ავტორი: ბექა სუხიტაშვილი
ბენის დაბრუნება პიტერ ჰეჯესის ფილმია, რომელშიც მთავარ როლებს ჯულია რობერტსი და ლუკას ჰეჯესი თამაშობენ და რომელიც დაჯილდოების სეზონზე სრულიად უგულებელყოფილ იქნა, მიუხედავად იმისა, რომ ფილმს კრიტიკოსებისგან დადებითი გამოხმაურება ჰქონდა. რობერტსი-ჰეჯესის წყვილი ოსკარზე “საუკეთესო მსახიობის” კატეგორიაშიც მოიაზრებოდა, თუმცა ფინალურ სიაში ვეღარ მოხვდნენ.
ბენის დაბრუნება ნარკოდამოკიდებულ თინეიჯერ ბენზე (ლუკას ჰეჯესი, რომელიც რეჟისორის შვილია) მოგვითხრობს, რომელიც მოულოდნელად სარეაბილიტაციო ცენტრიდან საშობაოდ ოჯახში ბრუნდება. მისი მოულოდნელი გამოჩენა ოჯახის წევრებში ეჭვს აღძრავს, თუმცა ერთადერთი ადამიანი, რომელიც მთლიანად გულგახსნილი და ბედნიერია ეს მისი დედა, ჰოლია (ჯულია რობერტსის გმირი). ბედნიერებას და სიხარულს მალევე სამწუხარო რეალობა ჩაანაცვლებს.
2018 წელს გამოსულ ამერიკულ ფილმებში ნარკოდამოკიდებულ თინეიჯერზე მეორე ფილმი ლამაზი ბიჭი იყო, სადაც ტიმოთი შალამე–სტივ კარელის (მამა-შვილი) წყვილი ვიხილეთ და თუ დაჯილდოებებზე გამოხმაურებას შევადარებთ, ლამაზმა ბიჭმა მცირედით იყოჩაღა. შალამე ბაფტასა და ოქროს გლობუსზეც კი მოხვდა, მაგრამ ოსკარისთვის უკვე ისიც დაიჩრდილა.
ამ ოთხივე მსახიობის პერფორმანსი ნამდვილად ძლიერი იყო და რობერტსმა ბოლო წლებში ერთ-ერთი საუკეთესო თამაში გვანახა, თუმცა ხშირად გვავიწყდება, რომ დადებითი გამოხმაურება ან მაყურებლის სიყვარული უკვე წარმატებაა ფილმისთვის და სულ არაა აუცილებელი ოსკარის ხუთ ნომინანტში მოხვედრა დაფასებისთვის ან წარმატებისთვის.
ბენის დაბრუნება ნარკომანიის პრობლემას დედა-შვილის მჭიდრო ურთიერთობაზე აქცენტიც აკეთებს და ზოგადი პრობლემები მისთვის მეორეხარისხოვანია. ფილმი რობერტსი-ჰეჯესის მჭიდრო კავშირზე და იმ სიყვარულის ჩვენებაზეა, რასაც დედაშვილობას ვუწოდებთ.
ჰოლი დედაა, რომელიც ყველაფერზე წამსვლელია საკუთარი შვილის ბედნიერებისთვის. ის ყველა დაბრკოლების მიუხედავად გვერდში უდგას მას და ბოლომდე ეშვება თავით შვილის მძიმე წარსულში. ფილმში ერთადერთი კონტროვერსიული ეპიზოდი რომელსაც მაყურებელი არაერთგვაროვნად შეხედავს, ეს ჰოლის უკიდურესი ნაბიჯია – ინფორმაციის სანაცვლოდ და საკუთარი შვილის გადასარჩენად, დაღუპოს სხვისი შვილი. ფილმის გამოხმაურებების უარყოფითი ნაწილი სწორედ ამ ეპიზოდზე მოდის. საქციელი მართლაც საკამათოა – მორალურად რამდენად გამართლებულია სხვისი შვილის გაწირვა საკუთარის სასარგებლოდ. ფილოსოფიურ განსჯებს რომ თავი ავარიდოთ, ეს საქციელი, უბრალოდ, ჰოლის არჩევანი იყო და მის ადგილზე ვინ როგორ მოიქცევა, არავინ იცის.
ფილმის ფინალში, ოჯახში ფიზიკურად დაბრუნებული ბენი, თითქოს სულიერადაც ხელმეორედ იბადება, სამყაროს ახლიდან უბრუნდება, პრობლემაგადაჭრილი და უმანკო, დედის ხელებში გახვეული, დედის სიყვარულითა და თანადგომით გაბრუებული.
