შეიძლება ჩვენ ყველა მსახიობი, მოდელი და ცნობილი ადამიანი, რომლებიც წითელ ხალიჩაზე ან ჟურნალის ყდებზე იწონებენ თავს, ტანწერწეტა და გრძელფეხება გვგონია, მაგრამ ეს ასე ნამდვილად არაა. მრავალი ცნობილი ადამიანი იმაზე ნაკლები სიმაღლისაა, ვიდრე ჩვენ წარმოგვიდგენია. ცნობისთვის, ჰოლივუდის უბრწყინვალესი ვარსკვლავების უმეტესობა საშუალო სიმაღლისაა. მართალია, ეკრანზე ამის აღქმა ძნელია, მაგრამ სელებრითებშიც არიან დაბალი სიმაღლის, ტანმორჩილი ადამიანებიც.
დღეს ჰოლივუდის ყველაზე ცნობილ ტანმორჩილ მშვენიერ ქალბატონებს წარმოგიდგენთ. ისინი ყველას იმის მაგალითს გვაძლევენ, რომ სილამაზე, ნიჭიერება და წარმატება სულაც არაა სიმაღლის პირდაპირპროპორციული.
1. ემილია კლარკი
სიმაღლე: 157 სმ
დრაკონების დედა, იგივე ხალესი, ბრიტანელი მსახიობი ემილია კლარკი მრავალმხრივ ნიჭიერი ადამიანია – გარდა მსახიობობისა, ის მღერის, უკრავს ფორტეპიანოზე, გიტარაზე და ფლეიტაზე. 2017 წელს ის ყველაზე მაღალანაზღაურებადი სატელევიზიო მსახიობი გახდა (2 მილიონი ფუნტი სამეფო კარის თამაშების ერთ ეპიზოდში!).
2. სკარლეტ იოჰანსონი
სიმაღლე: 160 სმ
ჰოლივუდის მშვენება სკარლეტ იოჰანსონი 2014 და 2016 წლებში მსოფლიოს ყველაზე მაღალანაზღაურებადი მსახიობი ქალი გახლდათ. ის ხშირად ყოფილა Forbes Celebrity 100-ის მოწინავე ათეულში და ჰოლივუდის დიდების ხეივანში მისი სახელობის ვარსკვლავიც არის გახსნილი. იოჰანსონი პირველი სელებრითი ქალბატონია, რომელიც Esquire Magazine-მა “ყველაზე სექსუალურ ქალად” დაასახელა. სამსახიობო ოსტატობისთვის მოპოვებული აქვს უამრავი პრესტიჟული ჯილდო და ნომინაცია, გარდა ამისა, ნიჭიერი მომღერალია.
3. კიმ კარდაშიანი
სიმაღლე 157 სმ
კიმ კარდაშიანი, იგივე კიმ ქეი როსი, თანამედროვე პოპკულტურის ერთ-ერთი გამორჩეული ფიგურაა. ის რეალითი შოუ “კარდაშიანებითა” და სკანდალური ვიდეოჩანაწერებით გახდა ცნობილი. გადაღებულია რამდენიმე მხატვრულ ფილმში. რაც რეპერ კაინე ვესტის გაჰყვა ცოლად, კიმის პოპულარობა კიდევ უფრო გაიზარდა. ინსტაგრამზე მას 100 მილიონზე მეტი გამომწერი ჰყავს და მისი ნეტ-ღირებულება 175 მილიონს აღწევს.
4. მილა კუნისი
სიმაღლე: 162 სმ
ნიჭიერი და მშვენიერი მილა კუნისი დარენ არანოვსკის ფსიქოლოგიურ თრილერში შავი გედი შესრულებულმა როლმა სუპერპოპულარულად აქცია და მისი თამაში კრიტიკოსებმაც კარგად შეაფასეს. მილას როლებმა არაერთხელ მოიპოვა პრესტიჟული ჯილდოების ნომინაციები.
5. ლუსი ჰეილი
სიმაღლე: 157 სმ
ეს მშვენიერი მსახიობი საქვეყნოდ ცნობილი გახდა პატარა საყვარელ მატყუარებში შესრულებული არია მონტგომერის როლით. ის ასევე ცნობილი ქანთრი მომღერალია და 2014 წელს პირველი ალბომიც გამოუშვა. გარდა უამრავი ნომინაციისა და ჯილდოსი, ის “ხალხის რჩეულის” დაჯილდოების გამარჯვებულიცაა.
