წინასაშობაო სეზონზე დისნეიმ თავისი ახალი პროექტის – “მაკნატუნა და ოთხი სამეფოს” შთამბეჭდავი თრეილერი გამოაქვეყნა. ერთ-ერთი ყველაზე პოპულარული საშობაო ზღაპარი, რომელიც მსოფლიომ ჩაიკოვსკის ბალეტ “მაკნატუნათი” გაიცნო, ამჯერად დისნეის სამყაროში გადმოინაცვლებს. ლას ჰალსტრომის რეჟისორობით გადაღებულ “მაკნატუნაში” როლებს კირა ნაითლი, მორგან ფრიმანი, ჰელენ მირენი და მაკენზი ფოი შეასრულებენ.
ე.თ. ჰოფმანის 1816 წლის ნაწარმოები მსოფლიომ მას შემდეგ გაიცნო, რაც მისი სიუჟეტის მიხედვით პეტრე ჩაიკოვსკის ბალეტი “მაკნატუნა” გამოვიდა. ამბავი მოგვითხრობს პატარა გოგონა კლარაზე, რომელიც საშობაო საღამოს ზეიმზე უცნაურ პარალელურ სამყაროში აღმოჩნდება. “ნაცნობ ლეგენდას ბნელი მხარე აქვს” – გვაფრთხილებს თრეილერი, რომელიც კლასიკური ზღაპრის პირქუშ განვითარებაზე და დისნეისთვის არადამახასიათებელ ტონებზე მიგვანიშნებს. ამავე თრეილერიდან ჩანს, რომ დისნეი მართლაც თვალისმომჭრელ სანახაობას გვპირდება.
“მაკნატუნა” დისნეის მიერ განახლებულ კლასიკურ რეპერტუარს – უკვე გამოსულ “მზეთუნახავსა და ურჩხულს”, ასევე ამჟამად გადაღების პროცესში მყოფ “ალადინს” “მულანს”, “მეფე ლომსა” და “დამბოს” შეუერთდება.
“მაკნატუნა და ოთხი სამეფო” 2018 წლის ნოემბრის დასაწყისში გამოვა.
