ბანქოს სახლი Netflix-ის პირველი სერიოზული განაცხადი იყო, რომელმაც კომპანიას 2011 წლიდან მილიარდების მოგება და მსოფლიო აუდიტორია მოუტანა. 1990 წელს გამოსული BBC-ის მინისერიალის ადაპტაციის იდეა რეჟისორ დევიდ ფინჩერს ეკუთვნოდა, კონგრესმენ ფრენკ ანდერვუდის როლის შემსრულებელი კევინ სპეისი კი ამავდროულად აღმასრულებელი პროდიუსერიც იყო.
ოქტომბრის ბოლოს კევინ სპეისის გარშემო დიდი აჟიოტაჟი ატყდა, როცა მსახიობმა ენტონი რეპმა იგი სექსუალურ ძალადობაში დაადანაშაულა, რის შედეგადაც სპეისმა აღიარა, რომ გეია. ამასობაში მეექვსე სეზონის შემდეგ ბანქოს სახლის დასრულების თაობაზეც განაცხადეს, რაც ბევრმა სწორედ სპეისის სკანდალს მიაწერა, თუმცა Netflix ამტკიცებს, რომ სერიალის დასრულების გადაწყვეტილება გაცილებით ადრე მიიღეს.
ბოლო დღეებში ფარდა აეხადა სპეისის ქცევას პროფესიულ გარემოში. აღმოჩნდა, რომ ბანქოს სახლის გადასაღებ მოედანზე მსახიობი ხელშეუხებელი იყო და გარეგნულად მიუკარებელი იერის მიუხედავად, გადამღები ჯგუფის ახალგაზრდა მამაკაც თანამშრომლებს ღიად ეფლირტავებოდა.
პრესა ბანქოს სახლთან დაკავშირებულ სამ ადამიანს გაესაუბრა და ყოველმა მათგანმა, მათ შორის ორმა იმ თანამშრომელმა, რომელიც გადასაღებ მოედანზე დიდი დროს ატარებდა, დაადასტურა, რომ სპეისი შოუს გადაღებისას ახალგაზრდა ბიჭებს დაუფარავად ეარშიყებოდა და სექსუალური რეპლიკებით უხერხულობას უქმნიდა. “ყურადღების ცენტრში მყოფი სპეისი შემაწუხებლად იქცეოდა, 150 კაცის წინ აკეთებდა უხერხულ კომენტარებს… ‘მოდი, კალთაში ჩამიჯექი, თვითონაც ხომ გინდა’ – ეტყოდა ხოლმე რომელიმე სასიამოვნო შესახედ, არა გეი ყმაწვილს. და ეს მუდმივად ხდებოდა”.
გასულ ხუთშაბათს CNN-ზე გავრცელდა ინფორმაცია, რომ სპეისი ერთ-ერთ ასისტენტსაც ავიწროებდა და “არასასურველი კონტაქტის დამყარებას ცდილობდა”. ასევე ცნობილი გახდა, რომ გადამღებმა გუნდმა ვარსკვლავის ქცევის შესახებ იცოდა და “ჩივილი სპეისის რეპლიკებსა და ხელების ფათურზე” 2012 წლიდან ესმოდათ.
ბანქოს სახლის ავტორი და აღმასრულებელი ბო უილმონი ენტონი რეპის განცხადებას გამოეხმაურა და თქვა, რომ თანაუგრძნობს რეპს და განიცდის მის მდგომარეობას, თუმცა კევინ სპეისთან მუშაობის დროს არასდროს შეუმჩნევია ან უეჭვია რამე, რაც სერიალის სამმა თანამშრომელმა გააპროტესტა, ერთ-ერთი მათგანი დარწმუნებულია, რომ უილმონი მშვენივრად ხვდებოდა სპეისის საქციელს.
