ავტორი: ციკო ინაური
“ცხოვრება მშვენიერია?” – ეს არის კითხვა, რომელსაც ადამიანები ძალიან ხშირად ვუსვამთ საკუთარ თავს, განსაკუთრებით მაშინ, როდესაც რაიმე მნიშვნელოვანი ხდება. სწორედ ეს კითხვა გასდევს ლაიტმოტივად ფრენკ კაპრას ერთ-ერთ ყველაზე პოპულარულ საახალწლო ტრაგიკომედიას – ეს მშვენიერი ცხოვრება. ოქროს გლობუსის მფლობელი ფილმი ჟურნალმა Rolling Stone-მა და Time-მა ყველა დროის საუკეთესო საახალწლო ფილმების სიაში წამყვან პოზიციებზე დაასახელა. ფილმი მოგვითხრობს ისტორიას ჯორჯ ბეილიზე, რომელიც ფინანსური გაჭირვების გამო, ახალი წლის ღამეს თავის მოკვლას გეგმავს. მის გადარჩენას კი უფრთო ანგელოზი და მთელი ქალაქი ერთობლივად ახერხებს.
ეს მშვენიერი ცხოვრება ტყუილად არ მიიჩნევა საახალწლო ფილმების კლასიკად. მასში ნათლადაა წარმოჩენილი ადამიანის ყოფის სიმძიმე და დღესასწაული, რომელიც საბოლოოდ ყველას აერთიანებს. მთავარი გმირის ტრაგედია ზოგჯერ კომიკურადაა ნაჩვენები. ის მოსიყვარულე, მზრუნველი მამაა, რომელიც საკუთარ უბედურებაში ერთადერთ გამოსავლად სუიციდს მიიჩნევს. ზუსტად ამ დროს კი ჩნდება ანგელოზი, რომელსაც ღმერთი ადამიანის, კერძოდ ჯორჯ ბეილის გადარჩენისთვის ფრთებით ასაჩუქრებს. მართლაც კომიკური არ არის? თვითმკვლელობის იდეით შეპყრობილი ოჯახის კაცი, რომელსაც გადაუწყვეტია, შვილებს მამა სწორედ რომ მათ საყვარელ დღესასწაულზე წაართვას, და ამის პარალელურად – ანგელოზი, რომელსაც ფრთები არ აქვს და მათ დაბრუნებას მხოლოდ ამ კაცის გადარჩენით ახერხებს…
კაპრას ყველაზე პოპულარულ ფილმს, რომელშიც მთავარ როლს იმ დროისთვის ასევე ძალიან პოპულარული მსახიობი – ჯეიმზ სტიუარტი ასრულებს, სხვა საახალწლო ფილმებისგან ერთი მნიშვნელოვანი რამ გამოარჩევს: საოცარი მუსიკის (მუსიკის ავტორი: დიმიტრი ტიომკინი), თოვლიანი სცენების, საახალწლო განწყობისა და ულამაზესი დეკორაციების ფონზე, ის ადამიანების რეალურ ცხოვრებას და შეგრძნებებს ასახავს. ვინ ვართ? რატომ ვართ? როგორები გვინდა, ვიყოთ და მოგვწონს თუ არა ჩვენი ცხოვრება? ამ კითხვებზე პასუხის გაცემას კი კაპრა ძალიან ირონიულად, და ამასთანავე, – ადამიანურად, უფრთო ანგელოზის ბრძოლით და პატარა ქალაქის მოსიყვარულე მოსახლეობის ქმედებით ახერხებს.
ჯორჯ ბეილის ისტორია მართლაც რომ კლასიკაა. ასე რომ, თუ გიყვართ კინო, ახალ წელს მშვიდად ჯდომა და ჭიქა ღვინოსთან ერთად საახალწლო ფილმებით ტკბობა, უყურეთ ფილმს ეს მშვენიერი ცხოვრება, რომელიც განსაკუთრებულ საახალწლო განწყობას შეგიქმნით და დაგარწმუნებთ, რომ ცხოვრება მართლაც მშვენიერია!
