თუ გავრცელებულ ინფორმაციას დავუჯერებთ, ახალი ფილმის გამოსვლის შემდეგ ბონდიანა უნდა დასრულდეს. მანამდე კი, The Mirror-ის ცნობით, ფილმის პროდიუსერმა ბარბარა ბროკოლიმ დაადასტურა, რომ ბონდის რიგით 25-ე ფილმში ჯეიმს ბონდს კვლავ დენიელ კრეიგი განასახიერებს. ეს მისი მეხუთე ბონდი იქნება.
კრეიგი ეჭვობდა, სამომავლოდ თუ კიდევ ითამაშებდა სუპერჯაშუშის როლს. მისი თქმით, ბონდის მორიგი როლის შეთავაზებას, ერჩივნა ეთქვათ, “თავი მოიკალიო”, მაგრამ კრეიგის სიჯიუტე მაინც გატეხეს და როგორც ჩანს, ამაში წვლილი ასტრონომიული ჰონორარის პერსპექტივამაც შეიტანა. პროდიუსერთა განმარტებით, ვარსკვლავის კანდიდატურა ამ როლზე შეუცვლელია. The Mirror-ი იმასაც იტყობინება, რომ ბროკოლი “ძალზე მონდომებულია” ბონდი 25-ის მუსიკალური თემისთვის ადელიც დააბრუნოს, რათა ამ უკანასკნელმა თავისი ლეგენდარული, ბრიტის, გრემისა და ოქროს გლობუსის გამარჯვებული Skyfall-ის მსგავსი მუსიკალური თემა შექმნას.
“კრეიგი და ადელი წარმატებულ გუნდს ნიშნავს – საუკეთესო და ფინანსურად მომგებიან არჩევანს, – სანდო წყაროზე დაყრდნობით აცხადებს The Mirror-ი, – დენიელის დაყოლებას საკმაო ხანი დასჭირდა, თუმცა მისტერ კრეიგი კვლავ 007 იქნება. რაც შეეხება ადელს, ჯერჯერობით მისი საკითხი ბოლომდე გადაწყვეტილი არაა, თუმცა მუსიკოსის მზადყოფნა, იყოს ბონდის გუნდის ნაწილი, იმედისმომცემია”.
