წაბლისფერი თმა, გონიერი, სხივიანი მზერა, ჰიფსტერულ-ჯადოსნური წვერი. მოხდენილი, ცოტაც ახირებული ლურჯი ლაბადა. უძლიერესი, ნახშირივით შავი ჯადოსნური ჯოხი – ასეთია ჯუდ ლოუ ახალგაზრდა ალბუს დამბლდორის როლში, რომელიც ჯადოსნური ცხოველების მეორე ფილმის, გრინდელვალდის დანაშაულების პოსტერზე სხვებთან ერთად გვიმზერს. მხცოვანი, ბრძენი და ფაქტობრივად უძლეველი ჯადოქრის ახალგაზრდობის ამბებს, ჩანს, ახალ ფილმში მნიშვნელოვანი ადგილი დაეთმობა.
მაგრამ რამ უბიძგა ფილმის შემქმნელებს, შერლოკ ჰოლმსისა და ახალგაზრდა პაპის ვარსკვლავი ახალგაზრდა დამბლდორის უპირველეს კანდიდატურად განეხილათ? მათი აზრით, რით უნდა ჰგავდეს ან განსხვავდებოდეს ახალგაზრდა დამბლდორი თეთრწვერა ბრძენი მოხუცისგან, რომელიც ჰარი პოტერის ფილმებიდან შევიყვარეთ?
ფილმის აღმასრულებელმა პროდიუსერმა დევიდ ჰეიმანმა პოტერომანებს გაუმხილა, რატომ შეარჩიეს ჯუდ ლოუ დამბლდორის როლზე, რომელიც ნიუტ სკამანდერს შეეკვრება, რათა ერთობლივი ძალებით იპოვონ გელერტ გრინდელვალდი.
“ერთ-ერთი მიზეზი, რის გამოც ჯუდ ლოუზე შევჩერდით, ისაა, რომ მასში პოტერის ფილმების დამბლდორთან ბევრი საერთო აღმოვაჩინეთ – მტკიცე გამოხედვა, ნაპერწკალი ლურჯ თვალებში, ორიგინალურობა… – განაცხადა ჰეიმანმა, – მოხუცებულ დამბლდორს აქვს უშრეტი ახალგაზრდული ენერგია, ხალისიანი და იუმორით სავსეა. ამრიგად, ის თითქოს ასხივებს ახალგაზრდულობას, ავტორიტეტს, ძალაუფლებას, და ამავე დროს, ონავრობას. ამიტომაც არავის უკვირს, რატომ არის დამბლდორი ყველასთვის საყვარელი მასწავლებელი და ექსტრაორდინალური ჯადოქარი. ჯუდ ლოუში დავინახეთ ყველაფერი, რაც დამბლდორს ახასიათებს და სხვებისგან გამოარჩევს”.
როგორც ვიცით, ხუთშაბათს Warner Bros.-მა ჯადოსნური ცხოველების მეორე ფილმის სათაური და პრომოპოსტერი გამოაქვეყნა, იმ მთავარი პერსონაჟებით, რომელთა გარშემოც განვითარდება სიუჟეტი. მეორე ფილმი 2018 წლის 16 ნოემბერს გამოვა, მთლიანობაში კი ჯადოსნური ცხოველების ხუთ ფილმს გადაიღებენ. სავარაუდო სათაურები პოტერიადას ავტორმა ჯოან როულინგმა უკვე მოიფიქრა.
