კინოისტორიაში ერთ-ერთი ულამაზესი ქალი არამხოლოდ თამამი როლებით, არამედ გამონათქვამებითაც გამოირჩევა. თუმცა უკანასკნელი რამდენიმე წლის განმავლობაში ამჯობინებდა, საკუთარ პირად ცხოვრებაზე ღიად არ ესაუბრა. 2013 წელს ვენსან კასელთან დაშორება მისთვის საკმაოდ რთული გადასატანი აღმოჩნდა. და აი, Paris Match-თან ინტერვიუში მონიკა ბელუჩიმ პირველად გაამხილა თავის იმდროინდელი განცდები.
“არჩევანი გავაკეთე. შეიძლება დიდხანს იცხოვრო ადამიანთან და უცებ მიხვდე, რომ ასე აღარ შეიძლება — დროა ცალ-ცალკე განაგრძოთ გზა. განშორება ჩემთვის მტკივნეული, მაგრამ აუცილებელი იყო” — განაცხადა მსახიობმა.
მან ასევე დასძინა, რომ ადრე, საკუთარ სილამაზეში დარწმუნებული, ბევრად თამამად გრძნობდა თავს. “ახალგაზრდობაში სილამაზისადმი განსაკუთრებულად მგრძნობიარე დამოკიდებულება მქონდა — ახალგაზრდა, ლამაზ ადამიანებთან მსურდა ურთიერთობა დღეს ვფიქრობ, რომ ნაოჭიანი მამაკაცები უფრო საინტერესონი არიან: ხაზები მათ სახესა და სხეულზე გვეხმარება, უკეთ დავინახოთ მათი სული”.
ბელუჩიმ განმარტა, რომ კასელთან 20-წლიანი ურთიერთობის შემდეგ რთული იყო ყველაფრის თავიდან დაწყება, მაგრამ ამჟამად იგი კვლავ შეყვარებულია. “ჩემს ცხოვრებაში ისევ გამოჩნდა მამაკაცი, მაგრამ მეტის თქმა ამჟამად არ შემიძლია, რაღაც პირადი ჩემთვის მინდა დავიტოვო. ეს ჩემი ცხოვრების მორიგი, ახალი ეტაპია”.
მსახიობმა საცხოვრებელი ადგილის შეცვლაზეც ისაუბრა: “2013 წელს, როცა დავშორდით, ვენსანი ბრაზილიაში დარჩა, მე კი პარიზში გადასვლა გადავწყვიტე. გასულ წელს კი ლისაბონში შევიძინე სახლი და ძალიან მინდა იქ გადასახლება. ჩემს შვილებს ძალიან მოეწონებათ იქაურობა, მიუხედავად იმისა, რომ იქაური ცხოვრების წესი საფრანგეთის დედაქალაქისგან განსხვავებით, უფრო მოწესრიგებულია”.
ვენსან კასელი და მონიკა ბელუჩი ერთმანეთს 1997 წელს, ფილმ “ბინის” გადაღებისას შეხვდნენ, სამი წლის შემდეგ კი დაქორწინდნენ. 2004 წელს მათ ქალიშვილი დევა შეეძინათ, 2010 წელს კი ლეონი. 2013 წელს წყვილმა “ერთობლივი შეთანხმების” საფუძველზე განქორწინება გადაწყვიტა.
