ამჟამად ჰოლივუდში სამი პროექტი მზადდება კრიმინალისა და სექტის ლიდერის, ჩარლზ მენსონის შესახებ: რეჟისორ მაიკლ პოლიშის, სადაც მთავარ როლზე კეიტ ბოსვორთი განიხილება, კვენტინ ტარანტინოს ფილმი, სადაც მარგო რობი განიხილება ერთ-ერთ როლზე და ფილმი “The Haunting of Sharon Tate”, რომლის გადაღებებიც უკვე მიმდინარეობს, მთავარ როლს კი ჰილარი დაფი ასრულებს.
მენსონმა სექტა კალიფორნიაში 60-იან წლებში ჩამოაყალიბა, ის ქადაგებდა რომ ადამიანის მკვლელობა არის უდიდესი კეთილშობილება, რადგან ადამიანის სულს ხორცისგან ათავისუფლებ და ზეცაში ამკვიდრებ. მისი შთაგონებით, 1969 წელს ოჯახის წევრებმა რომან პოლანსკის ფეხმძიმე მეუღლე, მსახიობი შერონ ტეიტი მოკლეს. საერთო ჯამში მათ ცხრა ადამიანი გამოასალმეს სიცოცხლეს. მენსონი 2017 წელს, ციხეში გარდაიცვალა 83 წლის ასაკში.
როგორც ჩანს ჰოლივუდი მკვლელობებიდან 50 წლის თავზე, ცდილობს ამ ამბის “გლამურიზაცია” მოახდინოს და ისეთ რეჟისორებსა და მსახიობებს იწვევს პროექტებზე, რომელთა სახელებიც, ზემოთ დაგისახელეთ. არავის გაუკვირდება თუკი გეტყვით, რომ ამ ყველაფრით ტეიტის და, დებრა ტეიტი, გაბრაზებულია და ჰილარი დაფის ფილმი “უგემოვნოდ” და “პროვოკაციულად” მოიხსენია. “მნიშველობა არ აქვს, ვინ შეასრულებს ჩემი დის როლს, ვგრძნობ, რომ ფილმი მაინც უგემოვნო იქნება. უაზრობა და საშინელებაა, თუ როგორ ცდილობს ყველა ფილმი გადაიღოს ჩემი დის მკვლელობიდან 50 წლისთავზე”, განაცხადა დებრამ.
ჰილარი დაფმა ინსტაგრამზე ფოტო გამოაქვეყნა წარწერით, “ბავშვი შემეძინა”, რაც რა თქმა უნდა, მტკივნეული გამოდგა ტეიტის ნათესავებისთვის.
დებრა იმასაც აღნიშნავს, რომ ფილმის სცენარის გასაჯაროების შემდეგ, დარწმუნდა, რომ ის სრული სიცრუეა და სინამდვილესთან კავშირი არ აქვს.
უკვე კითხვის ნიშნის ქვეშ დგას ტარანტინოს პროექტიც, მას შემდეგ რა ინტერნეტში ვიდეო გავრცელდა, სადაც ის რომან პოლანსკის მიერ 13 წლის გოგოს გაუპატირებას ამართლებს. რეჟისორს განცხადება ჯერ არ გაუკეთებია ამ ფაქტზე.
