ავტორი: ბექა სუხიტაშვილი
რამდენადაც უნდა გაგიკვირდეთ, ბრიტანელი მსახიობის, სამგზის ოსკაროსანი დენიელ დეი-ლუისის მცირეროლიან, მაგრამ მასშტაბურ კარიერაში გეი გმირსაც შეხვდებით და ეს ფაქტი კიდევ ერთხელ ამტკიცებს, რომ პრაქტიკულად არ არსებობს მსახიობი კაცი, რომელსაც ერთხელ მაინც არ აქვს ნათამაშები ლგბტ პერსონაჟი (ქალებისთვის ასეთი სექსმუშაკის როლია).
ჩემი მშვენიერი სამრეცხაო ეკრანებზე 1985 წელს გამოჩნდა და ეს იყო დეი-ლუისის კარიერაში პირველი როლი, რომელმაც კრიტიკოსების დადებითი შეფასებები დაიმსახურა. ფილმი 1986 წლის 7 მარტს ნიუ-იორკის კინოფესტივალზე ჯეიმს აივორის ფილმთან (ოთახი ხედით) ერთად აჩვენეს და როდესაც ამერიკელებმა დეი-ლუისი ერთამენთისგან ასე რადიკალურად განსხვავებულ როლებში ნახეს, აღფრთოვანებას ვერ მალავდნენ. ახლადაღმოჩენილი მსახიობის ორივე როლი რამდენიმე პრიზით აღინიშნა და ბრიტანელი მსახიობის თავბრუდამხვევი წარმატებების საწინდარი გახდა.
დენიელი ფილმში განასახიერებს დაბალი კლასის გეი სკინჰედს, რომელსაც ტეტჩერის ლონდონში ამბიციური პაკისტანელი ბიზნესმენი უყვარდება. ფილმი ლგბტ თემატიკის სხვა ფილმებისგან იმით გამოირჩევა, რომ მასში არაა ნაჩვენები ამ ადამიანების ტრაგიკული ცხოვრება. აქ არავის კლავენ, არავის აიძულებენ თვითმკვლელობას, ოჯახის წევრები სახლიდან არავის აგდებენ… სტივენ ფრირსის გადმოცემული ქვიარ ურთიერთობა სულაც მეათეხარისხოვანი და უმნიშვნელოა, თითქოს მოქმედება ხდებოდეს სხვა პლანეტაზე, სადაც ყველა ადამიანი საკუთარ ბედს თავად წარმართავს და საკუთარი თავისაც არავის ეშინია. ფილმი ნამდვილად უჩვეულო შთაბეჭდილებას ტოვებს, განსაკუთრებით იმ ფონზე, რომ მაყურებელი მიჩვეულია გეი ურთიერთობის დამთრგუნველ, ზოგჯერ სტერეოტიპულ და მძიმე სცენებს. აღსანიშნავია იუმორით გაზავებული სცენარი და დიალოგები, რაც სცენარისტის – ჰანიფ კურეშის დამსახურებაა. (კურეშიმ საუკეთესო სცენარის კატეგორიაში ოსკარის ნომინაციაც დაიმსახურა.)
დენიელ დეი-ლუისის სასახელოდ ისიც უნდა აღინიშნოს, რომ ჯერ კიდევ დამწყები მსახიობი არ შეუშინდა როლს, რომელზეც ბევრი უარს იტყოდა. თანაც ჩემი მშვენიერი სამრეცხაო პირველი ბრიტანული კინოსურათია, სადაც გეი რომანი აჩვენეს. კლიშეებისგან სრულიად დაცლილი ფილმი, დროის გასვლასთან ერთად, სულ უფრო რელევანტური ხდება, მითუმეტეს, დღევანდელ რასისტულ, ჰომოფობიურ და ქსენოფობიურ სამყაროში.
