მას შემდეგ, რაც დიდი პატარა ტყუილების სადებიუტო სეზონმა მილიონობით მაყურებლის გული და ემის რვა ნომინაცია მოიგო, დაიწყო საუბარი მოსალოდნელ მეორე სეზონზეც.
მართალია, HBO-ს ჯერ კიდევ არ დაუდასტურებია გავრცელებული ხმები სერიალის გაგრძელების თაობაზე, თუმცა, როგორც ჩანს, ვარსკვლავური ქასთი ამ დღეს ფანებზე ნაკლებად არ ელოდება.
სულ ცოტა ხნის წინ ნიკოლ კიდმანმა აღნიშნა, რომ სიამოვნებით გააგრძელებდა პროექტზე მუშაობას, რიზ უიზერსპუნმა კი უარი განაცხადა Pale Blue Dot-ში მონაწილეობის მიღებაზე, რაც გვაფიქრებინებს, რომ ამით დრო დიდ პატარა ტყუილებს გამოუთავისუფლა.
სწორედ ამიტომ, თაყვანისმცემლებს შორის გაჩნდა ვარაუდი, რომ შოუს მეორე სეზონის გადაღებები 2018 წლის დასაწყისიდანვე განახლდებოდა.
მართალია, არ არსებობს ოფიციალური განცხადება, თუმცა ჯერ კიდევ ემის კულუარებში თავად ვარსკვლავები და ნოველის ავტორი ლიან მორიარტი დაუფარავად აცხადებდნენ სერიალის მოსალოდნელი დაბრუნების შესახებ.
