ოსკარებზე ოთხგზის ნომინირებული ანეტ ბენინგი ვენეციის რიგით 74-ე კინოფესტივალის ჟიურის უხელმძღვანელებს და დაასრულებს მამაკაცი ჟიურის თავჯდომარეების 11-წლიან ერას ამ ფესტივალზე. “უკვე დრო იყო, მამაკაცი თავჯდომარეების ჰეგემონია საერთაშორისო ჟიურიში ამ ბრწყინვალე, ნიჭიერი და შემოქმედებითი ქალის მოწვევით დაგვესრულებინა”, – განაცხადა კინოფესტივალის სამხატვრო ხელმძღვანელმა ალბერტო ბარბერამ. მისი თქმით, ძალიან გაუხარდა, როცა მსახიობი შეთავაზებას დათანხმდა და თავის ნიჭს, ჰოლივუდსა თუ ევროპულ სცენაზე შეძენილ გამოცდილებას ფესტივალს მოახმარს. მან ასევე აღნიშნა, რომ ანეტ ბენინგის კარიერა ყოველთვის საინტერესო, ხშირად გამბედავი ნაბიჯებით გამოირჩევა.
ვენეციის კ/ფ-ის ჟიურის თავმჯდომარე ქალი ბოლოს 2006 წელს ფრანგი მსახიობი კატრინ დენევი იყო. ბენინგი კი მსოფლიოს ყველაზე ხანდაზმული კინოფესტივალის ისტორიაში მე-6 ქალი თავმჯდომარე იქნება დენევის, ჩინელი მსახიობის გონგ ლის (2002), ავსტრალიელი რეჟისორის ჯეინ კემპიონის (1997), ფრანგი მსახიობისა და რეჟისორის საბინ აზემასა (1987) და იტალიელი სცენარისტის, სუსო ჩეკი დ’ამიკოს (1980) შემდეგ.
ანეტ ბენინგი ამჟამად რამდენიმე ფილმზე მუშაობს, ესენია: ანტონ ჩეხოვის “თოლიის” მაიკლ მაიერისეული ადაპტაცია, პოლ მაკგინონის “კინოვარსკვლავები ლივერპულში არ კვდებიან” და დენ ფოგელმანის დრამა “ცხოვრება თავისთავად”. ასევე დატვირთული და წარმატებულია მსახიობის თეატრალური კარიერაც.
ვენეციის 74-ე კინოფესტივალი 30 აგვისტოს დაიწყება და 9 სექტემბრამდე გაგრძელდება. ფილმების სია კი 27 ივლისს გამოქვეყნდება.