19 სექტემბერს ლიბანელი რეჟისორის, სამუელ მაოზის მიერ ისრაელის სახელით გადაღებულმა ფილმმა — “ფოქსტროტმა” ვენეციის კინოფესტივალის გრან-პრი დაიმსახურა. პრიზიორი ფილმი განსაკუთრებული ყურადღების ქვეშ მოექცა ტორონტოსა და ტელურაიდეს კინოფესტივალებზეც, რასაც Sony Pictures Classics-ის დაინტერესებაც მოჰყვა. მან სულ ცოტა ხნის წინ ფილმის ამერიკაში ჩვენების უფლება შეიძინა. ეს “ფოქსტროტის” უკანასკნელი გამარჯვება არ ყოფილა: გუშინ მან ისრაელის ოსკარებად წოდებული Ophir Awards-ზე ფურორი მოახდინა და 8 ნომინაციაში გაიმარჯვა, მათ შორის იყო საუკეთესო ფილმის ნომინაცია, რეჟისორმა სამუელ მაოზმა კი საუკეთესო რეჟისორის წოდება დაიმსახურა. ეს ნიშნავს, რომ ისრაელის წლევანდელ ტრიუმფატორს ოსკარების უცხოენოვანი ფილმის კატეგორიაში ვიხილავთ.
ფილმის სიუჟეტი ნაწილობრივ აბსურდული და ირონიულია. რეჟისორი ომის თემატიკას პროვოკაციულად ეხება და ბედისწერას როგორც სიკვდილთან ცეკვას წარმოგვიდგენს. ამბავი ვითარდება წყვილის გარემო, რომელსაც არმიის ოფიციალური წარმომადგენელი აცნობებს, რომ მათი ჯარისკაცი შვილი მოკლეს. მთავარ გმირებს სარა ადლერი, ლიორ აშკენაზი და იონათან შირაი ასრულებენ. ფილმი კრიტიკულია ისრაელში დიდი ხნის წინ საკამათო თემად ქცეული მილიტარიზმის მიმართ და ქვეყნის საომარ ყოველდღიურობას თავისებური სარკაზმით ხატავს. ამ ყველაფრის გათვალისწინებით, შეგვძლია თამამად ვივარაუდოთ, რომ “ფოქსტროტი” ოსკარების მორიგი დაჯილდოების ერთ-ერთი ყველაზე ხმაურიანი უცხოური ფილმი იქნება.
იხილეთ ფილმის თრეილერი და ახალგაზრდა ჯარისკაცის ცეკვა:
Sony Pictures Classics-მა დაადასტურა, რომ ჩრდილოეთ და ლათინოამერიკის, ასევე სკანდინავიის ბაზარში ჩვენების უფლებები შეიძინა.
“ფოქსტროტი იშვიათი, გამორჩეული, მძაფრი და დიდი მნიშვნელობის მქონე ფილმია. მისი ნახვით მიღებული მრავალმხრივი შთაბეჭდილებები შეუძლებელია სხვას შეადაროთ. სასიხარულოა ისეთ რეჟისორთან თანამშრომლობა, როგორიც სამუელ მაოზია” – განაცხადა Sony Pictures Classics-მა.
