რამდენად დიდიც არ უნდა იყოს სამეფო კარის თამაშების მე-8 სეზონით გამოწვეული ეიფორია, სიმართლე მაინც ისაა, რომ ეს უდიდესი ისტორია დასასრულს უახლოვდება. ამ ფაქტმა მძიმედ იმოქმედა სერიალის ყველა მსახიობზე, რომლებიც შოუზე მუშაობის რვა წლის განმავლობაში ერთმანეთს ძალიან დაუახლოვდნენ და ზოგიერთები დღეს განუყრელი მეგობრები არიან.
ასე მოხდა ემილია კლარკისა და კიტ ჰარინგტონის შემთხვევაშიც, რომლებსაც, მართალია სერიალის ექვს სეზონზე მუშაობის დროს გადასაღებ მოედანზე ერთად ყოფნა არ უწევდათ, წლიდან წლამდე მაინც უახლოესი ურთიერთობა ჩამოუყალიბდათ. თავდაპირველად ისინი ურთიერთსიმპათიით განეწყვნენ, ხოლო დროთა განმავლობაში დამეგობრდნენ და მიუხედავად იმისა, რომ სერიალის მოყვარულთა დიდი არმია მათ რომანზე საუბრობდა და, უფრო მეტად, გულშემატკივრობდა, კიტი და ემილია ყოველთვის ამტკიცებენ, რომ მათ მხოლოდ საუკეთესო მეგობრობა აკავშირებთ.
მითქმა-მოთქმა იმის თაობაზე, რომ წყვილი ერთმანეთზე რეალურ ცხოვრებაშიც შეყვარებული იყო, კიტისა და ემილიას პერსონაჟების შეხვედრიდან გაცილებით ადრე დაიწყო, მაგრამ მათი რომანის გულშემატკივრები განსაკუთრებით “ახმაურდნენ” მე-7 სეზონის დასაწყისიდან, როცა კიტისა და ემილიას ეკრანული გმირები, ჯონ სნოუ და დენერის ტარგარიენი ბოლოს და ბოლოს ერთმანეთს შეხვდნენ და მათ შორის სიმპათიის ნაპერწკალიც გაჩნდა.
დღეს ჩრდილოეთის მეფისა და დრაკონების დედის მეგობრობასა და ეკრანულ რომანზე ვისაუბრებთ – ერთად გავიგოთ, რა გახდა მათ შორის რომანის შესახებ ჭორების საფუძველი, დღემდე უამრავი ადამიანი რატომ ფიქრობს, რომ “ისინი ერთმანეთისთვის არიან შექმნილები” და რას ამბობენ ამ ყველაფრის შესახებ თავად მსახიობები.
პირველი შეხვედრა
ELLE-ს 2017 წლის ნომერში, რომლის ერთ-ერთი მთავარი გმირი ემილია კლარკი იყო, ჰარინგტონმა მასთან პირველი შეხვედრა გაიხსენა: “ცხადად მახსოვს, როგორ შევხვდი პირველად ემილიას. ეს იყო ბელფასტში, სასტუმროს ბარში – პირველი სეზონის გადაღების დაწყებამდე. ძალიან მოვიხიბლე მისით, შესანიშნავი, პატარა გოგო იუმორის საოცარი გრძნობით. ჩვენ ძალიან მალე დავმეგობრდით.”
სულ ცოტა ხნის წინ, ჟურნალ Esquire-თან ინტერვიუში ჰარინგტონმა კიდევ ერთხელ გაიხსენა მათი პირველი შეხვედრა. “მახსოვს ის მომენტი, როცა იგი ვნახე… “ფიცუილიამის ბარში (იმ სასტუმროს ბარი, რომელშიც მსახიობები გადაღებების დაწყებამდე იყვნენ დაბინავებულები) შემოვიდა. მანამდე მე რიჩარდ მადენს (რობ სტარკის როლის შემსრულებელი) ვესაუბრებოდი ბარში და მან მითხრა: “ახალი დენერისი ვნახე, შესანიშნავი გოგოა.” “მართლა? მე ჯერ არ შევხვედრივარ” შემდეგ ისიც შემოვიდა, დავინახე და გავიფიქრე: “ვაუ!” როცა ემილია ოთახში შემოდის, სუნთქვას გიკრავს”.
