90-იანების თაობას კარგად ახსოვს, თუ რა გატაცებით უყურებდა ამ პერიოდის რომანტიკულ კომედიებს, რომლებიც დღეს უკვე კლასიკად ითვლება. განსაკუთრებით საყვარელი რომკომების სიაში ალბათ ყველა დაასახელებს სურათებს: როდესაც ჰარი შეხვდა სალის, უძინარები სიეტლში და თქვენთვის წერილია.
ამ ფილმების წარმატებაში, რასაკვირველია, მთავარი წვლილი მიუძღვის ოქროსთმიან, დიდი, მეოცნებე თვალების მქონე ლამაზმანს, ნიჭიერ მსახიობს და რომანტიკული კომედიების მშვენებას, მეგ რაიანს. 1981 წელს ის პირველი კინოროლით გამოჩნდა და წარმატებამაც არ დააყოვნა. იმდენად, რომ მეგმა კოლეჯში სწავლას თავი დაანება სწორება მთლიანად კინოკარიერაზე აიღო. 90-იანები მსახიობის ოქროს ხანა დადგა – ამ პერიოდში გამოვიდა ზემოთ ნახსენები ჰიტები და მეგ რაიანის სახელი სამუდამოდ დაუკავშირდა რომანტიკული კომედიების კლასიკას. კლასიკური რომკომების გარდა რაიანი გამოჩნდა კინოგაქირავების ჰიტებში: The Doors, ქეითი და ლეოპოლდი და ანგელოზების ქალაქი, გარდა ამისა გაახმოვანა მთავარი პერსონაჟი ცნობილ მულტფილმში ანასტასია.
მაგრამ ეს იყო და ეს – 2000-იანების დასაწყისიდან მეგ რაიანი ჰოლივუდიდან გაუჩინარდა. რატომ მოხდა ასე? რა არის მთავარი მიზეზები იმისა, რომ რომანტიკული ფილმები ქალღმერთი ეკრანებს აღარ ამშვენებს? ერთად გავიგოთ, რატომ დაგვეკარგა ყველასთვის საყვარელი მეგ რაიანი.
პირველი ნაბიჯები
1991 წელს, როცა რაიანის გზები მსახიობ დენის ქუედთან გადაიკვეთა, ჰოლივუდს ახალი მშვენიერი წყვილი შეემატა. ისინი ერთად ცხრა წელი ცხოვრობდნენ (რაც ჰოლივუდისთვის მთელი ეპოქაა) და ერთობლივი ვაჟიც შეეძინათ, სანამ სკანდალურად დაშორდებოდნენ.
მეგ რაიანი, რომელსაც ტაბლოიდები და ყვითელი პრესა უკვე უწოდებდნენ მეტსახელად “ამერიკის გულის ვარდს” უწოდებდნენ, დენის ქუეიდის ნაცვლად რასელ ქროუს გაუმიჯნურდა და ქმარი მიატოვა.
ეს ფაქტი კიდევ უფრო სკანდალური ჩანდა იმის გათვალისწინებით, რომ მეგს ქუეიდთან რვა წლის ვაჟი ჰყავდა. რაიანის ამ გადაწყვეტილებას დიდი ხმაური მოჰყვა და მას ქმრის ღალატში ადანაშაულებდნენ, მაგრამ მსახიობმა აღნიშნულ გადაწყვეტილებასთან დაკავშირებით დუმილი არჩია და საკუთარი დამოკიდებულება ამ ყველაფრის შესახებ კარგა ხანს არ გაუსაჯაროებია.
სკანდალი და საზოგადოება
რაიანმა დაშორებიდან კარგა ხნის შემდეგ W-სთან ინტერვიუში აღიარა, რომ მთელი ეს ამბავი მისი დიდი შეცდომა იყო. მაგრამ არამარტო მისი. რაიანი განსაკუთრებით ნაწყენი იყო საზოგადოების რეაქციაზე და აგორებულ ჭორებზე, რადგან ქუეიდთან მისი ქორწინება სკანდალმა მთლიანად გაანადგურა და მსახიობს შანსი არ დაუტოვა. გარდა ამისა, მსახიობმა დასძინა, რომ იმ პერიოდში ქუეიდიც ხვდებოდა სხვა ქალებს და რომ ჰოლივუდში, ისევე როგორც ყველგან, ქალების მიმართ ქცევის სხვაგვარი სტანდარტი არსებობს.
ასეა თუ ისე, ქმართან სკანდალურად გაყრამ რაიანის კარიერას ჩრდილი მიაყენა და მისი ვარსკვლავური პოპულარობა თანდათან გაქრა.
ჰოლივუდის მიტოვება
პრესაში და მედიაში ატეხილი მითქმა-მოთქმა რაიანის კარიერას სერიოზულ საფრთხეს უქმნიდა, მაგრამ მსახიობს ეს დიდად არ ანაღვლებდა. “ის მივიღე, რაც საიდუმლოდ ყველაზე მეტად მინდოდა – თავად მე ვყოფილიყავი საკუთარი ცხოვრების წარმმართველი.”
