდა R2D2, რომელიც შემატყობინებდა, როდესაც გალაქტიკას ჩემი დახმარება დასჭირდებოდა, ხოლო C3PO-ს ბავშვებს გავაზრდევინებდი.
ერთი ფილმი, რომელიც ჰგავს თქვენს ცხოვრებას, ყოველდღიურობას…
ეს ფილმია Fanboys. ყველა პერსონაჟში საკუთარ თავს ვხედავ, რაც ძალიან მომწონს. იმედი მაქვს, სულ ეგეთი ვიქნები, 90 წლისაც – უკბილო და წელში მოხრილ მოხუცს სინათლის მახვილის გამოშლის ხმაზე გამაჟრიალებს.
ფილმი, რომელმაც დიდი გავლენა მოახდინა თქვენს მსოფლმხედველობაზე არის…
ეს არის ვარსკვლავური ომების მთლიანი სამყარო, რომელიც ჩემთვის უკიდეგანო, უსაზღვრო და უამრავი შესაძლებლობის მქონე თავგადასავალია. ყველაფერთან ერთად ეს არის თანასწორი, ყველანაირ დისკრიმინაციას მოკლებული და სრულყოფილად დაბალანსებული სამყარო, სადაც ყველას აქვს თქმისა და ქმედების უფლება. აქ დროიდებიც კი ცოცხალი არსებების თანასწორები არიან, რაც ჩემთვის იდეალურია.
საქართველოში მიმდინარე მოვლენებთან დაკავშირებით გაიხსენებდით ფილმს….
ახლა მხოლოდ მიმდინარე მოვლენები მახსენდება და არა – ასეთი ფილმი ჯერ არ გადაუღიათ.