ჯონ სნოუს როლის შემსრულებელი არ მალავს, რომ მართლაც ძალიან მოიხიბლა ემილიათი, მაგრამ მათი მეგობრობა მაშინ დაიწყო, როცა ორივემ აღმოაჩინა, რომ მსგავსი (ბნელი) იუმორის გრძნობა ჰქონდათ. ეს ყოველგვარ ფიზიკურ მიზიდულობაზე ძლიერი აღმოჩნდა. “ემილია ისეთი საყვარელია, დამყოლი”, – აღნიშნა კიტმა, – “მაგრამ, როცა უნდა, შეუძლია უხამსი, ბილწი აზროვნებისაც იყოს.”
მოულოდნელი კოცნა ფოტოსესიის დროს
დიდი ხნით ადრე (2012 წელს), სანამ მათ პერსონაჟებს ერთმანეთი შეუყვარდებოდათ, კლარი და ჰარინგტონი უამრავმა ადამიანმა გამოაცხადა შეყვარებულ წყვილად. და ამის მიზეზი ცნობილი კოცნა გახდა ჟურნალ Rolling Stone-ისთვის გამართული ფოტოსესიის დროს, რომელშიც მათ გარდა სამეფო კარის თამაშების სხვა ვარსკვლავებსაც იღებდნენ. მათ შორის არსებულ ქიმიაზე აღნიშნული ფოტოსესიის ავტორთან ერთად უამრავი ადამიანი ალაპარაკდა.
2016 წელს ფოტოგრაფმა პეგი სიროტამ Instagram-ზე გამოაქვეყნა ამ ფოტოსესიის ამსახველი “კადრსმიღმა” ფოტოები შემდეგი აღწერილობით: “ეს მომენტი დაუვიწყარი იყო. იმ დღეს გადასაღებ მოედანზე პატარა ჯგუფი ვმუშაობდით, მხოლოდ რამდენიმე ადამიანი. ამ ოთხს (იგულისხმება ჰარინგტონი, კლარკი, ალფი ალენი და ლენა ჰედი) შორის უზარმაზარი ქიმია იგრძნობოდა, როგორც ხედავთ… ვთხოვე, ერთმანეთისთვის ეკოცნათ. ჩემი აზრით, ჰაერში სიყვარული ტრიალებდა და გამიმართლა, რომ იქ აღმოვჩნდი.” რასაკვირველია, ამ პოსტმა უამრავი ფანი დაარწმუნა იმაში, რომ წყვილს ერთმანეთის მიმართ მართლაც გააჩნდათ ლტოლვა.
რომანი, რომელიც არ არსებობს
2017 წლის ინტერვიუში ELLE-სთან ემილია კლარკმა მასა და კიტს შორის არსებული რომანის შესახებ ჭორებს უპასუხა. მსახიობმა განაცხადა, რომ იმ ფაქტს, რომ ასე აქტიურად ლაპარაკობენ კიტისა და მის ფარულ სიყვარულზე და გაუთავებლად უსვამენ ამაზე კითხვებს, “ტირილამდე მიჰყავს, იმდენად არ შეესაბამება სიმართლეს”. კლარკმა ხაზგასმით განაცხადა, რომ ისინი მხოლოდ და მხოლოდ მეგობრები არიან.
