ლეგენდარული რეჟისორი მაყურებლის წინაშე წელს დიუნკერკით წარსდგა და კიდევ ერთხელ დაამტკიცა, რომ უდაოდ დიდი ტალანტის მქონე ადამიანია. უახლეს ინტერვიუში ქრისტოფერ ნოლანმა საკუთარი მუშაობის პრინციპებზე ისაუბრა და სხვადასხვა მნიშვნელოვან საკითხებთან ერთად, ტელეფონზე დამოკიდებული ადამიანების შესახებაც გააკეთა ვრცელი კომენტარი. 47 წლის რეჟისორმა განაცხადა, რომ საზოგადოებაში ყოფნისას მობილურის გამოყენება რამდენიმე საქმის ერთად კეთების ილუზიას ქმნის, თუმცა სინამდვილეში ეს ირგვლივ მყოფების მიმართ შეურაცხმყოფელი საქციელია. სწორედ ამიტომ, ცნობილი რეჟისორი ფილმზე მუშაობისას ჯგუფის წევრებს ტელეფონის გამოყენებას უკრძალავს. ნოლანმა აღნიშნული წესის დამკვიდრების მიზეზებზე ისაუბრა და ასევე ისიც განიხილა, თუ რა გავლენას ახდენს ტელეფონის გამოყენება გადაღების პროცესის დინამიურობაზე.
მე მაშინ დავიწყე ფილმების შექმნა, როდესაც ხალხისგან ჯერ კიდევ არ იყო ბუნებრივი გადასაღებ მოედანზე ტელეფონის ქონა, როდესაც ტელეფონის ამოღება არაპროფესიონალიზმად აღიქმებოდა. მობილურები ყურადღების გამფანტველ საგნად იქცა, ხალხი ბევრად უფრო უკეთ მუშაობს მის გარეშე. თავიდან ეს რთულია, თუმცა შემდეგ ძალიან გეხმარება ბოლომდე კონცენტრირდე იმაზე, რასაც აკეთებ. ეს ყველას ესმის, ბევრი თანამშრომელი მყავდა, რომელსაც მადლობა გადაუხდია. გადასაღებ მოედანზე ვცდილობთ ალტერნატიული რეალობის ბუშტში მოვექცეთ.
