ყველასთვის კარგადაა ცნობილი, რომ კინემატოგრაფიის უდიდეს ოსტატებსაც კი მოსდით შეცდომები. მართლაც, ძნელია შეცდომისგან თავი დაიზღვიო – გადამღებ ჯგუფს ყოველდღიურად ასობით კადრის გადაღება უწევს, რაც რაიმე წვრილმანის ყურადღების მიღმა დარჩენის შანსს ზრდის. ასეთ დეტალებს მხოლოდ ერთეულები თუ შეამჩნევენ, მაგრამ, როგორც ვიცით, ჩასაფრებულ კინომოყვარულებს არ სძინავთ. სწორედ მათ აღმოაჩინეს უნაკლო მეომრების ნაკლი სამეფო კარის თამაშებში, უყურადღებოდ დარჩენილი კადრი ბეჭდების მბრძანებელში და სხვა ლეგენდარულ თანამედროვე ფილმებში.
ერთად გავეცნოთ დაკვირვებული ფანების მიერ აღმოჩენილ შეცდომებს.
ბეჭდების მბრძანებელი: ბეჭდის საძმო
დააკვირდით – ჰობიტების სოფლის შარაგზაზე, არც მეტი არც ნაკლები, მანქანის ბორბლების ნაკვალევია. სიუჟეტის მიხედვით კი, ამ გზაზე უცხოს მხოლოდ გენდალფს ჩაუვლია. მართალია ჯადოქარია, მაინც არ გვგონია, შუამიწეთში ავტომობილები ჰყოლოდათ.
სამეფო კარის თამაშები
საჭურისი შეუბღალავები ამქვეყნად საუკეთესო მეომრები არიან, ამაზე არავინ დავობს, მაგრამ მათ დაქორწინება ეკრძალებათ. იქნებ ამ მეომარს უბრალოდ სამკაულობა მოსწონს და თითს საქორწინო ბეჭედი სულაც არ უმშვენებს?
მერლინი
მრგვალი მაგიდის რაინდი და პლასტიკის ბოთლი? როგორ მოხდა, რომ ამ სცენაში წყლის ბოთლი, რომლიდანაც ალბათ მსახიობი სვამდა, მონტაჟისას ვერავინ შეამჩნია?
მეხუთე ელემენტი
ამ ფილმში მეხუთე ელემენტს – ლილუს გაუტეხავი შუშის დამსხვრევაც კი შეუძლია. დაკვირვებულმა მაყურებლებმა შეამჩნიეს, რომ ადგილი, რომელსაც ლილუმ მუშტი უნდა უთავაზოს, წინასწარაა მონიშნული.
იგი
როცა ბევერლის გოგონები დაეძებენ, ის ცდილობს სიგარეტი დამალოს. ამ დროს კამერის კუთხე იცვლება და გოგონას ზემოდან აჩვენებენ. ამ კადრში ხელი, მას სიგარეტი მარჯვენის ნაცვლად მარცხენით უჭირავს.
გარდა ამისა, როცა ედი დაწყევლილი სახლის იატაკზე ეცემა, მის ხელს არაფერი სჭირს. თუმცა შემდეგ სცენაში კამერა მას უკვე ხელმოტეხილს გვიჩვენებს – თანაც თითქოს ის თავიდანვე ამ მდგომარეობაში ჰქონდა.
ფილმის მოქმედება 1989 წელს ხდება, თუმცა მაღაზიის თაროებზე თანამედროვე კოსმეტიკური ნაწარმი, მაგალითად “ნივეას” ის კრემები მოჩანს, რომელთა დიზაინიც 2000-იანებში შეიქმნა.
ლოგანი
როცა ლოგანს ესვრიან და ძირს ეცემა, მაყურებელი მის პიჯაკსა და პერანგზე უამრავ ნატყვიარს ხედავს. მაგრამ წამოდგომის შემდეგ ტანსაცმელი ახალივით გამოიყურება.
ხავიერი კი, იმის მიუხედავად, პარალიზებულია, მომდევნო კადრში მანქანაში ადგილის შეცვლას ახერხებს.
