კანის საერთაშორისო კინოფესტივალი საინტერესო და გამორჩეულია იმითაც, რომ აქ მსოფლიოს თითქმის ყველა ქვეყანას საკუთარი კინოპავილიონი აქვს. მათ შორის არის საქართველოც, რომელიც წელს კინობაზრობაზე საკუთარი პავილიონით მეთორმეტედ წარსდგა და ბევრი საინტერესო პროექტით ხვდება უცხოელ კინომწარმოებლებს.
ერთ-ერთი ასეთი პროექტია კომპანია ICEBREAKER-ის ახალი ჰორორ ჟანრის ფილმი Immersion, რომელზეც რეჟისორი ჯაბა მელქაძე, პროდიუსერი ელენე კოლელიშვილი და სცენარისტი ზაზა კოშკაძე მუშაობენ.
კომპანია ICEBREAKER 2016 წელს დაფუძნდა და ის კინოკლასტერის ერთ-ერთი აქტიური წევრია. გამომდინარე იქიდან, რომ ფილმით ბევრი უცხოელი კინოპროდიუსერი დაინტერესდა, კანში ფილმის პროდიუსერს ელენე კოლელიშვილს შევხვდით და ვეცადეთ ფილმის შესახებ დეტალები გაგვეგო.
“ფილმზე აქტიური მუშაობა 2017 წელს დავიწყეთ. ჯაბა მელქაძემ და ზაზა კოშკაძემ ფსიქოლოგიური ჰორორის ჟანრში სცენარი დაწერეს და ICEBREAKER-მა დაიწყო პარტნიორების და თანაპროდიუსერების ძიება. სიუჟეტსა და ფილმის მთავარ თემაზე, ამ ეტაპზე ბევრს ვერ ვისაუბრებთ, უბრალოდ, შეგვიძლია ვთქვათ, რომ ისტორია ქართული რეალობიდან გამომდინარე შეიქმნა”, – ამბობს ელენე.
ფილმის შემოქმედებითმა გუნდმა კანში უკვე გამართა რამდენიმე შეხვედრა და საკმაოდ ნაყოფიერადაც.
“თითქმის 2-წლიანმა მუშაობამ და წლევანდელმა შეხვედრებმა ბერლინსა და კანში შედეგი გამოიღო და უკვე გვყავს დაინტერესებული თანაპროდიუსერები, როგორც საქართველოდან, ასევე საფრანგეთიდან და ფილმს, სავარაუდოდ, 2020 წლის გაზაფხულზე გადავიღებთ. მთელი ამ ხნის მანძილზე კინოკლასტერი სულ გვერდით გვედგა და ძალიან მნიშვნელოვანია ზოგადად მისი არსებობა კინოსფეროს განვითარებისთვის. გადაწყვეტილია, რომ ფილმში ძირითადად ქართველი მსახიობები იქნებიან დაკავებულები, თუმცა რამდენიმე როლზე, ევროპელი მსახიობების მოწვევაც განიხილება”, – გვეუბნება ელენე.
ICEBREAKER-ის მთავარი მიზანი საქართველოში ჟანრული და კომერციული მხატვრული ფილმების განვითარება და გადაღებაა.
