სამეფო კარის თამაშების მე-8 სეზონის მე-4 ეპიზოდი “უკანასკნელი სტარკები”, რომელმაც წინა სერიის მსგავსად, ჯერჯერობით როგორც ფანების, ისე კრიტიკოსების მხრიდან არც ისე დამაკმაყოფილებელი შეფასებები მიიღო, მორიგი ბრძოლისა და დაპირისპირების ერთგვარი შემზადება აღმოჩნდა. ვინტერფელის ომის შემდეგ მოვლენები სწრაფად განვითარდა, რის გამოც შეიძლება ყურადღების მიღმა დაგრჩათ დეტალები, რომლებიც სერიაში განგებ ან შემთხვევით მოხვდა.
კიდევ ერთხელ, ამ კუთხით დავაკვირდეთ ეპიზოდს და გავიგოთ, რა დეტალები ეხმაურება წარსულს და რა მიგვანიშნებს მომავალზე.
1. ინტროს გამოსახულება კვლავ შეიცვალა და მასზე ნახევრად დანგრეულ ვინტერფელს, ხოლო ბრძოლის ველზე გარდაცვლილთა გორაკებს ვხედავთ (რომლებიც შემდგომ დაწვეს).
2. ჯონ სნოუს გამოსამშვიდობებელი სიტყვა ღამის გუშაგის ალყის დასრულების შემდეგ წარმოთქმული სიტყვების პერიფრაზი იყო.
ჯონის სიტყვები ძალიან ჰგავდა მაისტერ ეიმონის გამოსამშვიდობებელ სიტყვას, რომელიც მან შავი ციხის ალყისას დაღუპულების გამოსამშვიდობებლად წარმოთქვა: “ყოველი ჩვენგანი მათთან ვალში ვართ, რომელსაც ვერასდროს გადავიხდით. ჩვენი მოვალეობა და პატივია, მათი სახელები მოგონებებში ვაცოცხლოთ და გადავცეთ მათ, ვინც ჩვენ შემდეგ მოვა, მათ კი – თავიანთ შთამომავლებს, იმ დრომდე, სანამ კაცობრიობას სული არ ამოხდება. ისინი ადამიანთა სამეფოს ფარები იყვნენ. ასეთებს მათ ვეღარასდროს ვნახავთ.” – ეს იყო ჯონის სიტყვები.
ხოლო მაისტერმა ეიმონმა მე-4 სეზონის უკანასკნელ სერიაში “The Children” შემდეგი წარმოთქვა: “ისინი დაცვისას მოკვდნენ – კაცები, ქალები და ბავშვები, რომელთა სახელებსაც ვეღარასდროს გავიგებთ. ჩვენი ვალია, გვახსოვდეს და მოვიგონოთ ისინი , როგორც ჩვენი ღვიძლი ძმები. ასეთებს მათ ვეღარასდროს ვნახავთ.”
3. დენერისის ახალი კაბა, რომელიც ვინტერფელის ომში გამარჯვების შემდეგ ეცვა, ტარგარიენების საგვარეულო ფერებში – შავსა და წითელშია.
4. შეიძლება ეს გარკვეულწილად დენერისის სამომავლო ქმედებებზე მიგვანიშნებდეს – ამ ფერებში გამოწყობილი ტარგარიენები საკუთარი ძალაუფლების დამტკიცებას და ტარგარიენების მრისხანების წარმოჩენას ცდილობენ.
5. ბრანმა ტირიონთან საუბრისას დეირონ ტარგარიენი ახსენა – ჯონ სნოუს წინაპარი, რომელიც წიგნში სნოუს საყვარელი ისტორიული პიროვნებაა.
