2018 წელს გამოვიდა კლინტ ისტვუდის კრიმინალური დრამა – ნარკოკურიერი, რომელშიც მთავარ როლს თავად კლინტ ისტვუდი თამაშობს. ფილმის სცენარი დაეფუძნა The New York Times-ში გამოქვეყნებულ სტატიას, რომელიც სინალოას კარტელის 90 წლის ნარკოკურიერის ამბავს აღწერდა.
როგორია ნამდვილი ფაქტები და როგორ გაცოცხლდა ისინი ეკრანზე? ამას ჩვენი სტატიიდან შეიტყობთ…
მართლა ერლ სტოუნი ერქვა რეალურ ნარკოკურიერს?
არა. მისი ნამდვილი სახელი ლეო შარპია. სახელის გარდა ფილმში სხვა რაღაცებიც შეცვლილია. მაგალითად: ლეო შარპი გახლდათ მეორე მსოფლიო ომის და არა კორეის ომის ვეტერანი, მისი მშობლიური ქალაქი კი დეტროიტია და არა ჩიკაგო. უფრო მეტიც, ლეო შარპი ინსპირაციის წყარო იყო ისტვუდისთვის, მისი პიროვნება კი რეჟისორმა საკუთარი ბაბუის მახასიათებლებზე ააგო.
ბაბუაჩემი მუშაობდა, როგორც ძველი კაცი; დადიოდა, როგორც ძველი კაცი, და მე ყოველთვის ვცდილობდი, მისთვის მიმებაძა სიარულში, ლაპარაკში, საერთოდ ყველაფერში…
როგორი იყო ლეო შარპის ოჯახური მდგომარეობა?
ფილმში შარპის ოჯახური მდგომარეობა თავიდან ბოლომდე გამოგონილია. Daily Mail-ის 2015 წლის სტატიაში წერია, რომ ლეო შარპს სამი შვილი და ცოლი – სახელად ანა ჰყავდა. ისინი დაქორწინებულები იყვნენ შარპის გარდაცვალების მომენტშიც (2016 წელს) და ქალი არ გარდაცვლილა კიბოთი, როგორც ეს ფილმშია ნაჩვენები.
მართლა ჰქონდა ყვავილების ბიზნესი რეალურ ნარკოკურიერს?
დიახ. Brookwood Gardens. ლეო შარპი ამ სფეროში სპეციალიზებული იყო და ფლობდა 180 სახეობის მცენარეს, რომლებსაც მიჩიგანში აშენებდა.
1990-იან წლებში შარპის ბიზნესის საქმე ცუდად წავიდა და მოხუცმა გადაწყვიტა, ხელი ახალი საქმისთვის მოეკიდა…
მართლა არ იცოდა ლეო შარპმა თავიდან ნარკოტიკის გადატანის შესახებ?
ეს კი სიცრუეა. ის არა გაუცნობიერებლად, არამედ საკუთარი ნებით ჩაერთო ნარკობიზნესში და ამას მისივე ადვოკატი ადასტურებს.
ხელისუფლების განცხადებით, მათ მიერ მოპოვებული სამხილები ცხადჰყოფს, რომ შარპს ნარკოტიკი უკვე გადაჰქონდა 2000 წელს, მაშინ, როდესაც 76 წლის იყო და არა 2005 წელს, როგორც ეს ფილმშია ნაჩვენები.
ნარკოკურიერად ასაკოვანი ადამიანის აყვანა, რომელსაც კრიმინალური წარსული არ აქვს, კარტელებისთვის ჩვეული მოვლენაა. თუნდაც სინალოას კარტელს შარპის გარდა კიდევ ჰყავდა ერთი, 57 წლის ნარკოკურიერი ოკლაჰომადან.
ნარკოტიკებთან ბრძოლის დეპარტამენტის ერთ-ერთი აგენტის სიტყვებით: ლეო შარპი სრულყოფილი კანდიდატი იყო კარტელისთვის. მას ჰქონდა ლეგალური პირადობის მოწმობა, იყო მოხუცი და არ ჰქონდა კრიმინალური წარსული…
რამდენ ხანს მუშაობდა შარპი კარტელისთვის?
ლეო შარპს ნარკოტიკი თითქმის ათი წლის განმავლობაში გადაჰქონდა, სანამ რამონ რამოსმა, რომელიც კარტელისთვის ბუღალტრად მუშაობდა, ის ნარკოტიკებთან ბრძოლის დეპარტამენტის აგენტთან არ ჩაუშვა (ბრედლი კუპერის პერსონაჟთან, რომელიც რეალურ პიროვნებას – ჯეფ მურს ეფუძნება).
რამოსმა მურს უთხრა, რომ იცნობდა მოხუც ნარკოკურიერს, სახელად ტატას. მათი შეხვედრა კარტელის ერთ-ერთ საწყობში მოაწყვეს. ტატა, რომლის ნამდვილი სახელიც ლეო შარპი იყო, ფულით სავსე ჩანთების წასაღებად მოვიდა. მოგვიანებით ჯეფ მურმა, რომელიც მათ უთვალთვალებდა, განაცხადა:
როდესაც ასაკი – 87 წელი გავიგე, მოლოდინი გამიჩნდა, რომ ეტლში მჯდომ მოხუცს ვნახავდი. ამის ნაცვლად კი, დავინახე კაცი, რომელიც შესანიშნავ ფორმაში იყო. გაოცებული დავრჩი.
როგორ აიყვანეს ნარკოკურიერი?
ლეო შარპი დააკავეს 2011 წლის 21 ოქტომბერს, 87 წლის ასაკში, როდესაც სატვირთოს მართავდა. ნარკოტიკებთან ბრძოლის დეპარტამენტის თანამშრომლები გზატკეცილზე 70 მილის მანძილზე იყვნენ განლაგებულნი, რომ თუ შარპი გაქცევას ეცდებოდა, დაეკავებინათ.
ერთ-ერთმა ოფიცერმა ის თითქოსდა სტანდარტული პროცედურით გააჩერა. შარპმა გაჩერების მიზეზი იკითხა. სხვა ოფიცერმა კი სატვირთოში ძაღლი, სახელად აპოლო აუშვა.
ლეო შარპს სატვირთოში 104 კილოგრამი კოკაინი აღმოუჩინეს. როგორც The New York Times-ში წერია, დაკავებისას შარპმა ოფიცერს უთხრა: რატომ არ მომკლავთ და მომცემთ საშუალებას, უბრალოდ, პლანეტა დავტოვო?
სასჯელი და აღსასრული
ლეო შარპმა სინამდვილეშიც ძალიან დიდი რაოდენობის ნარკოტიკი გადაიტანა. მხოლოდ 2010 წელს მას ყოველთვიურად 200 კილოგრამი კოკაინი გადაჰქონდა, რისთვისაც 1 000 000 მილიონ დოლარზე მეტი გამოიმუშავა. უცნაური ისაა, რომ ნარკოკურიერი გამომუშავებული ფულით მართლა ეხმარებოდა ადამიანებს, როგორც ეს ფილმშია ნაჩვენები.
ლეო შარპს სასამართლომ განაჩენი 2013 წლის 8 ოქტომბერს გამოუტანა და 3 წლით ფედერალურ ციხეში გაგზავნა. თუმცა, 2015 წელს ის გამოუშვეს ჯანმრთელობის მდგომარეობის გაუარესების გამო.
ნარკოკურიერი, რომელიც ადგილობრივ ლეგენდად იქცა, 2016 წელს, 92 წლის ასაკში გარდაიცვალა.
ნარკოკურიერი
წყარო: www.historyvshollywood.com
მოამზადა მარი ბექაურმა
