ევა მენდესი და რაიან გოსლინგი შესანიშნავად ახერხებენ პირადი სივრცის შენარჩუნებას. ისინი ძალიან იშვიათად ჩნდებიან ერთად საზოგადოებრივი თავშეყრის ადგილებში, თუმცა საიდუმლო არავისთვისაა, რომ წყვილი უკვე 7 წელია ერთმანეთზეა შეყვარებული.
სწორედ ამიტომ, გადავწყვიტეთ, მათი ისტორიის ის ნაწილი მოგვეთხრო, რაც ჩვენთვის ცნობილია. მაშ ასე, დავიწყოთ:
ევას გეგმებში ოჯახის ყოლა სულაც არ შედიოდა
ის ფიქრობდა, რომ ქორწინება საკმაოდ მოძველებული ინსტიტუტია და საერთოდაც არ არის საჭირო. ყოველ შემთხვევაში, მისთვის… სამაგიეროდ, რაიანი ყოველთვის ღია იყო სერიოზული ურთიერთობის ქორწინებით დასაგვირგვინებლად.
დიდი ხნის განმავლობაში, ყველა ფიქრობდა, რომ ის ოჯახს რეიჩელ მაკადამსთან შექმნიდა, თუმცა წყვილი ერთმანეთს 2008 წელს დაშორდა.
აღსანიშნავია ის ფაქტიც, რომ ევა არა მხოლოდ ქორწინების, არამედ შვილების ყოლის წინააღმდეგიც იყო… თუმცა, ეს ყოველივე მანამ, სანამ რაიანს შეხვდებოდა.
ადგილი ფიჭვნარში
მსახიობებმა ერთმანეთი 2011 წლის ზაფხულში, საერთო ფილმის გადასაღებ მოედანზე გაიცნეს, სადაც ისინი შეყვარებულებს განასახიერებდნენ. როგორც ხშირად ხდება, გრძნობები რეალურ ცხოვრებაშიც გაუჩნდათ… მოგვიანებით, წყვილი ერთად გაემგზვარა სიყვარულის ქალაქში და პრესაც თამამად ალაპარაკდა მათ რომანტიკულ ურთიერთობაზე.
ბავშვები
როგორც უკვე აღვნიშნეთ, ევას შვილების ყოლა არასოდეს სურდა, თუმცა რაიანთან შეხვედრამ მისი გეგმები შეცვალა. მიუხედავად იმისა, რომ ის მოზრდილ მუცელს საგულდაგულოდ მალავდა, მაინც გავრცელდა ხმები მისი სავარაუდო ორსულობის შესახებ. მართლაც, 2014 წლის სექტემბერში ქვეყანას ესმერალდა ამადა მოევლინა, ხოლო 2016 წლის აპრილში კი მისი უმცროსი დაიკო, ამადა ლიც გაჩნდა.
გასაიდუმლოებული ურთიერთობა
როგორც ჩანს, ევას ძალიან არ უყვარს პირად ცხოვრებაზე საჯაროდ საუბარი, რადგან ის თითქმის არასდროს ახსენებს რაიანს და ჟურნალისტებს მის შესახებ კითხვების დასმასაც უკრძალავს.
მიუხედავად იმისა, რომ პრივატულობის შენარჩუნებას რაიანიც შესანიშნავად ახერხებს, ის მაინც ვერ მალავს საკუთარ გრძნობებს საყვარელი ქალის მიმართ. ერთ-ერთ ინტერვიუში, Hello Magazine-თან მან გულწრფელად აღიარა, რომ ცხოვრების მთავარი ადამიანი იპოვა და სხვა არაფერი აინტერესებს. ხოლო, როდესაც ლა ლა ლენდისთვის ოქროს გლობუსი გადასცეს, სცენიდან საკმაოდ ამაღელვებელი სიტყვა წარმოთქვა:
როდესაც აქ დგახარ, ისედაც ცხადია, რომ ამ ყოველივეს უამრავი ადამიანის დამსახურებით მიაღწიე. სამწუხაროდ, დრო არ მეყოფა მათთვის მადლობის გადასახდელად, ამიტომ ვეცდები და მხოლოდ ჩემს ქალბატონს გამოვყოფ, რომელიც ჩვენს გოგონაზე ზრუნავდა მანამ, სანამ მე ვმღეროდი, ვცეკვავდი, ფორტეპიანოზე ვუკრავდი და კარიერის ერთ-ერთ ყველაზე მნიშვნელოვან როლს ვასრულებდი.
ამავდროულად, ის ორსულად იყო ჩვენს მეორე შვილზე და ეხმარებოდა საკუთარ ძმას სიმსივნესთან ბრძოლაში. დარწმუნებული ვარ, რომ არა ის, დღეს აქ ჩემ მაგივრად ვიღაც სხვა იდგებოდა. ასე რომ, მადლობა, ჩემო სიყვარულო!
ოჯახური ღირებულებები
ევამ ბოლო როლი 2015 წელს, რაიანისვე სადებიუტო ფილმში შეასრულა და მას შემდეგ კინოეკრანებზე აღარ გამოჩენილა. მან გადაწყვიტა საკუთარი დრო მთლიანად შვილებისათვის დაეთმო, რაც ალბათ წლების წინ თავადაც ვერ წარმოედგინა.
დადის ჭორები იმის თაობაზე, რომ წყვილმა 2016 წელს, საიდუმლო ვითარებაში იქორწინა… თუმცა, რა მნიშვნელობა აქვს მოაწერეს თუ არა მათ ხელი რაიმე დოკუმენტაციას, როდესაც ასეთი მწირი ინფორმაციითაც კი ცხადია – ისინი ერთად თავს არაჩვეულებრივად გრძნობენ და თავიანთ გოგონებთან ერთად სრულფასოვანი, ჯანსაღ ურთიერთობებსა და დიდ სიყვარულზე დაფუძნებული ოჯახი აქვთ!
