დიდად განსხვავდებით 20 ან 30 წლის კერი ვაშინგტონისგან?
განსხვავებებზე რა მოგახსენოთ, მაგრამ ვიტყოდი, რომ წლების მატებასთან ერთად, ცხოვრება უფრო და უფრო უკეთესი ხდება. ჩემთვის ეს ასაკი ყველაფრის თავიდან დაწყებასთან ასოცირდება. იმდენი სიახლეა ჩემ გარშემო – თუნდაც ოჯახის, შვილების ან კარიერის კუთხით, რომ ძალიან მომწონს ჩემი თავი ახლა და ვფიქრობ, ახალი აღმოჩენებისთვისაც საუკეთესო პერიოდია.
თუ იყო თქვენს კარიერაში ისეთი პროექტი ან როლი, რომელმაც თქვენზე დიდი გავლენა მოახდინა და გარკვეულწილად შეგცვალათ კიდეც?
ალბათ, არავინ დამიჯერებს, თუ ვიტყვი, რომ ოლივია პოუპის (სერიალი – სკანდალი) პერსონაჟს ჩემზე არავითარი გავლენა არ აქვს. ეს იყო ტრანსფორმაციებით სავსე პერსონაჟი. ასე დიდხანს არცერთი როლი არ მითამაშია. ყველაფერთან ერთად, ოლივია პოუპმა ჩემი სიმშვიდეც შეიწირა. სკანდალამდე არავინ მიცნობდა და საჯარო სივრცეში ზედმეტი ყურადღების გარეშე გამოჩენაც შემეძლო. ამ სერიალმა და ჩემმა პერსონაჟმა კი, ჩემი ცხოვრების სტილი რადიკალურად შეცვალა.
ოლივია პოუპის პერსონაჟს კიდევ დიდხანს ითამაშებდით?
ეს ჩემზე არ არის დამოკიდებული. ეს შონდა რაიმსის (სკანდალის შემქნელი) და პროექტის მესვეურების გადასაწყვეტია. დასაწყისში შონდამ მითხრა, რომ დაახლოებით იცის, როგორ დაამთავრებს სკანდალს. მე მას ბოლომდე ვენდობი და მაქსიმალურ კომფორტს შევუქმნი. რა თქმა უნდა, ჩემთვის მნიშვნელოვანია, რომ სხვა საქმეც ვაკეთო. მითუმეტეს, სწორედ ოლივიას პერსონაჟმა მომცა შესაძლებლობა, ახალი საქმიანობა შემესწავლა და პროდიუსერი გავმხდარიყავი. ჩემი საპროდიუსერო კომპანიის – Simpson Street-ის მთავარი ამოცანაა, მოყვეს ისეთ ამბებზე, სიტუაციებსა და ადამიანებზე, რომლებიც დღესდღეობით სულაც არ არის მეინსტრიმული. ჩვენ გვინდა, შევქმნათ სამყარო, სადაც ყველას თანაბრად გვექნება ჩვენი სათქმელის გაზიარების შესაძლებლობა. როგორც პროდიუსერი, მზად ვარ ახალი გამოცდილებისა და თავგადასავლებისთვის.
წინა თაობის მსახიობებიდან ვინ არის თქვენთვის ყველაზე გამორჩეული და ყველაზე მეტად ვისი არტისტიზმი აღგაფრთოვანებთ?
ჯეინ ფონდა, სისლი ტაისონი, დაიან კეროლი (Diahann Carroll) – ჩემთვის ეს ქალები არიან საუკეთესონი. მათ რომ ვუყურებდი, ვხვდებოდი, რა მიმართულებით უნდა წავსულიყავი. მათ ხელოვნებისა და ღირებულებების გაერთიანება მოახერხეს. მე კი, მათი შემხედვარე, ვფიქრობდი, რომ ჩემი თავისა და ჩემი პროფესიისთვის მეც შემეძლო იმავეს გაკეთება.
რას გულისხმობთ ხელოვნებისა და ღირებულებების გაერთიანებაში?
როგორც წესი, საზოგადოება გარკვეულ მიმართულებებს გვაძლევს და ჩვენ ყველანი ამ გზას მივყვებით. ხოლო როდესაც ხელოვანი ახერხებს, ყველას, საზოგადოების თითოეულ წევრს მიაწვდინოს ხმა და უთხრას, რომ მისი პერსონალური ისტორიაც მნიშვნელოვანია, ეს უკვე აქტივიზმია. მაგალითად, სისლი ტაისონმა არ დათმო და ტელევიზიაში თავისი ბუნებრივი ვარცხნილობით გამოჩნდა, მიუხედავად იმისა, რომ მაშინ შავკანიან ქალებზე ასეთი სტრუქტურის თმა არავის მოსწონდა და გარკვეულწილად მიუღებლადაც ითვლებოდა. თუმცა, მან მოახერხა, ეს მეინსტრიმულიც კი გაეხადა. ხშირად ხელოვნება გონებას უხსნის როგორც ინდივიდებს, ისე საზოგადოებას.
ასეთ დროში, როდესაც პირადი სივრცე თანდათან პატარავდება, როგორ ზრუნავთ საკუთარ თავზე და რა განიჭებთ სიამოვნებას?
ჩემთვის დიდი სიამოვნებაა ოჯახთან და მეგობრებთან ერთად დროის გატარება. ამ სიყვარულის მისაღებად ყოველთვის მზად ვარ. რაც შეეხება საკუთარ თავზე ზრუნვას, ძირითადად იმას ვაქცევ ყურადღებას, საკმარისად თუ მძინავს, ჯანსაღად თუ ვიკვებები, ჩემი ვიწრო ჯინსი თუ ჩამეტევა და ა.შ. (იცინის)
წყარო: https://www.glamour.com
მოამზადა ნინო დოლიაშვილმა