გალაქტიკის მცველები 2
ამ კადრში პატარა გრუტი ხომალდის ილუმინატორიდან იყურება, შემდეგ, გარედან გადაღებულ კადრში კი სხვა ადგილმდებარეობა აქვს – აშკარად ქვემოთაა გადანაცვლებული. იცვლება სარკმლის ზომაც – მომდევნო კადრში ის გაცილებით დიდი ჩანს.
თორი: რაგნაროკი
ელვის სხივები თორის გარშემო ეცემა და მის ფეხქვეშ ბალახი იწვის. წუთის შემდეგ ეს ბალახი რაღაც სასწაულით ისევ მწვანე ხდება.
ამავე ფილმში, ხიდზე მდგარი ჰეიმდალი მოსასხამს იხსნის და, სანამ ბრძოლაში ჩაერთვება, გვერდით მოისვრის. მოსასხამი ხიდიდან უჩინარდება და მაყურებელი ფიქრობს, რომ ის ხიდიდან მდინარეში ვარდება. თუმცა მომდევნო კადრში ჰეიმდალს, რომელიც ლოკის ელაპარაკება, იგივე მოსასხამი აცვია.
ქალი-საოცრება
დიანას მეჯლისზე ზურგამოჭრილი კაბა აცვია და იქ ძნელად თუ დამალავს რამეს. მაგრამ როცა ღონისძიებას ტოვებს და კაბას იხდის, აღმოჩნდება, რომ ამორძალს ამ სიფრიფანა კაბის ქვეშ მთელი ამუნიცია აქვს.
წყლის ფორმა
ჯოხის ადგილმდებარეობა ტუალეტში მუდმივად იცვლება, მიუხედავად იმისა, რომ არცერთი პერსონაჟი მას არ ეხება. სცენის დასასრულს აღმოჩნდება, რომ ნიჟარაზე სისხლია, რომელსაც ეს ჯოხი ფარავდა, თუმცა მანამდე მის სიახლოვეს არავითარი სისხლი არ ჩანდა.
დოქტორი სტრეინჯი
როცა მოსასხამით ბრძოლის შემდეგ დოქტორი სარკეში იყურება, სახეზე ერთ ნაკაწრის გარდა სხვა ჭრილობა არ ეტყობა. თუმცა, როცა გარეთ გადის, საფეთქელზე სისხლი აცხია.
ვარსკვლავური ომები: განდევნილი
როგორც ჩანს, ჯედაის მონუმენტიც კი ფლობს მაგიურ ძალებს და ადგილმდებარეობის შეცვლა შეუძლია. სხვაგვარად ვერ აიხსნება ის ფაქტი, რომ თავიდან ის ერთ მხარეზეა გადაბრუნებული, შემდეგ კი – მეორეზე.
ჯადოსნური ცხოველები: სად ვიპოვოთ ისინი
სკამანდერის “ზოოპარკში” შესვლისას ვხედავთ, რომ კედლის მხოლოდ მარცხენა მხარეა გამონგრეული. მაგრამ როცა პერსონაჟები შიგნით შედიან, კედელი ბევრად უფრო დაზიანებული ჩანს.
ადამიანი-ობობა: შინ დაბრუნება
როცა ადამიანი-ობობა კრიმინალებს მისდევს, აშკარად დაისია, თუმცა ორიოდე წუთის შემდეგ, როცა მათ იჭერს, უკვე გვარიანად ბნელა.
მაგნიტური ბირთვი საკმაოდ ცხელი რამ ჩანს – ის ლოგინზე ნამწვის კვალს ტოვებს, მიუხედავად ამისა, მთვარ გმირს შეუძლია ის ხელში ისე დაიჭიროს, არაფერი დაიწვას. მეტიც – მომდევნო სცენებში მისი პიჯაკის ჯიბესაც კი არაფერი მოსდის.
ჯუმანჯი 2
პირველ კადრში Play Station-ს მხოლოდ 2 ჯოისტიკი აქვს, თუმცა შემდეგ მასზე თამაშს ოთხი ადამიანი ახერხებს. ჯადოქრობაა!
