საქართველოში პირველად რუსული ანიმაციური კინოს კვირეული გაიმართება. “ვინი პუჰი და ყველა, ყველა, ყველა” 24 სექტემბერს დაიწყება და ფესტივალის ფარგლებში ჩვენებები ხუთი დღის განმავლობაში გაგრძელდება. სტუმრად მისულ მაყურებელს საშუალება ექნება გაეცნოს ქართული და რუსული ანიამაციის ცნობილ ნამუშევრებსა და ასევე უკანასკნელ წლებში გადაღებულ ფილმებს.
კვირეული საქართველოს ანიმატორთა გილდიისა და რუსეთის ანიმაციური კინოს ასოციაციის მხარდაჭერით, საერთაშორისო კულტურულ-საგანმანათლებლო კავშირი “რუსული კლუბის“ მიერაა ორგანიზებული. პროექტი რუსი მულტიპლიკატორების ფიოდორ ჰიტრუკის და ვიაჩესლავ კოტიონიჩკინის იუბილეს ეძღვნება.
კვირეულის ფარგლებში ასევე გაიმართება ქართველი და რუსი ანიმატორების შეხვედრები მაყურებელთან. ასევე, მასტერ-კლასები სტუდენტებისთვის და ახალგაზრდა პროფესიონალებისთვის.
ანიმაციური კინოს კვირეულში მონაწილეობას მიიღებენ საერთაშორისო ფესტივალების ლაურეატი ანიმატორები: ივან მაქსიმოვი, ნინა ბისიარინა, ოქსანა ჩერკასოვა, იულია არონოვა და მულტფილმების დიდი ფესტივალის პროგრამინგის დირექტორი, კინოკრიტიკოსი დინა გოდერი.
კვირეულის პროგრამის საბოლოო სახე ასეთია:
24 სექტემბერი 18:30 – თბილისის მოსწავლე ახალგაზრდობის სასახლე (თეატრალური დარბაზი) – კვირეულის საზეიმო გახსნა;
25 სექტემბერი 19:00 – კავკასიური სახლი – ანიმაციის საღამო ქართველი და რუსი ანიმატორების მონაწილეობით
26, 27, 28 სექტემბერი 19:00 – კინოს სახლი – რუსი ანიმატორების შეხვედრა მაყურებელთან
28 სექტემბერი 11.00 – შ. რუსთაველის სახ. თეატრისა და კინოს საქართველოს სახელმწიფო უნივერსიტეტი ივან მაქსიმოვის მასტერ-კლასი და დინა გოდერის ლექცია
25, 26, 27 სექტემბერი 19:30-21:00 – „ახალი მზიური“ მულტიპლიკაციური ფილმების თავისუფალი ჩვენებები ღია ცის ქვეშ.
