გიორგი თავართქილაძის მოკლემეტრაჟიანი მხატვრული ფილმი ცუდი ხალხი Palm Springs-ის საერთაშორისო კინოფესტივალზე მიიღებს მონაწილეობას. სურათს საკონკურსო პროგრამაში 22 ივნისს აჩვენებენ.
ცუდი ხალხის მსოფლიო პრემიერა ჰონგ კონგის საერთაშორისო კინოფესტივალზე შედგა. ფილმის სიუჟეტი 1991 წლის თბილისის სამოქალაქო ომის მონაწილეებზე მოგვითხრობს. ერთ-ერთი მთავარი პერსონაჟი მცირეწლოვანი შვილისთვის სიცხის დამწევ მედიკამენტს ეძებს, რა დროსაც შემთხვევით გადაეყრება დიდი ხნის უნახავ თანაკლასელს. მალევე ირკვევა, რომ დიდი ხნის მონატრებული მეგობარი ახლა სულ სხვა ბანაკშია და მისი მტერია.
თავართქილაძის მოკლემეტრაჟიანი ფილმი ლონდონში, Discover Film Festival-ზე საუკეთესო დრამატული ჯილდოს მფლობელი გახდა.
გარდა ამისა, ფილმში მონაწილე მსახიობებმა ვახტანგ ჩაჩანიძემ და ჯანო იზორიამ რედლაინის საერთაშორისო კინოფესტივალზე მთავარი და მეორეხარისხოვანი როლების შესრულებისთის პრიზები მიიღეს.
