იტალიელ ვარსკვლავს, ჯინა ლოლობრიჯიდას, 4 ივლისს 90 წელი შეუსრულდა. მისი დაბადების დღე მთელმა რომმა იზეიმა.
“30-ს პლუს 30 და კიდევ 30.” – ასე მარტივად აღიქვამს მსახიობი თავის ასაკს, – “დაბერება ქალისთვის ნამდვილად დიდი დაბრკოლებაა, მაგრამ ცხოვრებისაგან იმდენად რთული გამოცდილება მივიღე, რომ ახლა ზუსტად ვიცი, როგორ გავუმკლავდე სირთულეებს!”
მსახიობი, მოქანდაკე, ფოტოჟურნალისტი, მომღერალი და სექსსიმბოლო, რომელიც თავისი დროის ულამაზეს ქალად აღიარეს, სოფი ლორენთან დაპირისპირებაზეც საუბრობს.
“არასოდეს შევჯიბრებივარ ვინმეს. მე ყოველთვის პირველი ვიყავი!” – აღნიშნავს იგი, თუმცა იქვე ორაზროვნად დასძენს, რომ წარმატებას მარტომ, მხოლოდ საკუთარი შრომით მიაღწია და პროდიუსერი არასოდეს დახმარებია.
ეს აშკარა მინიშნება კი, სავარაუდოდ, სოფი ლორენის ყოფილი ქმრისკენ არის მიმართული, რომელმაც დიდი ინვესტიცია ჩადო მეუღლის საერთაშორისო ასპარეზზე გასაყვანად.
შემოთავაზება ჰოლივუდიდან 1950 წელს ჯინამაც მიიღო, თუმცა მან ევროპულ კინოში დარჩენა ამჯობინა.
