შინიდან სხვადასხვა მიზეზით გადაკარგულ სტარკის შვილებს ცხოვრებამ მწარე გაკვეთილები ასწავლა და მათი უღრუბლო ბავშობიდან აღარაფერი დატოვა. სანსამ მეფის საბიჯელიდან ვინტერფელამდე ძალადობით, დამცირებითა და სასიკვდილო საფრთხეებით სავსე გზა გამოიარა, არიას სამშობლოს დატოვებაც მოუწია, მკვლელობის ხელოვნება რომ შეესწავლა და ყველაზე შური ეძია. მაგრამ რაც უნდა იყოს, არია და სანსა სტარკები არიან და ამის ცოდნამ გააძლებინა მათ ამდენ ხანს. ბრანის ბედი მათგან სრულიად განსხვავებულია. გავიხსენოთ მირას სიტყვები მე-4 ეპიზოდში – “ის ბრანი აღარაა”. მას ახსოვს, როგორია იყო ბრანდონ სტარკი, მაგრამ ეს მის უამრავ მოგონებათა შორის მხოლოდ ერთი მცირე ნაწილია. მირას ნათქვამისგან განსხვავებით, ის ტყის შვილების გამოქვაბულში არ მომკვდარა, უბრალოდ იმდენი ინფორმაცია მიიღო მას შემდეგ, რაც მესამე თვალი გაეხსნა, მის ტვინში ადგილი აღარაა ვინტერფელის ლორდობისთვის.
ფანებმა წინა სეზონში გამოთქვეს მოსაზრება, რომ ბრანი ის მხცოვანი სამთვალა ყორანია, რომლის როლიც მაქს ფონ სიუდოვმა შეასრულა; თუმცა ასე შორს წასვლა ალბათ არ ღირს: სამთვალა ყორნობა წარსულისა და მომავლის ჭვრეტის ისეთი ნიჭია, რომელიც თაობებს გადაეცემა, ბრანი კი ამ მემკვიდრეობის მატარებელი ყველაზე შესაფერისი აზროვნების ახალგაზრდა აღმოჩნდა (წიგნში სამთვალა ყვავს “მწვანე მხედველსაც” უწოდებენ, რადგან მათ ჭვრეტის უნარს ბუნება ანიჭებთ სანთლის ხის დახმარებით). ბებერ ყვავთან ბრანის ვიზიტის შემდეგ მისი დანახული მოვლენები ბრანის მეხსიერებაში “ჩაიტვირთა”.
სამთვალა ყორნების ხილვები განსაკუთრებით ძლიერია მაშინ, როცა მოვლენები სახეამოტვიფრული საღვთო ხეების მიმდებარედ მხდებოდა (რის გამოც კონტინეტიდან მოსულმა ადამიანებმა ხეები მთელ ვესტეროსში გაჩეხეს, ტყის შვილებთან ბრძოლა რომ გაადვილებოდათ და მსგავსი ხეები მრავლად მხოლოდ ჩრდილოეთში დარჩა). სანსას საქორწინო ღამე ვინტერფელში შედგა, სტარკების მამულში კი უზარმაზარი საღვთო ხე დგას. მაგრამ ბრანის ხილვები ხეებს სცდება – წინა სეზონში მან დაინახა სიხარულის კოშკში განვითარებული მოვლენები, ახალ ეპიზოდში კი ვნახეთ, რომ იცის, როგორ გაჩერდა არია სასტუმროში და რა გეგმები აქვს მას, ნეკას პირში მიახალა ვარისისთვის ოდესღაც ნათქვამი მისივე სიტყვები “ქაოსი კიბეა” და კიდევ მრავალი რამ, რომლებსაც ალბათ ამ სეზონში შევიტყობთ.
ბრანის შინ დაბრუნება ყველასთვის უხერხულობის მომტანი აღმოჩნდა. სანსასთვის მტკივნეული ამბის გახსნების შემდეგ ერთგული თანამგზავრი მირა რიდიც გაანაწყენა, მაგრამ ბრანი გაცილებით მეტს ხედავს, ვიდრე თვალით ჩანს და ეს ადამიანის ტვინისთვის ადვილი გადასახარში არაა. თქვენ რომ საუკუნეთა მანძილზე მომხდარ მოვლენებს ხედავდეთ და ბონუსად მომავალში მოსახდენსაც, ისეთ წვრილმანზე დასაფიქრებლად, როგორიც კარგი მანერებია, დრო არ დაგრჩებოდათ.
