“დროა, შეიტყოთ იმ “გემრიელი ლუკმების” შესახებ, რომლებიც ფილმის მეორე ნაწილში გელით!” – პოტერმორმა როულინგის ჯადოსნური სამყაროს თაყვანისმცემლებს სასიამოვნო სიურპრიზი მოუმზადა და ფილმის “ჯადოსნური ცხოველები და სად ვიპოვოთ ისინი” გაგრძელების შესახებ საინტერესო დეტალები გაამჟღავნა.
ფილმის გადაღებები გუშინ დაიწყო, პრემიერა კი 2018 წლის ნოემბერში შედგება. მანამდე ჩვენთვის ცნობილი ხდება, რომ:
- ფილმში კვლავ შევხვდებით პერსონაჟებს პირველი ნაწილიდან – ნიუტ სკამანდერს, თინა და ქვინი გოლდსტეინებს, ჯეიკობ კოვალსკის და ქრედენსსაც, რომელსაც ეზრა მილერი განასახიერებდა. ჯერჯერობით უცნობია, დაბრუნდება თუ არა მსახიობი ამ როლის შესასრულებლად, რადგან ფილმის შემქმნელები მის “მისტიური სახით” გამოჩენაზე საუბრობენ.
- გავიცნობთ ახალ პერსონაჟებსაც – ახალგაზრდა დამბლდორის როლს ჯუდ ლოუ შეასრულებს. ის სკამანდერთან ერთად შეეცდება გრინდელვალდის დამარცხებას, რომელიც ფილმის პირველ ნაწილში პერსივალ გრეივსის (კოლინ ფარელი) სახით ინიღბებოდა, ახლა კი მას ჯონი დეპი განასახიერებს.
- ფილმში შევხვდებით “დიდი პატარა ტყუილების” ვარსკვლავ ზოე კრავიცსაც, რომელიც ლეტა ლესტრეინჯის როლში მოგვევლინება. მაყურებელმა მისი ხილვა პირველ ნაწილში სულ რამდენიმე წამით შეძლო.
- ფილმში მოქმედება 1927 წელს ნიუ იორკში, ლონდონსა და პარიზში განვითარდება და ძალიან ბევრი დეტალით დაუკავშირდება ჰარი პოტერის კარგად ნაცნობ სამყაროს