ამჟამად მსახიობი წყნარი ცხოვრებით ცხოვრობს ნიუ-იორკში. მას ხშირად ამჩნევენ საჯარო ადგილებში მის “არასტაბილურ” ბოიფრენდთან, მუსიკოს ჯონ მელენკამპთან და აყვანილ შვილთან, დეიზისთან ერთად.
როგორც მსახიობი ამბობს, მას არასდროს მოსწონდა თავისი, როგორც “ამერიკის გულის ვარდის” ან “კარის მეზობელი გოგონას” იმიჯი. “მგონია, რომ ვიღაცების რაღაც იდეების განხორციელება და პროექტი ვიყავი, ვიდრე საკუთარი თავი. ეს მე არ მომწონდა” – აღნიშნა მსახიობმა, – “კარის მეზობელი გოგონა? მე “ჩვეულებრივი” პერსონა არასდროს ვყოფილვარ”.
წარუმატებელი პლასტიკური ოპერაციები
მსახიობის კარიერაზე გარკვეულწილად უარყოფითად მისმა პლასტიკურმა ოპერაციებმაც იმოქმედა. “რა დაემართა მეგ რაიანის სახეს?” – წერდა ყველა ტაბლოიდი, როცა მსახიობის შეცვლილი გარეგნობა შეამჩნიეს. ნუთუ ესეც მისი არჩევანი იყო, რათა კინოს აღარ დაბრუნებოდა?
“მე იმდენად ასაკოვანი ვარ, რომ მახსოვს, როცა მეგ რაიანი მეგ რაიანივით გამოიყურებოდა” – აღნიშნა ტვიტერის ერთმა ენამწარე იუზერმა, როცა 2016 წელს მსახიობი “ტონის” დაჯილდოებაზე გამოჩნდა.
რაიანმა საკუთარ გარეგნობაზე ატეხილ ახალ მითქმა-მოთქმას პასუხი გასცა და აღნიშნა, რომ მთელი ეს აჟიოტაჟი არ ანაღვლებს. “არც მინდა ყურადღება მივაქციო ამ ყველაფერს. დღეს უამრავი რამ არის მსოფლიოში, რაც შეიძლება არ მოგწონდეს, სხვისი განსჯა ძალიან იოლია. ჰეითერობა არ მესმის, თუმცა არ მაღელვებს. მე და ადამიანები, ვინც მე მიყვარს, შვილებზე და იმ სამყაროზე ვღელავთ, რომელშიც მათ მოუწევთ ცხოვრება – რით იკვებებიან, რით სუნთქავენ…”
მსახიობის დღევანდელი ცხოვრება
წლების განმავლობაში მეგ რაიანს, მიუხედავად მრავალი თაყვანისმცემლის სურვილისა, კინოში დაბრუნებაზე აღარ უფიქრია და ჩანს, არც ახლა ფიქრობს. ის პირადი ცხოვრებით სრულიად კმაყოფილი ჩანს, თუმცა რამდენიმე პროექტსა თუ დაჯილდოებებზე მაინც ვიხილეთ.
რაიანს 2009 – 2015 წლებს შორის არც ერთი როლი არ ჰქონია (თუ არ ჩავთვლით ვებსერიალს), თუმცა მას შემდეგ ის საზოგადოებრივად უფრო აქტიური გახდა.
მსახიობის ერთ-ერთი უკანასკნელი მსხვილი პროექტი ფილმის, სახელად ითაკა, რეჟისორობაა, რომელშიც რაიანის ყოფილი “განუყრელი” კინოპარტნიორი ტომ ჰენკსი მონაწილეობდა. გარდა ამისა, მსახიობი გამოჩნდა სატელევიზიო შოუში Picture Paris.
მსახიობმა რამდენჯერმე აღნიშნა, რომ სურს, კინოკარიერას დაუბრუნდეს. შეიძლება ეს არ იყოს მხატვრული ფილმი, რომელშიც ის როლს შეასრულებს, თუმცა სხვა პროექტებს წინ არაფერი უდგათ.
“რეალურად, საკუთარი თავი მსახიობად სერიოზულად არასდროს განმიხილავს. ვფიქრობ, გულის სიღრმეში მწერალი ვარ, ასე რომ, ყველაფერი ლოგიკურად განვითარდა…” – აღნიშნა მან ერთ-ერთ ბოლოდროინდელ ინტერვიუში.
“დამღალა იმის ლოდინმა, როდის გავხდები კვლავ რჩეული. როცა მსახიობი ხარ, უბრალოდ თაღლითობ. პროდიუსერს სხვა სფეროებში გახედვაც უწევს, სხვა საფეხურებზე ასვლა. ამჟამად მე პირველ საფეხურზე ვარ.”
დიახ, ის “ამერიკის გულის ვარდი” აღარ არის და მის საყვარელ სახეს ეკრანებზე ვეღარ ვხედავთ, მაგრამ თავად მსახიობი თავს ბედნიერად და ჯანმრთელად გრძნობს, აკეთებს იმას, რაც მოსწონს და უნდა შევეგუოთ მეგ არიანს ისეთს, როგორიც არის. მაინც ვიტოვებთ იმედს, რომ თუ როლს არა, პროდიუსერის ამპლუაში მაინც შემოგვთავაზებს რაიმე საინტერესო პროექტს.
მომზადებულია throwbacks.com-ის მიხედვით.
