სტუდია LIONSGATE მსოფლიოს კიდევ ერთი ლეგენდარული რომანის ახალ ეკრანიზაციას სთავაზობს. საზოგადოებას დიდ ეკრანებზე ოსკარ უაილდის ცნობილი რომანის – დორიან გრეის განსხვავებული ადაპტაცია მოევლინება. 1890 წლის ნოველა ამჯერად სრულიად განსხვავებული კუთხით იქნება გადაღებული, რადგან დორიან გრეის როლში ქალ მსახიობს ვიხილავთ.
ფილმის რეჟისორის შერჩევის დროს სტუდიის დირექტორებმა ასევე თამამი გადაწყვეტილება მიიღეს და ახალი პროექტი ეპატაჟურ მუსიკოსს, ენი კლარკს ჩააბარეს.
კლარკი დამწყები რეჟისორია, რომელიც მსოფლიოსთვის ცნობილი მისი მუსიკალური ნიჭის წყალობით გახდა. მან 2015 წელს გრემის ჯილდო მოიპოვა. მომღერალისა და მულტიინსტრუმენტალისტის სარეჟისორო დებიუტი 2017 წლის სანდენსის ფილმის ფესტივალზე შედგა მოკლემეტრაჟიანი ფილმით “Birthday Party“, რომელიც კრიტიკოსებმა დადებითად შეაფასეს. ათწლეულის ერთ-ერთი გამორჩეული და ინოვაციური გიტარისტის დიდი სარეჟისორო ნამუშევრისთვის სცენარის დასაწერად დევიდ ბირკის კანდიდატურაა დამტკიცებული.
