ავტორი: ციკო ინაური
ბავშვობაში ყველას გვიფიქრია, რომ ჭინკები ნამდვილად არსებობენ. ტყეში ყოფნის დროს შეგვშინებია “ალი ქალის”, რომელიც ლეგენდის თანახმად, წყალთან მოდის და კაცებს გონებას აკარგვინებს. ბევრჯერ მოგვისმენია ისტორია, რომ “ალი ქალის” გამო უამრავი ადამიანი გადავარდა ხიდიდან და გარდაიცვალა. ეს ლეგენდები საშიშია, თუმცა ადამიანები ბავშვობიდან ვეტრფით ლეგენდებს და ნიშნებს. გვინდა, გვჯეროდეს, რომ ჩვენი კბილი ფერიას მიაქვს, რომ თოვლის ბაბუა საჩუქრებს გვიტოვებს და რომ ტყეში ბოდიალისას “ალი ქალს”, ან ჭინკას შევხვდებით. ჩვენ ბავშობიდან ვეთაყვანებით ამოუხსნელ მოვლენებს და გვსურს, რომ ამ მოვლენების ნაწილი გავხდეთ. როცა ვიზრდებით, ეს ყველაფერი გვავიწყდება და ზედმეტად რეალისტები ვხდებით, აღარ ვოცნებობთ, აღარ გვჯერა შთამბეჭდავი მოგზაურობების და მოუთოკავი სიყვარულის. უბრალოდ, ამას, ცნობიერად თუ არაცნობიერად, ბავშვობაში ვტოვებთ.
მიუხედავად ამისა, ჩვენში მაინც სძინავს იმ მეოცნებე და დაუჯერებელი თავგადასავლების წყურვილით შეპყრობილ ბავშვს, რომელიც ზოგჯერ კვლავ ზედაპირზე ამოდის -კვლავ მეოცნებე, მოუთოკავი სიყვარულის მოტრფიალე ბავშვად გადაიქცევა. პირადად მე სწორედ ასეთ ბავშვად მაქცია სერიალის უცხოელი დაძაბულმა, ლეგენდებით სავსე, მოუთოკავი სიყვარულის, საოცარი კადრების, შთამბეჭდავი მუსიკის და შეგრძნებების ორმა სეზონმა.
სერიალი ძველ შოტლანდიურ ლეგენდას ეფუძნება, რომლის მიხედვითაც შოტლანდიის მისტიურ ქვებთან მიახლოებისას ადამიანი სხვა დროში გადაინაცვლებს. სწორედ ეს ემართება კლერ რენდალს. ისტორიის მოყვარული, აღფრთოვანებული ათვალიერებს შოტლანდიის ძველებურ კოშკებს და ქვებთან მიახლოებისას მართლაც დროში მოგზაური ხდება. ის 1945 წლიდან 1743 წელში ინაცვლებს და შოტლანდიელი მეომრის, ჯეიმი ფრეიზერის შეყვარებული ხდება.
ეს გახლავთ საოცარი სიყვარულის ისტორია, მოგზაურობა წარსულში, რომელიც ისეთია, რომ ადამიანს მომავალში დაბრუნება აღარ უნდება. ჩვენ ვუყურებთ ომს, ჩაგვრას, ძალადობას. გვეტირება, გვეცინება, ზოგჯერ იმდენად მძიმე სცენებს ვხედავთ, რომ სერიალის შეწყვეტა გვინდება, მაგრამ საბოლოო ჯამში, გვიჩნდება ერთი დიდი, და ალბათ ყველაზე მნიშვნელოვანი შეგრძნება, – ვიჯერებთ წარმოუდგენელ სიყვარულს, რომელიც იმდენად მძაფრადაა აღწერილი, რომ თითქოს მას თავადაც შევიგრძნობთ. მეორე სეზონი საკმაოდ დამთრგუნველად დასრულდა. გამოუვალი მდგომარეობის გამო, კლერმა ჯეიმი დატოვა და ქვების გავლით, ჯეიმისგან ორსული, ისევ თავის დროში, ფრენკთან დაბრუნდა.
მესამე სეზონი, რომელიც ათ სექტემბერს დაიწყო, – მათი განშორების და ერთმანეთის გარეშე ცხოვრების ისტორიაა; ბავშვის, რომელიც რამდენიმე საუკუნის წინ გარდაცვლილი ჯეიმის შვილია. დარწმუნებული ვარ, რომ მესამე სეზონიც არანაკლები ემოციებით სავსე, ლეგენდებით გაჯერებული და შთამბეჭდავი იქნება. ასე რომ, თუ მეოცნებე ხართ, გჯერათ, რომ გადარეული სიყვარული არსებობს, ან უბრალოდ, გსურთ, გწამდეთ, რომ ამ სამყაროში ყველაფერი შესაძლებელია, უყურეთ უცხოელის მესამე სეზონს, რომელიც თქვენში გაუწონასწორებელ ემოციებს და დაუჯერებელ შეგრძნებებს გააღვიძებს. რაც მთავრია, დარწმუნდებით, რომ სრულიად უანგარო, ლოგიკას მოკლებული და წარმოუდგენელი სიყვარული შეიძლება თქვენც გეწვიოთ.
უყურე სერიალს აქ!