ბრანის მიერ ნახსენები დეირონ ტარგარიენი, რომელიც ჯონის ერთ-ერთი წინაპარი გამოდის, ვესტეროსის მეფე თინეიჯერულ ასაკში გახდა. ის პირველი წიგნის დასაწყისშია ნახსენები, როცა ვინტერფელის დარბაზში ჯონი ძია ბენჯენს ესაუბრება. სნოუს აზრით, დეირონი სულაც არ იყო მეფობისთვის ძალიან ახალგაზრდა, რადგან იგი “სულ რაღაც 14 წლის იყო, როცა დორნი დაიპყრო”. ბენჯენი აღნიშნავს, რომ ის ასევე ახალგაზრდა, 18 წლის ასაკში მოკლეს, რაც შეიძლება მინიშნებაა ჯონის მკვლელობაზე ღამის გუშაგის ძმების მიერ. თუმცა, არავინ იცის, შეიძლება სერიალში დეირონის ხსენებით ახლა უკვე სხვა, თუმცა მსგავს ბედზე მიგვანიშნებდნენ.
6. მე-4 სერიაში სამეფო კარის თამაშების შოურანერების – დევიდ ბენიოფისა და დ. ბ. ვაისის კამეო ვიხილეთ.
სანამ მსოფლიო ვინტერფელის დარბაზში ლხინისას დენერისის წინ მაგიდაზე კადრში ჩარჩენილ ყავის ჭიქაზე იცინოდა, ბევრს გამორჩა შოუს შემქმნელების კამეო. შოურანერები ეპიზოდის იმ მონაკვეთში ჩნდებიან, როცა ტორმუნდი ჯონ სნოუს ეხუმრება, ველურებად გამოწყობილი ბენიოფი და ვაისი მათ ღიმილით შესცქერიან.
7. ეს კი ალბათ უკვე ყველაზე ცნობილი ჭიქა მსოფლიოში:
რომელიც, ცნობისთვის, შეცდომითვე ეგონათ “სტარბაქსის” ფირმის. HBO-ს განცხადებით, ის არა ლატეს, არამედ მცენარეული ჩაის ერთჯერადი ჭიქა აღმოჩნდა.
8. პოდრიკ პეინმა კიდევ ერთხელ დაამტკიცა, რომ ქალების რჩეულია.
9. არიამ გენდრის იგივე სიტყვები უთხრა, რაც მამამისს, ნედ სტარკს პირველ სეზონში.
როცა გენდრიმ არიას სთხოვა, ცოლად გაჰყოლოდა და გრიგალის კიდის ლედი გამხდარიყო, არიამ უპასუხა: “მე ლედი არ ვარ. არც არასდროს ვყოფილვარ. ეს მე არ ვარ.”
სწორედ ასე ფიქრობდა არია თავიდანვე – ჯერ კიდევ მაშინ, სანამ მამა ცოცხალი ჰყავდა და ვინტერფელის პატარა ლედიდ ითვლებოდა.
“დიდ ლორდზე დაქორწინდები და მისი ციხესიმაგრის მმართველი გახდები”, – უთხრა ნედმა არიას, – “შენი ვაჟები კი რაინდები, პრინცები და ლორდები იქნებიან.”
“არა”, – უპასუხა არიამ, – “ეს მე არ ვარ.”
11. ასევე, ამ სიტყვების პერიფრაზი იყო არიას მიერ ნიმერიასთან მოულოდნელი შეხვედრისას ნათქვამი: “ეს შენ არ ხარ”
არიას ეს სიტყვები პირდაპირ არ უნდა გავიგოთ – ნათქვამმა იმ ფაქტს გაუსვა ხაზი, რომ ნიმერია ბოლომდე ვერ “მოშინაურდა”, უარი თქვა ძველ პატრონს დაბრუნებოდა, ისევე როგორც არიამ თქვა უარი თავის სტატუსზე.
12. აქვე შეიძლება სიმბოლური იყოს ჯონის უყურადღებობა მისი ერთგული ლანდის მიმართ – მასზე უარის თქმით და ჩრდილოეთში გაგზავნით ჯონმა გარკვეულწილად უარი თქვა სტარკობაზე.
ეს ფაქტი შეიძლება ჯონის მომავალზე მორიგი მინიშნება იყოს – იგი ან დაიღუპება, ან ჩრდილოეთში დაბრუნდება.
