ზუსტად 15 წელი გავიდა მას შემდეგ, რაც დიდ ეკრანებზე პოტერომანების ერთ-ერთი საყვარელი ეპიზოდი, ჰარი პოტერი და აზკაბანის ტყვე გამოვიდა. ჩვენ სწორედ ამ ფილმში შევხვდით პირველად სირიუს ბლექს, რემუს ლუპინს… და კიდევ ერთხელ ვიმოგზაურეთ ჰოგვორტსის ჯადოსნურ სამყაროში.
მაშ ასე, ერთად გავეცნოთ 10 საინტერესო ფაქტს ჰარი პოტერისა და აზკაბანის ტყვის შესახებ:
1. ალფონსო კუარონმა ჰარის, რონისა და ჰერმიონის როლების შემსრულებლებს სთხოვა საკუთარი პერსონაჟების შესახებ პირველ პირში მოთხრობილი ესეები დაეწერათ – ემა უოთსონი ამ დავალებას ჰერმიონივით მიუდგა და რეჟისორს 16 გვერდიანი ნაშრომი ჩააბარა, დენიელ რედკლიფი მხოლოდ 1 გვერდით შემოიფარგლა, რუპერტ გრინს კი, რონის მსგავსად, თავი საერთოდ არ შეუწუხებია.
2. ჰარი პოტერის პირველ ორ სერიაში ალბუს დამბლდორის როლს რიჩარდ ჰარისი ასრულებდა, რომელსაც მეორე ფილმზე მუშაობის დასრულების შემდეგ ჯანმრთელობის მძიმე დიაგნოზი დაუსვეს. მიუხედავად იმისა, რომ ძალიან სუსტად იყო, მსახიობს მაინც სურდა მონაწილეობა მიეღო “აზკაბანის ტყვის” ეპიზოდში, თუმცა, სამწუხაროდ, ის გადაღებების დაწყებამდე ცოტა ხნით ადრე გარდაიცვალა და ის მაიკლ გამბონმა ჩაანაცვლა.
3. “ღამის რაინდის” სცენების გადასაღებად შემდეგ ხერხს მიმართეს – ავტობუსი ქუჩებში ჩვეულებრივი სიჩქარით გადაადგილდებოდა, სხვა მანქანები კი ლოკოკინებივით დაღოღავდნენ. ეს ყოველივე კი ეკრანზე ისე გადმოიტანეს, თითქოს ავტობუსი ძალიან სწრაფად დადიოდა, დანარჩენები კი ნორმალურად მოძრაობდნენ.
4. ჯოან როულინგმა დემენტორების შექმნის ინსპირაცია საკუთარი დეპრესიის შედეგად მიიღო.
5. ალფონსო კუარონს სურდა, რომ ჰარის, რონსა და ჰერმიონს უფრო ხშირად ეტარებინათ ყოველდღიური ტანსაცმელი, ვიდრე ჰოგვორტსის უნიფორმები – რეჟისორი მიიჩნევდა, რომ ამ ფორმით პერსონაჟების ხასიათი უკეთ გამოიკვეთებოდა. მან ასევე ნება დართო სხვა მოსწავლეებს სკოლის ფორმა საკუთარ გემოზე მოერგოთ, რაც გულისხმობდა თუნდაც გვერდზე მოქცეულ ჰალსტუხს, არააკურატულად მოსხმულ მანტიას და ა.შ.
6. დადლის როლის შემსრულებელი, ჰარი მელინგი იმდენად გახდა, რომ მის როლზე კინაღამ სხვა მსახიობის ძებნა დაიწყეს. საბოლოოდ, მან ადგილი შეინარჩუნა, თუმცა, გადასაღებ მოედანზე სპეციალური კოსტუმის ტარება უწევდა, რომელიც მას უფრო მსუქანს აჩენდა.
7. ჰარი პოტერისა და აზკაბანის ტყვის გადასაღებ მოედანზე, ალან რიკმანი დამბლდორის როლის შემსრულებელს, მაიკლ გამბონსა და რეჟისორ ალფონსო კუარონს შეეკრა – ალბათ, გახსოვთ სცენა, როდესაც ჰოგვორტსის მოსწავლეები ღამეს საერთო დარბაზში ატარებენ. სწორედ ამ მომენტში, დენიელის საძილე ტომარაში სამეულმა სათამაშო გაზის ბალონი დამალა, რომელსაც დისტანციურად აკონტროლებდნენ – შესაბამისად, დენიელის მხრიდან ცოტა ხნის განმავლობაში საკმაოდ უხერხული ხმები ისმოდა:
8. სიმბოლოები ძებნილი სირიუს ბლექის პორტრეტიდან შემდეგნაირად ითარგმნება: “მეტ-ნაკლებად ადამიანი”
9. ფილმის დასაწყისში ჰარი კითხულობს გაზეთს, რომლის ერთ-ერთ გვერდზეც ჩვენ ვხედავთ უისლების ოჯახის ეგვიპტეში გადაღებულ ფოტოს – წიგნის მიხედვით, სწორედ ამ ფოტოდან იცნო სირიუს ბლექმა ვირთხად ქცეული პიტერ პეტიგრიუ და ამის შემდეგ გადაწყვიტა აზკაბანიდან გაქცევა, ჰოგვორტსში შეღწევა და შურისძიება.
10. როდესაც ონავართა რუკას პირველად ვხედავთ, შეგვიძლია იქვე ნიტ სკამანდერის სახელიც ამოვიკითხოთ. ჰარი პოტერის სამყაროში მან დაწერა წიგნი “ჯადოსნური არსებები და როგორ მოვაშინაუროთ ისინი”, თუმცა ჰოგვორტსის მასწავლებელი იმ დროში ნამდვილად აღარ არის.
