რა მოხდება, თუ ფილმებში ნანახ ტელეფონის ნომრებს ავკრეფთ

მულტფილმებსა და კომპიუტერულ თამაშებშიც ხშირად იგონებენ სამი ხუთიანით დაწყებულ ნომრებს (ასოების კომბინაცია KL აშშ-ში ორი ხუთიანს აღნიშნავს).

ფილმში უკანასკნელი კინოგმირი (არნოლდ შვარცნეგერის მონაწილეობით), გვხვდება სცენა, სადაც ერთი ყმაწვილი ცდილობს არნის დაუმტკიცოს, რომ კინოში არიან.

• თავიდან ის მეპატრონეს მაღაზიის ნომერს ეკითხება (555-2310), შემდეგ კი საკუთარი სახლის ტელეფონს ამბობს (555-3812). ბიჭი გაკვირვებას გამოთქვამს, თუ რატომ აქვს ლოს-ანჯელესის ყველა მკვიდრს სამ ხუთიანზე დაწყებული ნომერი.

სამი ხუთიანით დაწყებული სატელეფონო ნომრების უმეტესობა კინოში გამოგონილია. თუმცა ნომერ 555-1212-ზე დარეკვისას აშშ-სა და კანადის ზოგიერთ ადგილზე აუცილებელი დახმარების სამსახურში მოხვდებით.

თუ აშშ-ში კინოსატელეფონო ნომერზე დარეკვისას, უმეტეს შემთხვევაში ვერსად გახვალთ, სხვა ქვეყნებში შეიძლება არათუ დარეკოთ, არამედ თავადაც დაგირეკონ ცნობილი ფილმების მოყვარულებმა. მაგალითად, ავსტრალიაში სატელეფონო კოდი 555 სიდნეის ერთ რაიონსა და მელბურნის შემოგარენში გამოიყენება, ამიტომ დიდი შანსია, რომ ამერიკულ ფილმში ნანახი ნომერი ავსტრალიელი აბონენტის რეალურ ნომერს დაემთხვეს.

დღესდღეობით პრეფიქს 555-ით აშშ-ში აქტიურად სარგებლობენ სხვადასხვა მომსახურების კომპანიები, ამიტომ კავშირგაბმულობის ოპერატორებმა გადაწყვიტეს, კინოკომპანიებს მოლაპარაკებოდნენ, ფილმებში სხვა გამოგონილი ნომრები გამოეყენებინათ. ამრიგად, ფილმებსა და სერიალებში გამოყენებული სატელეფონო ნომრები მხოლოდ 555-0100-იდან 555-0199-მდე დიაპაზონში მერყეობს.

იმის გამო, რომ თანამედროვე სცენარისტებს მხოლოდ რამდენიმე ასეული ფიქციური ნომრიდან შეუძლიათ სასურველის არჩევა, ერთი და იგივე სატელეფონო ნომერი შეიძლება სხვადასხვა ფილმში გამეორდეს. მარლა სინგერის ტელეფონის ნომერი კინოფილმიდან მებრძოლთა კლუბი ემთხვევა ჰონგ-კონგის რესტორნის ნომერს ფილმიდან ჯაშუში ჰარიეტი, ედი ალდენის ნომერს მელოდრამიდან ვიღაც, შენი მსგავსი და ფსიქიატრიული დახმარების ცენტრის ნომერს მილენიუმის ერთ-ერთი ეპიზოდიდან.

ბოევიკში ჯონ ვიკი 2 მონიტორზე ნიუ-იორკის შტატის აბონენტების რეალურ ნომრებს ვხედავთ. მაგალითად, ნომერი 315-194-6020, რომელიც ფილმის რამდენიმე კადრში გაიელვებს, სინამდვილეში პატარა ამერიკული ქალაქის, სირაკიუსის ქსელს ეკუთვნის. პერსონაჟებთან დაკავშირების მოსურნე ფილმის ფანები განუწყვეტლივ რეკავენ აღნიშნულ ნომრებზე, თუმცა პასუხად იღებენ, რომ ნომერი რეგისტრირებული არ არის.

ფილმის შემქმნელების მიერ არა გამოგონილი, არამედ რეალური ნომრების მითითება ხშირად სასამართლო დავის საგანიც კი გამხდარა. მაგალითად, ყოვლისშემძლე ბრიუსში  გამოყენებულია ნომერი 776-2323, რომლითაც ბრიუსი ღმერთს უკავშირდება.

• ეს ნომერი ნიუ-იორკის ქალაქ ბუფალოში, სადაც აღნიშნულ ფილმს იღებდნენ, დაკავებული არ იყო, მაგრამ იმავე ნომრის მფლობელებთან სხვა შტატებში ფილმის გამოსვლის შემდეგ ზარები არ წყდებოდა. კოლორადოში იგივე ნომერი რადიოსადგურს ეკუთვნოდა, ჩრდილოეთ კაროლინის ქალაქ სენფორდში კი, სახალისო დამთხვევის წყალობით, იდენტური ნომერი ადგილობრივ ეკლესიას ჰქონდა. მავანმა ქალბატონმა, აღნიშნული ნომერი მისი სახლის ნომერს რომ ემთხვეოდა, კინოკომპანიის წინააღმდეგ სასამართლოშიც კი შეიტანა საჩივარი. კომედიის DVD-ზე გამოსვლის შემდეგ ნომერი ერთგული ფიქციური 555-0123-ით შეცვალეს.

1992 წელს რეჟისორმა მაიკლ მურმა დოკუმენტურ ფილმში შინაური ცხოველები და ხორცი: დაბრუნება ფლინტთან ანგარიშმიუცემლად გაამხილა საკუთარი ტელეფონის ნომერი (212-636-5108). ფილმის ტელეეთერში გაშვების მხოლოდ პირველ დღეს მან 314 სატელეფონო ზარი მიიღო.

არსებობს ისეთი ტელეფონის ნომრებიც, რომლებსაც ფილმებში არ აჩვენებენ, მაგრამ კინოსიუჟეტებთან მაინც მჭიდრო კავშირი აქვთ. ასეთ ნომრებს მაყურებლების დასაინტრიგებლად სპეციალურად ურთავენ სიუჟეტში. მაგალითად, იაპონიაში სახელი გაითქვა  ნომერმა 090-4444-4444, როგორც “სადაკოს ნომერმა” ფილმიდან ზარი (გაგახსენებთ: სადაკო მოჩვენებაა). ფილმის ფანები ამტკიცებენ, რომ თუ იაპონიაში ამ ნომერზე დარეკვას გაბედავთ, პასუხად მოგუდულ ყვირილს გაიგონებთ.