გამბიტი იქს-ადამიანების კომიქსის ერთ-ერთი ყველაზე პოპულარული პერსონაჟია. კინოეკრანზე ის მხოლოდ სამურავის მცირე ეპიზოდში გამოჩნდა. ჰოლივუდს გმირის ისტორიის ეკრანიზაციის არაერთი მცდელობა ახსოვს. ერთ-ერთი უკანასკნელი არშემდგარი პროექტის შესახებ, რომელშიც მთავარი როლი ჩენინგ ტატუმს უნდა ეთამაშა, რეჟისორმა რუპერტ უაიატმა “The Beat”-თან ინტერვიუში ისაუბრა:
მე და ტატუმი ვმეგობრობთ. მასთან და პროდიუსერ რიდ კაროლინთან ერთად სცენარზე მუშაობა გვქონდა დაწყებული. გადაღებების დაწყებამდე 10 კვირა რჩებოდა, სურათის ბედი კი ბიუჯეტმა გადაწყვიტა. ბიზნესის წესები თქვენც კარგად იცით, მსგავს ბლოკბასტერს დიდი ფული სჭირდებოდა. ფანტასტიკური ოთხეულის ჩავარდნით შეშფოთებულმა “Fox”-მა კომიქსის ახალ ეკრანიზაციაში ფინანსების ჩადება არ მოინდომა. ბიუჯეტი შემცირდა, ჩვენ კი სცენარის ხელახალი გადაწერა მოგვიწია. ასე ახლოს გადაღებების დაწყებამდე მთლიანი სიუჟეტის შეცვლა შეუსრულებელი მისია იყო.
ტატუმმა და რიდმა ფარ-ხმალი არ დაყარეს, ისინი დღემდე სცენარზე მუშაობენ. ჩემი აზრით “Disney”-სთან ერთად ყველაფერი კარგად გამოუვათ.
უაიატის წასვლის შემდეგ ფილმის გადაღებით დაგ ლიმანი დაინტერესდა, რომელმაც საბოლოოდ ბლოკბასტერის გადაღებაზე უარი თქვა. შემდეგ იყო გორ ვერბინსკი, რომელმაც 2018 წლის 11 იანვარს პროექტი დატოვა.
