ნებისმიერი პოპულარული კინოსამყაროს ამბების ცქერისას თავს მთავარ, მეორეხარისხოვან გმირად ან მის თანმხლებად წარმოვიდგენთ, რომელსაც განსაკუთრებული შესაძლებლობები ან სუპერძალები გააჩნია, ჰყავს ასეთივე მეგობრები ან მამამისი ბრიუს უილისია. თუმცა ყველას გვესმის, რომ ამ კინოსამყაროების რიგითი წევრი რომ ვყოფილიყავით, ჩვენ ჩვენი მონაცემებით, სიცოცხლის დიდი შანსი ნამდვილად არ გვექნებოდა. მაშ, როგორ უნდა გადავრჩეთ ასეთ შემთხვევაში? რა ხერხების ცოდნა და უნარების გამოჩენა გვჭირდება, სასტიკი კინოსამყაროების მორიგი მსხვერპლი რომ არ აღმოვჩნდეთ? ამას ჩვენი სტატიიდან შეიტყობთ.
სამეფო კარის თამაშები
დავუშვათ, ერთ “მშვენიერ” დღეს ვესტეროსში გაიღვიძეთ – გამოგონილ მიწაზე, რომელზეც ყოველწამს ვიღაც კვდება, თანაც სასტიკად, რომელშიც მოულოდნელი სიკვდილისგან მეფეებიც არ არიან დაცულნი. ერთი მხრივ – დაუნდობელი ბრძოლა რკინის ტახტისთვის, მეორე მხრივ კი ჩრდილოეთიდან მომავალი შეუჩერებელი ძალა – თეთრი მავალებისა და მკვდრების არმია, მესამეც – ზრდასრული და საშინელი დრაკონები. ამ ყველაფერს რომ რიგითი მოქალაქე ცოცხალი გადაურჩეს, ერთადერთი გამოსავალი არსებობს:
უნდა გაემგზავროთ ვესტეროსის სამხრეთ-დასავლეთით, კუნძულ არბორზე, რომელსაც რედვაინების საგვარეულო მართავს და რომელიც მთელ ვესტეროსსა და ესოსშია განთქმული თავისი დიდებული ღვინოებით. მოკლედ, ეს მიწა მთელ ამ ალიაქოთს ჭიქა ღვინის ძალით უმკლავდება, გარდა ამისა, კუნძული მოშორებულია როგორც ვესტეროსს, ისე ესოსს და იქ დატრიალებულ ჯოჯოხეთს. ამრიგად, თუ სამეფო თამაშებში გადარჩენა გსურთ, დაჯექით პირველივე შემხვედრ გემზე, გადადით არბორზე და რომელიმე მეღვინეს დაუდექით მსახურად. წყნარი ცხოვრება და კარგი ღვინის სმა გარანტირებულია.
ტერმინატორი
თუ ტერმინატორზე ფილმებს დავუჯერებთ, მომავალი სავსეა რობოტებით, რომლებიც ადამიანების ამოწყვეტას ცდილობენ. მათ კი, ვინც მათ რისხვას როგორღაც დაუძვრა, ბუნკერებში, გაჭირვებაში უწევთ ცხოვრება.
თუმცა, მოიცადეთ: ეს ხომ მომავალია, თანაც ლოს-ანჯელესი. ფილმის მიხედვით, მსოფლიოს ყველა ქვეყანა არ დაუბომბავთ მომწამლავი ჭურვებით. მაგალითად, ბრაზილიის ჩრდილოეთი სავარაუდოდ თავისუფალი და საცხოვრებლად უსაფრთხოა. პრეისტორიის მიხედვით მომწამლავ ბომბებს გადარჩენილმა ხალხმა სამხრეთი მიატოვა და ჩრდილოეთით გაემგზავრა, ესე იგი აფრიკის, რუსეთისა და ავსტრალიის ჩრდილოეთი ნაწილები უსაფრთხო ტერიტორიებია.
