მსოფლიო ბესტსელერის ავტორი საკუთარი ნაწარმოების ახალ ნაწილზე და სერიალზე საუბრობს
“ყინულისა და ცეცხლის სიმღერის” ავტორის, ჯ. რ. რ. მარტინის თქმით, წერისა და ტურნეების გამო იმდენად მოუცლელია, რომ საკუთარი ნაწარმოების მიხედვით გადაღებული ტელეშოუს ცქერის დრო არ აქვს. ბოლოდროინდელ ინტერვიუში ავტორმა წიგნის მორიგი ნაწილის “ზამთრის ქარების” დაგვიანების შესახებ და “სამეფო კარის თამაშებსა” და მის პირველწყაროს შორის რამდენიმე განსხვავებაზე ისაუბრა.
“წიგნი და მისი ტელეადაპტაცია სხვადასხვა გზით განვითარდება, – განაცხადა მარტინმა, – ეკრანზე, საითაც გაიხედავ, პერსონაჟები იხოცებიან, უკვე ოცამდე ისეთი პერსონაჟი მოკვდა, რომლებიც წიგნში ცოცხლები არიან და ახალ ნაწილშიც იქნებიან”.
შოუს შემქმნელებმა მე-6 სეზონში სამი ასეთი პერსონაჟის სიკვდილი შემოგვთავაზეს: სტანის ბარათეონის, მისი ქალიშვილი შირინისა და ყველასთვის საყვარელი ჰოდორის. “მკითხველებისთვის, ცხადია, სიურპრიზი იქნება სერიალში გარდაცვლილი გმირების აღმოჩენა, – განაცხადა დევიდ ბენიოფმა, – ჩვენი აზრით, მათი განსხვავებული ბედი სერიალის ინტერესებისთვის საჭირო იყო”.
მარტინმა იმაზეც ისაუბრა, თუ რატომ სჭირდება ამდენი ხანი “ყინულისა და ცეცხლის სიმღერის” მეექვსე წიგნის ბოლომდე მისაყვანად. “მთელი ამ დროის განმავლობაში ჩემი წერის ტემპი არ შენელებულა, პირველ წიგნზე ექვსი წელი ვმუშაობდი, მეორეზე ოთხი დამჭირდა. შეუძლებელია ფანტასტმა მწერალმა ყოველ წელს გამოსცეს სქელტანიანი ნაწარმოები. გარდა ამისა, სამწუხაროდ, არ ვახალგაზრდავდები და ენერგიაც ნაკლები მაქვს” – განმარტა ავტორმა.
