დღევანდელ რუბრიკაში, რჩეულ ფილმებზე ფილოლოგი ლევან ბერძენიშვილი მოგვიყვება.
1. როგორც ამბობენ, წიგნი ხშირად სჯობია ფილმს, თუმცა გამონაკლისებიც არსებობს. თქვენ როგორ ფიქრობთ, რომელია საუკეთესო კინოეკრანიზაცია?
ძალიან დიდი წიგნის ეკრანიზაცია წიგნს ვერ აჯობებს, ეს გამორიცხულია. კარგი წიგნის კარგი ეკრანიზაციაც არსებობს და უკეთესიც, მაგრამ ძალიან კარგს ეკრანიზაცია ვერასდროს მოერევა. აი მაგალითად, “ვეფხისტყაოსნის” ან “ფაუსტის” სრულყოფილი ეკრანიზაცია შეუძლებელია.
ყველაზე უკეთესი კინო, რომელიც წიგნიდან გაუკეთებიათ, ჩემი აზრით, არის სტენლი კუბრიკის ბრწყინვალე “მექანიკური ფორთოხალი” ენტონი ბერჯესის კარგი რომანის მიხედვით. საერთოდ, კუბრიკი ორიგინალს არ ჩამორჩებოდა ხოლმე, მაგრამ ძალიან დიდ ავტორებსაც ერიდებოდა.
2. რომელია ფილმი, რომელმაც თქვენი შეხედულებები მნიშვნელოვნად შეცვალა?
ჩემზე დიდად იმოქმედა “როკო და მისმა ძმებმა“, რადგან იგი ყველაზე უკეთესი ფილმია, რაც კი ოდესმე გადაუღიათ. კონფლიქტი ძმებს შორის, სოციალური ფონი, გენიალური რეჟისორი და მსახიობები, ნინო როტას მუსიკა – იდეალია.
3. თქვენი სურვილი რომ იყოს, ლექციაზე, ყველაზე ხშირად, რომელ ფილმს უჩვენებდით თქვენს სტუდენტებს?
ვუჩვენებდი “ამადეუსს“, რომ გენიოსს მიახლოებოდნენ. აქ კინოს, რა თქმა უნდა, მუსიკაც ეხმარება.
4. ქართული ფილმი, რომელიც დღევანდელ რეალობას საუკეთესოდ აღწერს, არის:
“იყო შაშვი მგალობელი” – რადგან სწორედ იმაზეა, რომ ვერაფერს ვასწრებთ. საქართველოს პერსპექტივა ამ ფილმით გავიგე. საუკუნე კიდევ გვჭირდება
5. და ბოლოს, რომელია ფილმი, რომელსაც გარკვეული მიზეზებისდაგამო ხშირად უბრუნდებით?
ეს არის “თავბრუსხვევა” – ვეძებ, იქნებ რამე ნაკლი ვუპოვო და ვერ ვპოულობ..
