მსახიობობა ძალიან ბევრისთვის მართლაც საოცნებო პროფესიაა. ვარსკვლავები კი, რომელთაც დღეს ეკრანებზე ვხედავთ, ოდესღაც სწორედ ჩვენნაირი მეოცნებეები იყვნენ.
საინტერესოა, რას ფიქრობენ ისინი მას შემდეგ, რაც დასახულ მიზანს მიაღწიეს, არაერთ ფილმში ითამაშეს და მაყურებლების სიყვარული და პრესტიჟული ჯილდოები მოიპოვეს:
1. რაიან გოსლინგი
ჩვენ ყველამ დავტოვეთ საკუთარი ოჯახი, სახლი, მეგობრები და სამსახური იმისთვის, რომ ჩვენი ოცნება აგვეხდინა. მიუხედავად იმისა, რომ წარმატების ძალიან პატარა შანსი იყო, მაინც ვიბრძოდით მიზნის მისაღწევად. და როდესაც სინჯებზე გვიბარებდნენ, ჩვენ შევდიოდით ოთახში, რომელიც სავსე იყო ზუსტად ჩვენნაირი ადამიანებით. შემდეგ უკვე იმაზე ვფიქრობდით, თუ როგორ წარმოგვეჩინა თავი მათგან განსხვავებულად.
2. მერილ სტრიპი
ვფიქრობ, რომ კარგი მსახიობი ვერ იქნები, თუ ადამიანები და მოვლენები არ გაინტერესებს. იმ შემთხვევაში კი, თუ ეს თვისება გაგაჩნია, მაშინ აუცილებლად გინდა კიდევ უფრო მეტის გაგება. ყოველ შემთხვევაში, მე სწორედ ცნობისმოყვარეობა დამეხმარა საკუთარი პროფესიის კიდევ უფრო შეყვარებაში.
3. დენზელ ვაშინგტონი
როდესაც ადამიანები მსახიობობის სირთულეებზე საუბრობენ, ყოველთვის ვფიქრობ – გაუშვით თქვენი შვილი ერაყში და მიხვდებით რა არის ნამდვილი სირთულე! ფილმი კი უბრალოდ ფილმია, რომელიც უამრავ შესაძლებლობას გაძლევს. დიახ, ეს ნამდვილად საჩუქარია.
4. ნიკოლ კიდმანი
როგორც მსახიობი, ვცდილობ ყოველთვის გახსნილი და მაქსიმალისტი ვიყო. ყველა პერსონაჟი განსხვავებულია ერთმანეთისგან, რაც ადაპტაციის საოცარ უნარს მოითხოვს. ვფიქრობ, ჩვენს სამუშაო პროცესში ეს ყველაზე მნიშვნელოვანია – მოერგო იმ გარემოს, სადაც შენი გმირი ცხოვრობს.
5. მაიკლ ფასბენდერი
მნიშვნელობა არ აქვს თუ რა ტიპის ფილმზე ვმუშაობ და რამდენია მისი ბიუჯეტი, მე ყოველი მათგანისათვის თანაბრად ვემზადები – მაქვს ბევრი “საშინაო დავალება” და როდესაც გადასაღებ მოედანზე მივალ, აუცილებლად იდეებით სავსე უნდა ვიყო.
6. ჰილარი დაფი
ჩვენ ძალიან ცვალებად ინდუსტრიაში ვმუშაობთ, სადაც ყოველთვის ვცდილობთ გავაკეთოთ ჩვენი შესაძლებლობების მაქსიმუმი, თუმცა ისიც უნდა გვახსოვდეს, რომ კინოსამყაროს მიღმა არსებობს რეალური ცხოვრებაც.
7. ვიოლა დევისი
ყოველთვის ვწერ ჩემი პერსონაჟის ბიოგრაფიას და ვცდილობ მაქსიმალურად შევავსო ცარიელი ადგილები. როგორია მისი წარსული? ჰყავს თუ არა და-ძმა? რა საიდუმლოებას ინახავს? რომელია მისი საყვარელი ფერი? სწორედ ეს არის ის, რასაც პირველ რიგში ვაკეთებ.
8. მეთ დეიმონი
ხშირად მსახიობებს გვეუბნებიან, რომ ძალიან შევიცვალეთ. სინამდვილეში კი, ჩვენ უბრალოდ ვიღვიძებთ და ვიცით, რომ რეალურად არაფერი შეცვლილა. სამყარო ისევ ისეთია, უბრალოდ შეიცვალა მისი დამოკიდებულება შენ მიმართ.
9. ენდრიუ გარფილდი
ძალიან მომწონს ის ფაქტი, რომ ყოველწლიურად ახალ-ახალი როლის მორგება მიწევს. ერთ დღეს უნდა ვიცოდე, თუ როგორ განვასახიერო მღვდელი, მეორე დღეს კი პოლიციელი. მე ძალიან მინდა ყველასა და ყველაფრის შესახებ ყველაფერი ვიცოდე, თუმცა ეს, რა თქმა უნდა, შეუძლებელია.
10. ჯენიფერ ლოურენსი
გულწრფელად გეტყვით, ეს ყველაფერი სისულელეა! ვერ ვხვდები, რატომ მეუბნებიან კომპლიმენტებს მაშინ, როდესაც არსებობენ ექიმები და მეხანძრეები. ისინი ადამიანებს სიცოცხლეს უნარჩუნებენ… მე კი უბრალოდ კინოში ვთამაშობ!
