ბათუმში საავტორო კინოს რიგით მეთორმეტე საერთაშორისო კინოფესტივალი დასრულდა. კვირეულის ფარგლებში, ცნობილი რეჟისორებისა და ხელოვანების მასტერკლასების ფონზე, მხატვრული, დოკუმენტური და მოკლემეტრაჟიანი ფილმების სექციაში სულ 40-მდე ფილმი წარსდგა საერთაშორისო ჟიურის წინაშე. ფესტივალის საუკეთესო ფილმები რამდენიმე წუთის წინ დასახელდა:
სრულმეტრაჟიანი მხატვრული ფილმების საკონკურსო კატეგორიაში წარდგენილი ნამუშევრებიდან გამარჯვება სერგეი ლოზნიცას სურათმა მოიპოვა. რეჟისორს გრანპრი გადაეცა ფილმისთვის “ნაზი არსება” (უკრაინა/გერმანია/ჰოლანდია/რუსეთი/ლიტვა, 2017; 143 წთ.)
მარიამ ხაჭვანის “დედე” ჟიურის სპეციალური აღნიშვნის მფლობელი გახდა.
ასევე, დოკუმენტური ფილმების კატეგორიაში წარდგენილი ნომინანტებიდან საერთაშორისო ჟიურიმ საუკეთესოდ რეჟისორი ზიად ქალთოუმის “ცემენტის გემო” დაასახელა. ( გერმანია/ალბანეთი/სირია/არაბეთის გაერთიანებული საემიროები/კატარი, 2017, 85 წთ)
ჟიურის სპეციალური აღნიშვნა დაიმსახურა რატი ონელმა დოკუმენტური ფილმისთვის “მზის ქალაქი” (საქართველო/აშშ/ქატარი/ჰოლანდია, 2017, 104 წთ.) და ასევე უგის ოლტემ დოკუმენტური ფილმისთვის “თავისუფლების დღე” (ნორვეგია/ლატვია, 2016, 100 წთ.)
საუკეთესო რეჟისორის წოდება იეშიმ უსტაოღლუმ დაიმსახურა ფილმისთვის “Claire Obscure” (თურქეთი/პოლონეთი/საფრანგეთი, 2016, 100 წთ.)
კინოფესტივალის ყოველწლიური სპეციალური პრიზი მსოფლიო კინემატოგრაფში შეტანილი განსაკუთრებული წვლილისთვის ცნობილ ირანელ კინორეჟისორს – მოჰსენ მახმალბაფს გადაეცა გია ყანჩელთან და ვახტანგ კიკაბიძესთან ერთად.
საავტორო კინოს ფესტივალზე საუკეთესო მამაკაცის ჯილდო მერაბ ნინიძემ მოიპოვა (ფილმი “იუპიტერის მთვარე”, რეჟისორი კორნელ მუნდრუზო, უნგრეთი/გერმანია, 2017, 123 წთ.)
მსახიობი დაჯილდოების ცერემონიის დამსწრეებს პირდაპირი ჩართვის საშუალებით გაესაუბრა
საუკეთესო მოკლემეტრაჟიანი ფილმის პრიზი გადაეცა რეჟისორ ქიუ იანგის ფილმისთვის “ნაზი ღამე” (ჩინეთი, 15 წთ.)
ჟიურის სპეციალური აღნიშვნა დაიმსახურა შემდეგმა ფილმებმა:
- ანა – რეჟისორი მარგო ზუბაშვილი, საქართველო, 2017; 30 წთ.
- სამი ნაბიჯი – რეჟისორი სოსო ბლიაძე, საქართველო, 2017; 19 წთ.
- ვალპარაიზო – რეჟისორი კარლო სირონი, იტალია, 20 წთ.
