კვენტინ ტარანტინოს ახალი ფილმის მოქმედება 1969 წელს ვითარდება. მთავარი გმირები ვესტერნების მსახიობი რიკ დალტონი და მისი კასკადიორი კლიფ ბუტი არიან. მიუხედავად იმისა რომ ლეონარდო დიკაპრიოსა და ბრედ პიტის პერსონაჟები გამოგონილია პირველ თიზერში არაერთი რეალურად არსებული ადამიანი ვიხილეთ. თვალი გადავავლოთ იმ პერსონაჟებს, რომლებიც “ერთხელ ჰოლივუდშის” თრეილერში მოხვდნენ.
როგორც უკვე ვახსენეთ დალტონი და ბუტი გამოგონილი პერსონაჟებია, თუმცა მათ ისტორიული პროტოტიპები ჰყავთ. თავად რეჟისორის განცხადებით დალტონი ბერტ რეინოლდსის კინოვერსიაა, ბუტის უკან კი რეინოლდის კასკადიორი ჰელ ნიდემი დგას. მსახიობი და დუბლიორი აქტიურად თანამშრომლობდნენ და მეგობრობდნენ. სიუჟეტის მიხედვით დიკპარიოს გმირი ვესტერნ-შოუ “Bounty Law”-ს ვარსკვლავია, რეინოლდსი იმ პერიოდში მსგავს პროექტში “Gunsmoke”-ში მონაწილეობდა.
თიზერის გამხსნელ ნაწილში ზემოთხსენებულ ვარსკვლავებს ინტერვიუს კინოჟურნალისტი ართმევს. დიდი ალბათობით სპენსერ გარეტის პერსონაჟის პროტოტიპი “NBC”-ის ცნობილი წამყვანი ტომ ბროკაუა, რომელიც 1963 წლიდან 1973 წლის ჩათვლით არაერთი გადასაღები მოედნის სტუმარი გახლდათ.
თვითმკვლელთა რაზმის ვარსკვლავი, მარგო რობი, რომან პოლანსკის მეუღლის, მსახიობი შერონ ტეიტის როლს ასრულებს. ერთ-ერთ ეპიზოდში რობი ფსიქოდელიურ ფონზე ცეკვავს, ეს სცენა ტეიტის მონაწილეობით ორ ფილმზე “Valley of the Dolls”-ზე და “The Wrecking Crew”-ზე რეფერენსი გახლავთ.
ტარანტინომ მცირე ქრონომეტრაჟი ჩარლზ მენსონის კრიმინალური სექტის “მენსონის ოჯახის” წევრებსაც დაუთმო.
ერთ-ერთი ყველაზე ვარსკვლავური გამოჩენა კი ადამიან-ლეგენდას, მძაფრსიუჟეტიანი ჟანრის პიონერს ბრუს ლის ჰქონდა. მისი როლი მაიკლ მომ შეასრულა. ლი შერონ ტეიტის მეგობარი და მწრთვნელი გახლდათ.
კიდევ ერთ კადრში ბრუს ლის ემილ ჰირშის პერსონაჟ ჯეი სებრინგს წრთვნის. სებრინგი ტეიტის ყოფილი ბოიფრენდი და ახლო მეგობარი იყო, რომელიც საბედისწერო ღამეს რომან პოლანსკის სახლში იმყოფებოდა.
და ბოლო მაგრამ არაუკანასკნელი პერსონაჟი, მეოცე საუკუნის ერთ-ერთი ყველაზე ცნობილი ამერიკელი ფსიქოფატი და დამნაშავე ჩარლზ მენსონი. მის როლს დეიმონ ჰერიმანი ასრულებს. საინტერესოა რომ მსახიობი გონებაზე მონადირის მეორე სეზონშიც მენსონს განასახიერებს.