6. კაილი მინუოგი
სიმაღლე: 152 სმ
მიუხედავად მცირე სიმაღლისა, პოპ პრინცესა პლანეტის ერთ-ერთი ყველაზე მომხიბლავი ქალია. მისი მიმზიდველი სხეული, დაუვიწყარი ვოკალი და ცეკვის ნიჭი ყველას აღაფრთოვანებს. კაილის უამრავი სიმღერა გამხდარა ამერიკისა და ბრიტანეთის ჩარტების ლიდერი, მოგებული აქვს გრემი, სამი “ბრიტი” და 17 ARIA Music Awards.
7. ანა კენდრიკი
სიმაღლე: 157 სმ
უნიჭიერესი და ულამაზესი ანა ბავშობიდან ეკრანის მსახიობია. ბინდის საგაში შესრულებულმა მეორეხარისხოვანმა როლმა მას დიდი კინოსკენ გაუხსნა გზა და ანამ დაამტკიცა, რომ მართლაც უმაღლესი დონის მსახიობია. 24 წლის ასაკში ანამ ოსკარის ნომინაცია მოიპოვა, მისი სიმღერა “Cups (When I’m Gone)” კი (იდეალური ხმიდან) ჰიტად იქცა და ბილბორდების ათეულში შევიდა.
8. აილა ფიშერი
სიმაღლე: 160 სმ
ბრიტანელ-ავსტრალიელი მსახიობი მრავალი სატელევიზიო და მხატვრული ფილმით გახდა ცნობილი, იგი ბრიტანელი კომიკოსის საშა ბარონ კოენის ცოლია.
9. ლედი გაგა
სიმაღლე: 154 სმ
ექსცენტრიკული და პროვოკაციული გამოსვლებით ცნობილი უნიჭიერესი პოპვარსკვლავი 4 წლიდან უკრავს ფორტეპიანოზე. გარდა სცენისა, მან ეკრანზეც გამოიჩინა თავი – ვარსკვლავის დაბადება მისი მონაწილეობით ოსკარის რვაგზის ნომინანტია (მათ შორის თავად ლედი გაგაც – საუკეთესო მსახიობი ქალის ნომინაციაში).
10. კრისტენ ბელი
სიმაღლე: 154 სმ
მსახიობის დებიუტი ბროდვეიზე შედგა, შემდგომი კარიერა კი კომედიურ ფილმებსა და ტელეშოუებში განაგრძო. იგი ახმოვანებს ანას დისნეის ანიმაციაში გაყინული, ასევე არის ჭორიკანას იდუმალი ხმა.
11. ნატალი პორტმანი
სიმაღლე 160 სმ
ოქროს გლობუსის მფლობელი ულამაზესი ნატალი პორტმანი, რომელმაც უამრავი შესანიშნავი როლით შეგვაყვარა თავი, რმავალმხრივ ნიჭიერი და ძალზე განათლებული ადამიანია. მისი ნეტ-ღირებულება 54 მილიონს აჭარბებს.
12. სელმა ჰაიეკი
სიმაღლე: 157 სმ
მექსიკელი მზეთუნახავის ნიჭმა და სილამაზემ დიდი ხანია ჰოლივუდი დაიპყრო. ოსკარის, ბაფტასა და ოქროს გლობუსის ნომინანტმა მსახიობმა თავის სიმაღლესთან დაკავშირებით განაცხადა: “მე მაღალი ადამიანის თამაშიც შემიძლია!.. მიყურეთ, რა დაბალი ვარ, მაგრამ ეს თამაშში ხელს არ მიშლის.”
13. მეგან ფოქსი
სიმაღლე: 162 სმ
მოდელი და მსახიობი მეგან ფოქსი ისეთი იმიჯის ვარსკვლავია, რომელიც ყოველთვის გაცილებით მაღალი ჰგონიათ. სინამდვილეში, მისი სიმაღლე 165 სმ-ც კი არაა.
14. დაკოტა ფენინგი
სიმაღლე: 162 სმ
უნიჭიერესი დაკოტა, რომელმაც სახელი ჯერ კიდევ პატარაობაში, 8 წლის ასაკში გაითქვა დრამაში მე ვარ სემი შესრულებული როლით (მისი წყალობით მსახიობთა გილდიის ყველაზე ახალგაზრდა ნომინანტიც გახდა), მეგან ფოქსის სიმაღლისაა.
15. ევა ლონგორია
სიმაღლე: 157 სმ
ევა ლონგორიამ მაყურებელს თავი სასოწარკვეთილ დიასახლისებში განსახიერებული როლით შეაყვარა. მიუხედავად იმისა, რომ მისი სიმაღლე 160 სმ-საც კი არ აღწევს, ის მაინც ერთ-ერთი ყველაზე მიმზიდველი და მომხიბვლელი ქალია ჰოლივუდში.
