საწყის სეზონებში ტყის შვილები რამდენჯერმე ახსენეს და მიივიწყეს, მაგრამ რაც ბრან სტარკი ჩრდილოეთით გაემგზავრა, ჭვრეტის ნიჭი რომ განევითარებინა, ტყის შვილები კვლავ გამოჩნდნენ და როგორც ჩანს, მათ მნიშვნელოვანი ფუნქციაც აქვთ. ვინ არიან ისინი? ხეში ჩამწყვდეული სულები? ადამიანებზე ამოზრდილი ხეები? ელფები? თუ უხსოვარი დროის ჯუმანჯიში ვართ?
საქმე ისაა, რომ ტყის შვილები ვესტეროსის ისტორიაში ყოველთვის მნიშვნელოვან როლს თამაშობდნენ, განსაკუთრებით ჩრდილოეთში, სადაც ძველ ღმერთებს სცემენ თაყვანს.
არიან თუ არა ტყის შვილები ადამიანები?
არა, მაგრამ ადამიანის მსგავსი არსებები არიან – ბავშების მსგავსი მწვანე არსებები, რომლებსაც სხეულზე და თმაზე ფოთლები აქვთ ამოზრდილი (სხვათა შორის, ტყის შვილების კოსტიუმი საჰელოუინოდ ძალიან ჰიტური იქნება).
საიდან არიან?
ცხადია ვესტეროსიდან! ტყის შვილები ვესტეროსის მკვიდრებს წარმოადგენენ, რომლებიც იქ უხსოვარი დროიდან ცხოვრობენ, პირველ კაცთა გამოჩენამდე, სატახტოთა თამაშების მოვლენებამდე 12,000 წლით ადრე. მათ მთელ ვესტეროსში დარგული გულის საღვთო ხეებით შეეძლოთ ყველა მოვლენის ჭვრეტა.
როგორი ურთიერთობა ჰქონდათ ტყის შვილებს და პირველ ადამიანებს?
თქვენ წარმოიდგინეთ, არამეგობრული. თავდაპირველად ნორმალურად თანაცხოვრობდნენ, მაგრამ როგორც ადამიანებს სჩვევიათ, პირველკაცებმა ტყის შვილების საცხოვრებელი ადგილის – საღვთო ხეების თანდათანობითი ჩეხვა დაიწყეს და მათ შორის ათასწლიანი ომი გაჩაღდა, რომელიც ბოლოს შერიგებით დასრულდა. სწორედ ამ დროს აზიარეს ტყის შვილებმა პირველი ადამიანები თავიანთ, ძველი ღმერთების რელიგიას, რომელსაც ჩრდილოეთი მუდამ აღიარებდა.
რა საერთო აქვთ თეთრ მავალებთან ტყის შვილებს?
მე-6 სეზონში ვნახეთ, რომ ოდესღაც ტყის შვილებმა შექმნეს თეთრი მავალები პირველ ადამიანებთან საბრძოლველად, მაგრამ მას მერე, რაც ადამიანებთან მშვიდობა დაამყარეს, თეთრი მავალები მათი კონტროლიდან გამოვიდნენ და მთელ ჩრდილოეთს მოედნენ. სწორედ ამიტომ ბრან მშენებელმა – სტარკების სახლის დამფუძნებელმა – ჯადოსნობის დახმარებით კედელი ააგო და თეთრ მავალებს სამხრეთისკენ გზა მოუჭრა.
რას აკეთებდნენ ტყის შვილები მთელი ამ დროის განმავლობაში?
ისინი სხვა ომში ჩაებნენ. სწორედ ამ პერიოდში ვესტეროსში ვიწრო ზღვის გაღმელი ანდალები მოვიდნენ. პირველ ადამიანებთან ერთად სწორედ ანდალებია ვესტეროსის წამყვანი ეთნიკური ჯგუფი (ამიტომაც უწოდებენ დენერისი და სერსეი თავიანთ თავს ანდალებისა და პირველი ადამიანების დედოფლებად). ანდალებმა დაიპყრეს პირველი ადამიანები და ტყის შვილების უმეტესობა დახოცეს, დანარჩენები კი ჩრდილოეთის მხარეში გაუჩინარდნენ. სამეფო კარის თამაშების პერიოდში ადამიანებს სჯერათ, რომ ტყის შვილები ამოწყდნენ, ან კედლის მიღმა ჯერ კიდევ არიან შემორჩენილნი.
რა შეუძლიათ ტყის შვილებს?
მათ ჯადოსნობა ეხერხებათ. შეუძლიათ ცხოველების კონტროლი და არიან მწვანე მხედველები ანუ წარსულისა და მომავალის ჭვრეტის უნარი და კიდევ სხვა უცნაური ხილვები აქვთ. ისინი ასევე ფლობენ ობსიდიანის (იგივე დრაკონის მინის) იარაღების საიდუმლოს, რომელთა მეშვებითაც შექმნეს თეთრი მავალები და ამავე იარაღით შეიძლება მათი განადგურება.
რა როლი დაეკისრებათ მათ ახალ სეზონებში?
ტყის შვილები თეთრი არმიის შემოტევისას იცავდნენ ბრანს, რომელიც მწვანე ხედვის გამოყენებას სწავლობდა. ამის წყალობით ბრანმა აღმოაჩინა თეთრი მავალების შექმნის საიდუმლო. უძველეს გულის ხეებში მცხოვრები ტყის შვილები, ისევე როგორც მოხუცი სამთვალა ყორანი, მავალების შემოტევისას დაიღუპნენ (მათ შორის, ბრანის მგელსაზარა ზაფხულიც). მეშვიდე სეზონში კი მათი კვალი დრაკონის ქვის გამოქვაბულის კედლებზე ჯონ სნოუმ აღმოაჩინა. მალე ტყის შვილებსა და თეთრ მავალებს შორის მაგიური კავშირი ყველასთვის ცნობილი გახდება და ყინულოვან არმიასთან გამკლავების საიდუმლოც გამოაშკარავდება (ყოველ შემთხვევაში, ჩრდილოელებისთვის მაინც).
