შემოდგომა ოფიციალურად შევიდა ძალაში და გაბმული წვიმებიც დაიწყო, თუმცა ეს სულაც არაა ცუდი ამბავი. ეს ნიშნავს, რომ მეტი დრო შეგიძლიათ შინ გაატაროთ პლედთან, ცხელი ჩაის ფინჯანთან, მყუდრო განწყობასა და, რასაკვირველია, კარგ ფილმებთან ერთად, რომლებიც ამჯერად წვიმიანი დღეების შესაფერისი ხასიათისთვის არიან შერჩეულები. ხასიათი კი მრავალფეროვანი შეიძლება იყოს. შესაძლოა ნაცრისფერმა დღემ გულისამაჩუყებელ გუნებაზე დაგაყენათ, ან ნოსტალგიური რამის ნახვა გსურთ — მთავარია, ცუდ ამინდში შინ ჯდომა არ მოგბეზრდეთ.
დავიწყოთ ისეთი ფილმებით, რომელთა სცენებშიც წვიმა უშუალოდ მონაწილეობს:
1. უბის წიგნაკი (2004)
ფილმი, რომელშიც ასეთი დაუვიწყარი წვიმიანი სცენაა, არაფრით არ უნდა გამოტოვოთ, მით უმეტეს, თუ სასიყვარულო განწყობაზეც ხართ.
2. დანის პირზე მორბენალი (1982)
“მე ისეთი რამეები მინახავს, რასაც თქვენ, ადამიანები, ვერც დაიჯერებთ… ორიონის მხარზე ცეცხლის ხომალდების თავდასხმა, c-სხივები ტანჰოიზერის კარიბჭესთან ახლოს… და ყველა ეს მომენტი დროში დაიკარგება — როგორც ცრემლები წვიმაში”, — ამბობს რიდლი სკოტის ამ საკულტო ფილმის ერთ-ერთ ყველაზე შთამბეჭდავ სცენაში ანდროიდი როი ბეტი. ეს ფილმი ამ შემოდგომის აუცილებლად სანახავია და არამარტო ამ სცენის გამო — მალე ხომ მისი სიქველიც გამოდის.
3. წვიმის ქვეშ მომღერალი (1952)
მშვენიერი მუსიკა წვიმის ფონზე — კლასიკური მიუზიკლი ჯინ კელით მთავარ როლში, რომლის სიმღერას და ცეკვას დამატებით ეშხს მატებს შხაპუნა წვიმა და შედეგად — ერთ-ერთი ყველაზე მშვენიერი და ნათელი წვიმიან სცენა კინოისტორიაში. შეუძლებელია, თავადაც არ აჰყვეთ ბედნიერი პერსონაჟის ცეკვა-სიმღერას და წვიმაში უმიზეზოდ ხტუნვა არ მოგინდეთ.
4. საუზმე ტიფანისთან (1961)
ტრუმენ კეპოტის წიგნის ეკრანიზაცია მშვენიერი მუსიკით, ოდრი ჰებპერნითა და კატით. ეს რომანტიკული კლასიკური ფილმი სასიყვარულო განწყობის გარანტია.
5. მაგნოლია (1999)
ამ ემოციურ და სიმბოლოებით დატვირთულ დრამაში მარტოხელა, უბედური ადამიანების ცხოვრებაა ასახული. ანდერსონის ამ გენიალურ ფილმში ბოლო, გადამწყვეტი სცენა, რომელშიც ბაყაყების წვიმა მოდის, ფილმის ბიბლიურ სიმბოლიზმს აგვირგვინებს და დამატებით მიზეზს გვაძლევს ფიქრისთვის. თუ წვიმიან ამინდში გასართობად კი არა, ეგზისტენციალურ პრობლემებზე საფიქრელად ხართ მზად, ეს ფილმი თქვენთვისაა.
6. ყვავი (1994)
კრიმინალების ბანდის მიერ ახალგაზრდა როკგიტარისტის ერიკ დრეივენისა და მისი საცოლის სასტიკი მკვლელობიდან ზუსტად ერთი წლის შემდეგ დრეივენი ჰიპნოტური ყვავის მეთვალყურეობის ქვეშ სამარიდან ბრუნდება შურის საძიებლად. პირქუში და მისტიკური ფილმი საჰელოუინო განწყობას აგიმაღლებთ.
