სარა კონორი ტერმინატორში ბრუნდება. ლინდა ჰემელტონი საკულტო ფრენჩაიზის მორიგ ნაწილში მიიღებს მონაწილეობას. ყველაზე ცნობილი კიბორგის როლში კი კვლავ არნოლდ შვარცნეგერს მოიაზრებენ. მან პირველად 30 წელზე მეტი ხნის წინ ითამაშა “ტერმინატორში”.
სიქველს ამჟამად Skydance-ის და ჯეიმს კამერონის პროდიუსერობით იღებენ, რეჟისორი კი ტიმ მილერია (დედპული). კამერონი, ჰემელტონი და შვარცნეგერი 1991 წლის შემდეგ (ტერმინატორი 2: განკითხვის დღე) პირველად მუშაობენ კვლავ ერთად.
ახალი “ტერმინატორის” სცენარი კამერონმა და მილერმა დაწერეს. მათთან ერთად იმუშავეს დევიდ გოიერმა და ჯოშ ფრიდმენმა, რომლებიც ფრენჩაიზის ახალ ტრილოგიად გაგრძელებას გეგმავენ.
სიუჟეტის დეტალები ჯერჯერობით უცნობია, თუმცა კამერონის განცხადებით, სიქველი “ტერმინატორი 2: განკითხვის დღის” პირდაპირ გაგრძელებას წარმოადგენს. რეჟისორს ტერმინატორის შემდეგ ნაწილებთან კავშირი აღარ ჰქონია.
ლინდა ჰემელტონმა დროის ერთ-ერთ ყველაზე გავლენიან საი-ფაი ფილმის პირველ ორ ნაწილში შეასრულა სარა კონორის როლი. სიუჟეტის მიხედვით, სწორედ მის მოსაკლავადაა გამოგზავნილი ქილერი კიბორგი მომავლიდან. მან უნდა მოკლას სარა კონორი, რათა არ დაიბადოს მისი შვილი, რომელიც კაცობრიობის მხსნელი უნდა გახდეს.
