სტივენ სპილბერგი ერთ-ერთი ყველაზე გავლენიანი ადამიანია ჰოლივუდში, რომლის სახელიც არაერთ წარმატებულ ფილმსა თუ პროექტს უკავშირდება. 2017 წელს ეკრანებზე გამოვიდა ფილმი სპილბერგი, რომელიც ბავშვური კინომოყვარულობიდან ძვირადღირებულ ბლოკბასტერებამდე განვლილ გზას გვაცნობს.
მაშ ასე, ერთად გადავავლოთ თვალი სტივენის მიღწევებს, რომლის საშუალებითაც მან კინოსამყარო, შესაბამისად, მილიონობით ადამიანის ცხოვრებაც შეცვალა:
1. კომპიუტერული გრაფიკის ინოვატორი
იურიული პერიოდის პარკი ნამდვილი გადატრიალება იყო 90-იანი წლების დასაწყისში. მაყურებელს, კომპიუტერული ეფექტები მანამდეც ნანახი ჰქონდა, თუმცა ამ შემთხვევაში ყველაფერი (ანუ დინოზავრები!) გაცილებით ხარისხიანად და ბუნებრივად გამოიყურებოდა.
სტივენ სპილბერგისა და მისი გუნდის შემართებამ არა მხოლოდ კინოინდუსტრიის ბედი შეცვალა, არამედ ვიდეოთამაშების განვითარებასაც შეუწყო ხელი.
2. საუკეთესო ადაპტაციები
შესაძლოა, ბევრმა თქვენგანმა არც კი იცოდეს, რომ ხელოვნური ინტელექტი ჯერ კიდევ 70-იან წლებში სტენლი კუბრიკის ჩანაფიქრი იყო, თუმცა არასაკმარისი ტექნოლოგიური განვითარების პირობებში მან დევიდის პერსონაჟის შექმნის პერსპექტივა ვერ დაინახა და თითქმის 20 წლის შემდეგ დიდი რეჟისორის პროექტი სწორედ სპილბერგმა გააცოცხლა.
ასევე მას ეკუთვნის ისეთი კომპლექსურად ადაპტირებადი ეკრანიზაციები, როგორებიცაა განსხვავებული აზრი, კაპიტანი კაუჭა და, რა თქმა უნდა, კლასიკად ქცეული შინდლერის სია.
2. ვიდეოთამაშების განვითარებაში შეტანილი წვლილი
როგორც უკვე აღვნიშნეთ, კომპიუტერული გრაფიკის კინოში ადაპტირებით სპილბერგმა ვიდეოთამაშების განვითარებაში დიდი წვლილი შეიტანა, თუმცა ეს მისი ერთადერთი ნაბიჯი არ ყოფილა – 1990-იანი წლების მიწურულს მან იმუშავა ვიდეოთამაშThe Medal of Honor-ის კონცეფციაზე და ასევე, მონაწილეობა მიიღო სტივენ სპილბერგის სარეჟისორო სკამის შექმნაში – ამ პროგრამის საშუალებით მომხმარებლები ვიდეომონტაჟს შეისწავლიდნენ.
4. მეორე მსოფლიო ომის შესახებ შექმნილი კინომეხსიერება
შეუძლებელია, იფიქრო მომავალზე წარსულის გააზრების გარეშე… სპილბერგმა საკუთარ შემოქმედებაში განსაკუთრებული ადგილი დაუთმო მეორე მსოფლიო ომს და გადაიღო ისეთი გენიალური ფილმები, როგორებიცაა შინდლერის სია, რიგითი რაიანის გადასარჩენად, მზის იმპერია და მინისერიალი წყნარი ოკეანე.
5. ანიმაციური ფილმები
სპილბერგი Dreamworks-ის ერთ-ერთი თანადამფუძნებელია. სწორედ ამ სტუდიის ანიმაციური ფილმებია ჩვენთვის კარგად ნაცნობი და საყვარელი შრეკი, მადაგასკარი, კუნგ ფუ პანდა და მრავალი სხვა.
6. ჯადოსნური შეგრძნებები
სპილბერგმა მაყურებლისათვის ჯადოსნური შეგრძნებების მინიჭება არა მხოლოდ სპეცეფექტების საშუალებით, არამედ იმ საოცარი სიუჟეტებითაც შეძლო, რომელიც მის არაერთ ნამუშევარში იკვეთება და, ალბათ, ამის ერთ-ერთი საუკეთესო მაგალითი ველასათვის საყვარელი უცხოპლანეტელია!