ახლა კი, ფილმები განწყობისთვის:
თუ რომანტიკულ ხასიათზე ხართ…
7. ბრიჯიტ ჯონსის დღიური (2001)
როცა რომანტიკული კომედიის ნახვა გსურს, ეს ფილმი ყოველთვის კარგი არჩევანია — გინდა პირველად უყურებდე და გინდა მეასედ. ლონდონური ცხოვრების მარილით შეზავებული ბრიჯიტის სასიყვარულო ისტორიები ერთდროულად გვაცინებს და გულსაც აგვიჩუყებს.
8. ფრთხილად, კარები იკეტება (1998)
ლონდონელი პუბლიცისტის ელენის ცხოვრება ალბათ სხვაგვარად წარიმართებოდა, მას რომ მატარებლისთვის კარის დაკეტვამდე მიესწრო ან ვერ მიესწრო. მომხიბლავი გვინეტ პელტროუ და საინტერესო კუთხით განვითარებული სიუჟეტი წვიმიან ამინდში სულაც არ მოგაწყენთ.
9. იმედის სხივთა კრებული (2012)
თბილზე თბილი ფილმი ორ ადამიანზე, რომლებიც პარტნიორების დაკარგვამ ფსიქოლოგიურად გაანადგურა. ფეთქებადი ხასიათის პეტი და ტიფანი დარბიან, კამათობენ, ცეკვავენ და იმედის სხივებს ეძებენ შავ ღრუბლებში.
10. სინაზე (2012)
რომანტიკული კომედია სიყვარულზე, ბედისწერასა და სხვა დელიკატურობებზე… პარიზელ ნატალის ბედნიერი ცხოვრება უეცრად ენგრევა თავზე. ქმრის გარდაცვალების შემდეგ მისი გულის მოგება შეუძლებელი ჩანს, მაგრამ მოულოდნელობას ხანდახან საკუთარი თავი გვიმზადებს.
ნოსტალგიური განწყობისთვის კი:
11. უკან მომავალში (1985)
შემოდგომისას, მით უმეტეს წვიმიან ამინდში, როცა განსაკუთრებით გამძაფრებულია ნოსტალგიური განწყობა, ბავშვობის პერიოდში დაბრუნება საუკეთესო გამოსავალია. უკან მომავალში სწორედ ის ტრილოგიაა, რომლის გადამეორებაც ზედმეტი არასდროსაა.
12. მისის დაუთფაიერი (1993)
ნოსტალგიურ-ღიმილიანი განწყობის გარანტია მოსიყვარულე მამის ისტორიაც, რომელიც ქარიზმატულ მისის დაუთფაიერად იქცევა იმის გამო, რომ შვილებთან ახლოს იყოს. ამ შესანიშნავი ფილმის ნახვა ოჯახთან ერთად არის რეკომენდებული.
13. დიდი ლებოვსკი (1998)
გენიალური ფილმი, რომლის ნახვაც შეუძლებელია მოგბეზრდეს, იუმორი, თვითირონია, უძლიერესი სამსახიობო ანსამბლი და სახალისო სიუჟეტი. ეს ის ფილმია, რომლის ნახვასაც ჭეშმარიტი მეგობარი ნამდვილად გირჩევდათ.
15. როკის საშინელებათა შოუ (1975)
ფანტასტიკური და უჩვეულო მიუზიკლი სამოცდაათიანებიდან. ახალდაქორწინებული წყვილი ბრედი და ჟანეტი ძლიერ წვიმაში მოყვებიან, მანქანა გაუფუჭდებათ და იძულებულნი არიან, ახლოს მდებარე სახლს შეაფარონ თავი. მდიდრული სასახლის მფლობელი ექიმი ფრენკ-ენ-ფურტერი ტრანსვესტიტია და სწორედ ამ დღეს დიდ წვეულებას აწყობს მეგობრებისათვის.