ემილია კიტს თავის “ორეულს” უწოდებს
Variety-სთან ინტერვიუში კლარკმა კვლავ ისაუბრა ჰარინგტონთან მუშაობისა და ურთიერთობის შესახებ. ამ ინტერვიუში კიდევ ერთხელ გამოჩნდა, თუ როგორ შესანიშნავად ეწყობიან ისინი ერთმანეთს. “კიტი და მე გარკვეულწილად ორეულები ვართ მსგავსი გზითა და ცხოვრებისეული თუ კარიერული გამოცდილებით. თითქმის ერთი ასაკისები ვართ, ჩვენმა პერსონაჟებმაც თითქმის ერთნაირი გზა გამოიარეს – ჩვენც, როგორც მსახიობებმა, პარალელური გზა გავიარეთ. ერთნაირად გვბეზრდება სულელურ მძაფრსიუეტიან ფილმებში თამაში და ორივეს უზომოდ გვიხარია ხოლმე სამეფო კარის თამაშებში დაბრუნება.”
ეს ყველაფერი არაა. როცა ემილიას რჩევა სჭირდება, თუ როგორ ითამაშოს ესა თუ ის სცენა, ყოველთვის კიტს მიმართავს. “მისთვის გადაღების შესახებ ხშირად მიკითხავს: “ამას როგორ ართმევ თავს? კარგად ხარ?” ჩვენ სინქრონულად ვმუშაობდით, მაშინაც კი, როცა მსოფლიოს საპირისპირო კუთხეებში გვქონდა გადაღებები.”
ჰარინგტონის აზრითაც, კლარკსა და მას “ერთნაირი” კარიერული გზა აქვთ. “ორივემ დრამის სკოლა დავამთავრეთ და ეს ჩვენი პირველი დიდი შოუ იყო – ჩვენ მართლაც რაღაც ყინულსა და ცეცხლს ვგავართ – მსგავსი ახალგაზრდა ლიდერები, როგორც იტყვიან… მათი გამოცდილება ნაწილობრივ ჩვენი გამოცდილებაც არის.” – განაცხადა მსახიობმა ინტერვიუში.
“ჩემი აზრით, საუკეთესო მეგობრები იმიტომ ვართ, რომ ალბათ სხვებზე უკეთ ვიცნობთ ერთმანეთის თითოეული ნაბიჯს”, – აცხადებს კიტ ჰარინგტონი.
მეგობრობა გადასაღებ მოედანს მიღმა
მიუხედავად იმისა, რომ თითქმის ათი წელი ერთ შოუზე მუშაობდნენ, ემილიას და კიტს საერთო სცენები მე-7 სეზონამდე არ ჰქონიათ. “ერთმანეთს სცენარის ერთობლივი გაცნობისას ვხვდებოდით ხოლმე, თუმცა მეგობრობა პრესასთან ინტერვიუების დროს, კომიკ-კონებზე და სერიალის მიღმა შეხვედრებზე განვითარდა.” – აღნიშნა კიტ ჰარინგტონმა.
რომანტიკული სცენების გადაღების სირთულე
როცა კიტისა და ემილიას გმირები – ჯონ სნოუ და დენერის ტარგარიენი ბოლოს და ბოლოს ერთმანეთს შეხვდნენ, მსახიობები თავიანთ ახალ ეკრანულ ურთიერთობას იუმორით მიუდგნენ. როგორც კლარკმა Variety-სთან განაცხადა: “როცა პირველ ერთობლივ სცენას ვიღებდით, ორივეს სიცილი აგვიტყდა. რატომ მიყურებ ასე უცნაურად და ასეთ უცნაურ სიტყვებს მეუბნები? შენ ხომ ჩემი მეგობარი ხარ?!”
ჰარინგტონმა კი ამავე სცენაზე Esquire-თან განუცხადა: “მახსოვს, ჩვენი პირველი ერთობლივი სცენა უჩვეულო იყო. ერთმანეთს ვუყურებდით და ვცდილობდით, არ გაგვცინებოდა.”
