ამერიკული საშინელებათა ისტორიის შემქმნელები არაპროგნოზირებადი ადამიანები არიან. მაგალითად, მეექვსე სეზონი ისე გავიდა ეთერში, რომ მისი სახელწოდებაც კი არ იყო ცნობილი (შეგახსენებთ, რომ სერიალის თემა სეზონების მიხედვით იცვლება), თუმცა მეშვიდე სეზონის დაწყებამდე FX-მა უფრო უხვად გადმოუყარა ნამცეცები მაყურებლებს. რაიან მერფიმ, შოუს შემქმნელმა თვეების წინ განაცხადა, რომ ეპიზოდების მთავარი თემა 2016 წლის არჩევნები იქნებოდა.
მოდი, შევაჯამოთ ყველაფერი, რაც ამ პოლიტიკით დატვირთული სეზონის შესახებ ვიცით.
მსახიობები
გულშემატკივრების გასახარად, ამ სეზონშიც ვიხილავთ ევან პიტერსსა და სარა პაულსონს. მათ პარტნიორობას ემა რობერტსი და ფრენსის კონროი გაუწევენ. ახალ მსახიობებს რაც შეეხებათ, მთავარი შენაძენი ლენა დანჰემი იქნება, რომელიც სერიალ გოგოებიდან გემახსოვრებათ. ის ამ სერიალის შემქმნელიცაა და მთავარი გმირიც. ვარსკვლავების რიგს შემოუერთდა ელისონ პილიც.
პაულსონი და პილი დაქორწინებულ წყვილს, ელისა და აივის განასახიერებენ. როგორც თრეილერიდან ჩანს, ელის საქმეები მაინცდამაინც კარგად არაა. ის ტელევიზორს უკივის, როცა აცხადებენ, რომ არჩევნებში დონალდ ტრუმპმა გაიმარჯვა. ცოტა ხანში კი საკუთარ ფსიქოლოგს უყვება, რომ ყველაზე მეტად კლოუნებისა ეშინია. მერფიმ განმარტა, რომ მთავარ გმირს სხვა უამრავი შიშიც აქვს.
რაც შეეხება ევან პეტერსის პერსონაჟს, ის აღფრთოვანებული ჩანს ტრამპის გამარჯვებით. კაი მისივე დაფუძნებული კულტის ლიდერია და მასში ჩარლზ მენსონის “ნოტებიც” ამოცნობაც შეიძლება. თუ შოუს პროდიუსერებს დავუჯერებთ, ევან პეტერსის კარიერაში ეს ყველაზე კარგი როლი უნდა იყოს.
ლენა დანჰემის გმირი მეშვიდე ეპიზოდში გამოჩნდება. მსახიობი ვალერი სოლანისის როლს შეასრულებს – ქალის, რომელმაც ვორჰოლის მოკვლა სცადა. ამ სეზონში ვნახავთ კლოუნ ტვისტისაც, რომელმაც მეოთხე სეზონში გაგვიხეთქა გული.
შინაარსი
სერიალი მართლა არჩევნებზე იქნება თუ პოლიტიკა მხოლოდ უკანა ფონზე მიმდინარე ამბად უნდა განვიხილოთ?
სავარაუდოდ, ტრამპის გამარჯვების თემას სერიალი მხოლოდ საწყის წერტილად გამოიყენებს და ამაზე შორს არ წავა, თუმცა სიმბოლოები შეიძლება უფრო ღრმადაც იყოს დამალული. მერფის განცხადებით, მისი მიზანი კულტისა და მისი ლიდერის ფსიქოლოგიის კვლევაა, რაც ტრამპისა და მისი ერთგული მომხრეებისადმი მიძღვნილი ალეგორიაც შეიძლება იყოს.
მისტიკას ნაკლებად უნდა ველოდეთ, მაგრამ კლოუნები კი უხვად იქნებიან. მინიშნება გვაქვს პოლიამორიაზეც, რაც კულტისთვის სულაც არაა გასაკვირი.
პოლიტიკა
მიუხედავად იმისა, რომ პოლიტიკა დრამატული მოვლენების მთავარ ძრავად გვევლინება, კულტს ნამდვილად არ აქვს პრეტენზია იმაზე, რომ მემარცხენეობა-მემარჯვენეობის საკითხზე დაგვაფიქრებს.
საქმე ტრამპსა და კლინტონში არაა. მთავარი ადამიანური სისუსტეებია და ბუნებრივი შიში, როცა ხედავ, რომ ძალაუფლება არასწორ ადამიანებს უვარდებათ ხელში, – ამბობს რაიან მერფი.
ერთი, რასაც უნდა ველოდოთ, ტრამპის ტვიტებია სერიალთან დაკავშირებით. იმის შანსი, რომ ამერიკის პრეზიდენტი მასზე შექმნილ პროდუქტს გამოეხმაურება, საკმაოდ მაღალია. ასე რომ, წინ საინტერესო სეზონი გველის.