ფილმში ტერმინატორი 2 აღნიშნულია, რომ ყველაზე ნაკლებ სამხრეთი ნახევარსფეროს ქვეყნები დაზარალდნენ, ამრიგად, თუ ტერმინატორის სამყაროში კატასტროფამდე აღმოჩნდებით, გირჩევთ, სასწრაფოდ შეიძინოთ ბილეთი და საუკეთსო შემთხვევაში ჩრდილოეთ ავსტრალიაში, თუ არადა, რუკაზე ყვითლად მონიშნულ ქვეყნებში გაემგზავროთ.
DC-ისა და Marvel-ის კინოსამყაროები
თუ DC-ის ან Marvel-ის სამყაროში ხართ, დიდი ალბათობით, თქვენი ქალაქი დაპყრობილია. თუ ეს ნიუ-იორკია, მაშინ მას ყოველთვე სხვადასხვა მაგარი ტიპი იპყრობს. სუპერვილანებს თავიანთი გრანდიოზული გეგმების განხორციელება, რასაკვირველია, დიდ ქალაქებში სურთ, იქ, სადაც ბევრი ფული, ხალხი და ტექნოლოგიაა. თუმცა ისეთ პატარა ქალაქშიც კი, როგორიც სმოლვილია, სრულიად შესაძლებელია რაიმე კატასტროფა მოხდეს.
ცოცხლად გადარჩენის ერთადერთი შანსია, რაც შეიძლება შორს გაიქცეთ სუპერგმირებისა და სუპერბოროტმოქმედების ასპარეზად ქცეული აშშ-დან და რაც შეიძლება პატარა ქვეყანაში დასახლდეთ. მაგალითად, შვეიცარიაში ან ბელარუსში.
მოსიარულე მკვდრები
მოსიარულე მკვდრების სახიფათო სამყაროში გადარჩენის ორად ორი ალტერნატივაა: წახვიდეთ რუსეთში ან ავსტრალიაში. რატომ? – მეჩხერად დასახლებული ადგილები, ცუდად განვითარებული ინფრასტრუქტურა, მკაცრი კლიმატი (საშინელი ყინვა ან მშრალი სიცხე). თუ ამ უდაბნოში მცირე დასახლება მოძებნეთ, ამას რა ჯობია – დიდი შანსია, ცივილიზაციიდან მოწყვეტილ ტერიტორიაზე ზომბი გადაგეყაროს გზად.
ავსტრალიას კიდევ ერთი პლუსი აქვს: კონტინენტზე სხვა ქვეყანა არაა და ეს მოსახლეობის მიგრაციის ხარჯზე ზრდას ხელს უშლის.
ამ ქვეყნებში დასახლებისას ერთი ფაქტორი უნდა გაითვალისწინოთ: ავსტრალიასა და რუსეთში ძნელად ხელმისაწვდომია ცეცხლსასროლი იარაღი, ასე რომ, თუ ზომბები მაინც გამოჩნდნენ, მათი მოშორება ხელჩართული ბრძოლით მოგიწევთ.
ვარსკვლავური ომები
თუ ვარსკვლავური ომების გალაქტიკაში მოხვდით, სასწრაფოდ დატოვეთ ეს გალაქტიკა (თუ, რასაკვირველია, ჯედაის მონაცემებს არ ამჩნევთ თქვენში). თუმცა, სანამ გაარკვევთ, საით გაიქცეთ, ერთად გავეცნოთ კომპანია Lucasfilm-ის მიერ გამოქვეყნებულ ამ სამყაროს რუკას:
რუკის თანახმად, გალაქტიკის ფართობი 120 000 სინათლის წელია, თუმცა იმის გათვალისწინებით, რომ თითოეული ხომალდი ჰიპერძრავითაა აღჭურვილი, მთელი გალაქტიკის გადაკვეთა ერთი კვირის ფარგლებშია შესაძლებელი (ხომალდის საშუალო სიჩქარე დღეში 25 000 სინათლის წელია). ამრიგად, ცოცხალი რომ გადარჩეთ, თამამად მიატოვეთ გალაქტიკა, რომელშიც სიკვდილის ვარსკვლავი გამუდმებით ანადგურებს პლანეტებს და ეომება აჯანყებულებს, და გაემგზავრეთ შორს, შორს, სხვა გალაქტიკაში.