ალბათ სწორედ ეს მეგობრული ურთიერთობა უშლის მათ ხელს ეკრანული სიყვარულის თამაშში. სულ ახლახან, მე-8 სეზონის პირველი ეპიზოდის გამოსვლისთანავე მრავალმა კრიტიკოსმა თუ ფანმა გააკრიტიკა ჯონ სნოუს და დენერისის წყვილი მათ შორის “ქიმიის არარსებობის” გამო.
მეტიც, Variety-ის ინფორმაციით, “ჯონსა და დენერისს შორის რომანტიკული სცენების გადაღებისას ჰარინგტონს ვითომ გული ერეოდა, კლარკი კი ეუბნებოდა: “ო, ღმერთო, ამით საქმეს კიდევ უფრო ართულებ!” კიტმა აღნიშნული სცენების გადაღების შესახებ გამოქვეყნებულ ვიდეოში დაადასტურა, რომ მართლაც მოიქცა ასე. ემილიას თქმით, ფაქტი, რომ ჯონ სნოუ დენერისის უფროსი ძმის შვილია, მათ სასიყვარულო ურთიერთობას სიუჟეტურადაც ეჭვქვეშ აყენებს, შესაბამისად, მათ უჭირთ სასიყვარულო სცენების თამაში.
ემილია კიტის ცოლთან, იგრიტის როლის შემსრულებელ როუზ ლესლისთან მეგობრობს
2018 წელს ერთ-ერთ ინტერვიუში ჰარინგტონმა ხაზგასმით აღნიშნა, რომ მასა და ემილიას შორის თუ ვინმე რაიმე რომანზე საუბრობს, ამის საბაბი მხოლოდ მათი ეკრანული ურთიერთობაა და რეალურთან კავშირი არ აქვს. “როცა ადამიანს ექვსი წელი იცნობ და ის შენი გელფრენდის საუკეთესო მეგობარიც არის, მასთან სასიყვარულო ურთიერთობაზე ლაპარაკი არაბუნებრივია.” – განაცხადა კიტმა.
ის თავისი პირველი ეკრანული შეყვარებულის როლის შემსრულებელი როუზ ლესლიზე ამავე წელს, ივნისში დაქორწინდა და მის ქორწილს ემილია კლარკიც ესწრებოდა. ემილია ინსტაგრამზე არცთუ იშვიათად აქვეყნებს ერთობლივ სელფებს, რომლებიც ცხადყოფს, რომ როუზს და მას ნამდვილი, ყოველგვარი სასიყვარულო დრამისგან თავისუფალი ურთიერთობა აკავშირებთ. კიტმა Esquire-თან ისიც აღნიშნა, რომ ის, როუზი და ემილია წლებია ახლო მეგობრები არიან.
განსაკუთრებული ურთიერთობა
მართალია, მათ შორის რომანტიკული გრძნობები არ არის, ემილიას და კიტს მაინც განსაკუთრებული ურთიერთობა აქვთ. ემილია შანსს არ უშვებს, გადასაღებ მოედანზე, სხვადასხვა ღონისძიებაზე თუ არაფორმალურ გარემოში აღბეჭდოს კიტის ვიდეო თუ ფოტო და თავისებური, იუმორით სავსე აღწერილობით გამოაქვეყნოს. ამგვარი დამოკიდებულებით ემილია ხაზს უსვამს, რომ ნამდვილი მეგობრობა შეიძლება ქალსა და მამაკაცს შორისაც არსებობდეს.
და მაინც, ბევრი კვლავ მყარად რჩება იმ აზრზე, რომ ემილია და კიტი ერთმანეთისთვის არიან შექმნილები და ისევე ვერ ეგუებიან არსებულ რეალობას, როგორც იმ ფაქტს, რომ დაახლოებით ერთ თვეში სამეფო კარის თამაშების ბოლო სეზონი დასრულდება.
მომზადებულია www.harpersbazaar.com-ის მიხედვით
