კინოფილმში სცენები ბუნებრივი და ცოცხალი რომ გამოვიდეს, მსახიობებს ხშირად უწევთ ჯანმრთელობისთვის სარისკო ტრიუკების შესრულება. კასკადიორები, დუბლიორები, კომპიუტერული გრაფიკა – ამ ყველაფრის შესახებ, რასაკვირველია, ყველამ იცის, თუმცა ეს უსაფრთხოების 100%-იან გარანტიას მაინც არ იძლევა. მსახიობები ტრავმებს მაინც იღებენ და ეს ხშირად ერთი შეხედვით სრულიად უხიფათო სიტუაციაში, სრულიად ჩვეულებრივი სცენების გადაღებისასაც ხდება, მაყურებელი კი ვერაფერს ამჩნევს. დიახ, ზოგჯერ ასეთ კადრებს ფილმში ტოვებენ, თუმცა წარმოდგენა არავის აქვს, რომ ამა თუ იმ სცენისას მსახიობმა ფიზიკური ზიანი ან ტრავმა მიიღო.
დღეს გადასაღებ მოედანზე მომხდარ ასეთ ინციდენტებზე გესაუბრებით – იმ ტრავმებზე, რომლებიც მსახიობებმა პირდაპირ ფილმის გადაღებისას მიიღეს. ბოლოს კი ტრავმების მხრივ რეკორდსმენ მსახიობს გაგაცნობთ.
დიანა კრიუგერი – უსახელო ნაბიჭვრები
უსახელო ნაბიჭვრების გადასაღებ მოედანზე კვენტინ ტარანტინომ დიანა კრიუგერის დახრჩობის სცენისას ისე გადაამლაშა, რომ მსახიობმა გონება დაკარგა. რეჟისორს სურდა, მაქსიმალურად რეალისტური ეფექტი მიეღო, თუმცა ზედმეტი მოუვიდა.
შარლიზ თერონი – ეონ ფლაქსი
ერთ-ერთ საბრძოლო სცენაში შარლიზ თერონმა მალაყის დროს არასწორი მოძრაობა გააკეთა, უხერხულად დავარდა და კისერი დაიზიანა. გგონიათ ამ ინციდენტმა შეაშინა? რეაბილიტაციის შემდეგ გადასაღებ მოედანზე დაბრუნებული თერონმა მოითხოვა, ტრიუკები კვლავ დამოუკიდებლად შეესრულებინა.
მარგარეტ ჰემილტონი – ოზის ჯადოქარი
მარგარეტ ჰემილტონი აღნიშნულ ფილმში დასავლეთის ალქაჯს თამაშობდა, რომელიც, სიუჟეტის მიხედვით, კვამლის ღრუბელში უჩინარდებოდა. გადაღებისას პიროტექნიკოსებს საქმე გეგმის მიხედვით არ წაუვიდათ და კვამლი, რომელშიც მსახიობი იყო გახვეული, უეცრად აალდა. მარგარეტმა სახისა და ხელების მესამე ხარისხის დამწვრობა მიიღო.
ჩენინგ ტატუმი – მეცხრე ლეგიონის არწივი
ამ ფილმში მრავალი სცენის გადაღება წყალში მიმდინარეობდა. მუშაობა საკმაო სიცივეში უწევდათ. გაყინული ტატუმი გათბობის მიზნით ხშირად ივლებდა თბილ წყალს. ერთხელ მის ასისტენტს ცხელი წყლის განელება დაავიწყდა და მსახიობს ლამის მდუღარე წყალი გადაავლო. წყალმა მაშინვე შეჟონა სქელი აბჯრის ღიობებში და მსახიობს ფეხებშორის არსებული მგრძნობიარე ნაწილი დაუწვა.
სილვესტერ სტალონე – როკი 4
საბრძოლო სცენა ბუნებრივი რომ გამოსულიყო, სილვესტერ სტალონემ დოლფ ლუნდგრენს სთხოვა, არ დაენდო და მაგრად დაერტყა. ერთ-ერთი დარტყმა მართლაც ისეთი ძლიერი აღმოჩნდა, რომ სტალონეს მკერდის კუნთი სერიოზულად დაუზიანა.
ჰოლი ბერი – გოთიკა
რობერტ დაუნი ჯუნიორმა ზემოთ მოცემულ სცენაში ჰოლი ბერის ხელები ისეთი ძალით გაუშალა, რომ მხარი მოსტეხა. მსახიობის გამოჯანმრთელებამდე გადაღებების შეჩერება გახდა საჭირო.
რობერტ დაუნი ჯუნიორი – შერლოკ ჰოლმსი
რობერტ დაუნი ჯუნიორმა თავადაც მიიღო ტრავმა. შეროლოკ ჰოლმსში ერთ-ერთი ბრძოლის სცენის გადაღებისას მას ყბაში ისე მაგრად მოხვდა, რომ სერიოზული მოტეხილობა მიიღო და ექვსი ნაკერის დადება დასჭირდა.
