75-ე “ოქროს გლობუსის” დაჯილდოების ცერემონიალზე, რომელიც 8 იანვარს, ჩვენი დროით დილის 5 საათზე გაიმართება, ნომინანტების ამპლუაში ბევრ ახალგაზრდა მსახიობს ვიხილავთ, თუმცა ბევრი მათგანი უკვე კაშკაშა ვარსკვლავია. გადავწყვიტეთ, დაჯილდოებამდე გადავხედოთ ახალგაზრდა, 20-დან 30 წლამდე ნომინანტებს და როლებს, რომელთა გამოც მათ ეს პატივი ერგოთ.
სირშა რონანი
23 წლის რონანისთვის, რომელმაც გასულ წელს Lady Bird-ში შესრულებული როლით გამოიჩინა თავი, ოქროს გლობუსის ნომინანტობა უცხო არაა. ვარსკვლავი, რომელიც ხმაურიანად გამოჩნდა 2007 წელს ფილმში მონანიება (და გლობუსზეც წარადგინეს), ამ პრემიაზე 2015 წელსაც იყო ნომინირებული 2015 წელს ფილმისთვის ბრუკლინი.
ტიმოთი შალამე
ვიზუალურად დიდებული და სულისშემძვრელი ახალი ფილმის – შენი სახელით მომმართე, – ახალბედა მონაწილემ, 22 წლის შალამე დასამახსოვრებელი როლით (ყმაწვილკაცი, რომელსაც მამამისის დოქტორანტი შეუყვარდება) ოქროს გლობუსის მორიგი 30 წლამდელი ნომინანტია.
ქეთრინ ლანგფორდი
Netflix-ის გახმაურებული ახალი სერიალის, 13 მიზეზის ვარსკვლავი, 21 წლის ლანგფორდი დამამთავრებელი სკოლის მოსწავლე ჰანა ბეიკერს თამაშობს, რომელიც თანაკლასელებსა და ახლობლებს თვითმკვლელობის შემდეგ კასეტებზე საკუთარ ჩანაწერებს უტოვებს, რომლებშიც სუიციდის მიზეზებს უხსნის და მათ სდებს ბრალს. ამჟამად სერიალის მეორე სეზონის გადაღება მიმდინარეობს, რომელშიც პერსონაჟები მეტად გაიხსნებიან და მათ გარშემო მეტი ისტორია განვითარდება.
რეიჩელ ბროსნაჰანი
27 წლის ბროსნაჰანი 50-იანი წლების პერიოდის შესახებ გადაღებულ Amazon-ის დრამაში – The Marvelous Mrs. Maisel – დიასახლისად ქცეულ კომედიანტს თამაშობს. მისი სამსახიობო ოსტატობა უკვე ბევრჯერ გახდა კრიტიკოსთა ყურადღების საგანი და ნომინაციაც დაიმსახურა.
დენიელ კალუუია
28 წლის ახლად აღმოჩენილ ვარსკვლავს სახელი დასამახსოვრებელმა დრამატულმა პერფორმანსმა გაუთქვა უახლეს სერიალში Get Out (თავს უშველე). მისი თქმით, საკუთარი წარმატების მთავარი გასაღები პერსონაჟის მიმართ ემპათიაა.
ფრედი ჰაიმორი
ჰაიმორი, რომელიც ჯერ მხოლოდ 25-ისაა, ოქროს გლობუსზე სერიალში კარგი ექიმი შესრულებული როლისთვისაა წარდგენილი. თუმცა ერთ-ერთი დასამახსოვრებელი როლი მან გაცილებით პატარა ასაკში – ტიმ ბარტონის ჩარლი და შოკოლადის ქარხანაში (ჩარლი) შეასრულა.
მარგო რობი
27 წლის მარგო, ახალგაზრდული ასაკის მიუხედავად, უკვე პოპულარობის ზენიტშია. მსახიობი, რომლის ვარსკვლავურ გზაზე ერთ-ერთი მნიშვნელოვანი ნაბიჯი აღმოჩნდა 2013 წელს უოლ სტრიტის მგელში შესრულებული როლი, ოქროს გლობუსზე ამჟამად მოციგურავე ტონია ჰარდინგის როლით (ფილმში მე, ტონია) არის წარდგენილი.
ემა სტოუნი
ასევე კარიერის ზენიტში მყოფი – ოქროს გლობუსისა და ოსკარის მფლობელი, ლა ლა ლენდის ვარსკვლავი ემა სტოუნი ამჟამად 29 წლისაა. მან 2017 წელს შესანიშნავად ითამაშა ჩოგბურთის ჩემპიონის, ბილი ჯინ კინგის როლი ფილმში სქესთა ომი და კიდევ ერთხელაა ოქროს გლობუსის მოპოვების კანდიდატი.
ანსელ ელგორთი
23 წლის ბეიბი დრაივერის ვარსკვლავი ოქროს გლობუსზე თავისი ყოფილი კლასელის – ტიმოთი შალამეს მეტოქე იქნება. “ცხოვრება მართლაც სიგიჟეა: მე და ტიმი კალათბურთის ერთ გუნდში ვთამაშობდით, ერთი და იმავე მასწავლებლები გვყავდა დრამასა და ბუნებისმეტყველებაში, ახლა კი გლობუსზეც ერთად ვართ წარდგენილები!!!” – განაცხადა ელგორთმა ინსტაგრამის გვერდზე, რომელზეც კალათბურთის მატჩისას გადაღებული ერთობლივი ფოტო დადო”.
შეილინ ვუდლი
26 წლის ვუდლი HBO-ს დიდ პატარა ტყუილებში შესრულებული როლის წყალობით ოქროს გლობუსზე მეორედაა წარდგენილი, თუმცა პირველად ყურადღების ცენტრში 2011 წელს მემკვიდრეებში ჯორჯ კლუნისთან ერთად გამოჩენის შემდეგ მოექცა და გლობუსის პირველი ნომინაციაც დაიმსახურა.
