რაქელ ჯ. პალაციოს – ნიუ-იორკელი გრაფიკული დიზაინერის ავტორობით 2013 წელს გამოქვეყნებულმა “საოცრებამ”, რომელიც თავდაპირველად საბავშვო წიგნად იყო ჩაფიქრებული, პოპულარობით ყოველგვარ მოლოდინს გადააჭარბა. ამბავი დეფორმირებული სახის ბიჭზე, რომელიც 10 წლისა პირველად მიდის სკოლაში, მსოფლიოში უამრავმა ბავშვმა და უფროსმა განიცადა და შეიყვარა. ავგუსტ, იგივე ავგი პულმანს უიშვიათესი გენეტიკური დარღვევის გამო დაბადებიდან 27 ოპერაცია აქვს გადატანილი. შემხვედრები მას თვალს არიდებენ და ამის გამო განათლებასაც შინ იღებს, მაგრამ დგება დრო, როცა უჩვეულო გარეგნობის ბიჭი სკოლაში უნდა მივიდეს. სწორედ აქედან იწყება ამბავი, რომელიც ავგისაც და მის გარშემომყოფებსაც ბევრ რამეს ასწავლის. წიგნის დევიზი – “აირჩიე სიკეთე” – მხოლოდ დევიზად არ დარჩენილა და ავგუსტის დახმარებით ბიჩერის სკოლაში მოხდენილი საოცრება მსოფლიოს მოედო.
ნიუ-იორკ ტაიმსის ბესტსელერის ეკრანიზაციის იდეა მალევე გაჩნდა და პალაციოს წიგნი სცენარად ასევე პოპულარულმა შესანიშნავმა ავტორმა და რეჟისორმა, სტივენ ჩბოსკიმ და ასევე ცნობილმა სცენარისტმა (ჰარი პოტერი და დაწყევლილი ბავშვი) ჯეკ თორნმა გადაამუშავეს. რეჟისორმა სტივენ ჩბოსკიმ ამ ფილმისთვის ვარსკვლავური სამსახიობო ანსამბლი შეკრიბა: ჯულია რობერტსი, ჯეიკობ ტრემბლი და ოუენ უილსონი. მაისში გამოქვეყნებულმა პირველმა ოფიციალურმა ტრეილერმა დიდი ინტერესი გამოიწვია და საოცრების ეკრანიზაციის მომლოდინეთა რიცხვი კიდევ უფრო გაიზარდა. ფილმი კინოთეატრებში 2017 წლის 17 ნოემბერს გამოჩნდება და ავგუსტ პულმანის გულისამაჩუყებელი ისტორია კიდევ უფრო მეტ ადამიანს დაარწმუნებს, რატომ უნდა აირჩიოს სიკეთე.
მანამდე კი ნახეთ ფილმის #2 ოფიციალური ტრეილერი, რომელიც ახლახან გამოქვეყნდა.