მიშელ იეო – ჩასაფრებული ვეფხვი, დამალული დრაკონი
ამ ფილმში მიშელ იეო უამრავ საბრძოლო ილეთს თავად ასრულებს და თანაც, დიდი ოსტატობით. თუმცა ერთ-ერთი რთული ტრიუკების შესრულებისას მსახიობმა სერიოზულად იტკინა მუხლი. აღმოჩნდა, რომ მას სახსარი დაუზიანდა და ოპერაციული ჩარევაც კი დასჭირდა.
ელიზაბეტ ტეილორი – ეროვნული ხავერდი
ეროვნული ხავერდის გადაღებისას სრულიად ახალგაზრდა ელიზაბეტ ტეილორმა სერიოზული ტრავმა მიიღო – ის ცხენიდან ჩამოვარდა და ხერხემალი დაიზიანა. იმდენად, რომ სრული პარალიზების საფრთხეც კი იყო. ფილმის გადაღებები მსახიობმა მკაცრი მეთვამყურეობის ქვეშ გააგრძელა, დანარჩენი ცხოვრება კი ხერხემლის ძლიერი ტკივილებით იტანჯებოდა.
ჰილარი სუონკი – P.S. მე შენ მიყვარხარ
წარმოიდგინეთ, მსახიობმა ტრავმა შიშველი სცენების გადაღებისასაც შეიძლება მიიღოს. იმ სცენის გადაღებისას, როცა ჯერარდ ბატლერი სტრიპტიზს ასრულებს, მსახიობს აჭიმი გაუწყდა და მის კინოპარტნიორს, ჰილარი სუონკს პირდაპირ შუბლში მოხვდა. ჰილარის შუბლი იმდენად დაუზიანდა, რომ შეხვევა გახდა საჭირო.
რაიან გოსლინგი – პირველი ადამიანი მთვარეზე
ფილმის გადაღებამდე რაიან გოსლინგს NASA-ს პეციალური აპარატის მეშვეობით ავარჯიშებდნენ, რათა ასტრონავტის როლში უკეთ შესულიყო. ერთ-ერთი ასეთი წვრთნისას მსახიობმა ძლიერად მიარტყა თავი, თუმცა ამისთვის ყურადღება არ მიუქცევია. გარკვეული დროის შემდეგ მსახიობს საავადმყოფოში გადაყვანა მოუწია თავის ძლიერი ტკივილების გამო. ექიმებმა მას ტვინის შერყევის დიაგნოზი დაუსვეს.
აარონ პოლი – მძიმე დანაშაული
აარონ პოლმა სერიალის მეორე სეზონის იმ სცენაში, როცა მას ბუტაფორიულ კართან ერთად ქოხიდან გარეთ ისვრიან, გონება დაკარგა. მისი საავადმყოფოში გადაყვანა გახდა საჭირო, რადგან როგორც აღმოჩნდა, მსახიობმა ტვინის შერყევა მიიღო.
ბრიუს უილისი – კერკეტი კაკალი
ფილმის გადაღებისას ბრიუსმა ფაქტობრივად სრულად დაკარგა ცალ ყურში სმენა. სროლის იმ სცენის გადაღებისას, როცა გმირი მაგიდის ქვეშ არის შემძვრალი, გამაყრუებელმა ხმებმა მსახიობს სმენა სერიოზულად დაუზიანა. ეს კი იმის ბრალი იყო, რომ მას ყურის დამცავები არ ეკეთა და რამდენიმე დუბლის განმავლობაში საშინელ ხმაურს იტანდა.
მეთ ლებლანკი – მეგობრები
სცენაში, რომელშიც ჯოუი და ჩენდლერი სავარძლისთვის “იბრძვიან”, ძნელია რაიმე შეამჩნიო. არადა მაშინ, როცა მეთ ლებლანკი სავარძელში ჩახტა, მხარი იღრძო. მეთმა, როგორც პროფესიონალმა, პირდაპირ ეთერში თამაშისას ტკივილი არც კი შეიმჩნია და ჩვეული ღიმილით განაგრძო თამაში.
ჯერემი რენერი – შურისმაძიებლები: უსასრულობის ომი
სუპერგმირული როლების შესრულება მსახიობებისთვის იოლი სულაც არაა. ჯერემი რენერმა რთული ტრიუკის შესრულებისას ორივე ხელი ერთდროულად მოიტეხა: ერთი მაჯის ძვალთან, მეორე კი იდაყვთან.
ბონუსი
შეიძლება აქამდეც მიხვდით, რომ გადასაღებ მოედანზე მიღებული ტრავმების რეკორდსმენი ჯეკი ჩანია. მან სასწაულებრივად მოახერხა და ცხვირი მხოლოდ 4-ჯერ გაიტეხა, მთელი კარიერის განმავლობაში კი ჯეკის სამი ათასამდე მცირე და სერიოზული ტრავმა მიუღია. აშკარაა – ჯეკი ჩანი ამქვეყნად ყველაზე იღბლიანი მსახიობია!
